ಡಿಕೆ ಶಿವಕುಮಾರ್ ಗೆ ಸಿಎಂ ಹುದ್ದೆ ಕೊಟ್ಟರೆ ಸಿದ್ದರಾಮಯ್ಯ ಬಣದ ನಡೆ ಏನಿರಬಹುದು

ಬೆಂಗಳೂರು: ರಾಜ್ಯದಲ್ಲಿ ನಡೆಯುತ್ತಿರುವ ಸಿಎಂ ಕುರ್ಚಿ ಫೈಟ್ ಕ್ಲೈಮ್ಯಾಕ್ಸ್ ಹಂತಕ್ಕೆ ಬಂದಿದೆ. ಒಂದು ವೇಳೆ ಹೈಕಮಾಂಡ್ ಡಿಕೆ ಶಿವಕುಮಾರ್ ಗೆ ಸಿಎಂ ಪಟ್ಟ ಕಟ್ಟಲು ತೀರ್ಮಾನಿಸಿದರೆ ರಾಜ್ಯ ರಾಜಕೀಯದಲ್ಲಿ ಏನಾಗಬಹುದು, ಸಿದ್ದರಾಮಯ್ಯ ಬಣದ ಮುಂದಿನ ನಡೆ ಏನಿರಬಹುದು ಇಲ್ಲಿದೆ ವಿಶ್ಲೇಷಣೆ.

ಸಿದ್ದರಾಮಯ್ಯ ಮತ್ತು ಡಿಕೆಶಿ ನಡುವೆ ಈಗಾಗಲೇ ಕೊಡೆ-ಬಿಡೆ ತೆರೆಮರೆಯ ಆಟ ನಡೆಯುತ್ತಿದೆ. ಹೈಕಮಾಂಡ್ ಯಾವ ಹೆಜ್ಜೆಯಿಡುತ್ತದೋ ಅದಕ್ಕೆ ಯಾವ ಪ್ರತಿತಂತ್ರ ಹೆಣೆಯಬೇಕು ಎಂಬ ಲೆಕ್ಕಾಚಾರಗಳೂ ನಡೆಯುತ್ತಿವೆ.

ಒಂದು ವೇಳೆ ಹೈಕಮಾಂಡ್ ಡಿಕೆ ಶಿವಕುಮಾರ್ ಗೆ ಸಿಎಂ ಸ್ಥಾನ ಬಿಟ್ಟುಕೊಟ್ಟರೆ ಸಿದ್ದರಾಮಯ್ಯ ಬಣವಂತೂ ತಣ್ಣಗೆ ಕೂರಲ್ಲ. ಅದಕ್ಕೆ ಪ್ರತಿಯಾಗಿ ಏನು ಮಾಡಬೇಕು ಎಂದು ಈಗಾಗಲೇ ಯೋಜನೆ ಸಿದ್ಧವಾಗಿರುತ್ತದೆ. ಈಗಾಗಲೇ ಸಿದ್ದು ಬಣದಿಂದ ದಲಿತ ಸಿಎಂ ಕೂಗು ಕೇಳಿಬರುತ್ತಿದೆ.

ಒಂದು ವೇಳೆ ಹೈಕಮಾಂಡ್ ಸಿದ್ದರಾಮಯ್ಯನವರನ್ನು ಬದಲಿಸಲು ತೀರ್ಮಾನಿಸಿದರೆ ದಲಿತ ಸಿಎಂ ದಾಳ ಉರುಳಿಸಲು ಸಿದ್ದು ಬಣ ರೆಡಿಯಾಗಿದೆ. ಒಂದು ವೇಳೆ ಸಿದ್ದು ಬಣ ಹೇಳುವ ದಲಿತ ಅಭ್ಯರ್ಥಿಯನ್ನು ಸಿಎಂ ಮಾಡದೇ ಇದ್ದರೆ ಹೈಕಮಾಂಡ್ ಗೂ ಅಪವಾದ ಅಂಟಿದಂತಾಗುತ್ತದೆ. ಯಾಕೆಂದರೆ ಈಗಾಗಲೇ ರಾಹುಲ್ ಗಾಂಧಿ ದಲಿತರಿಗೆ ಮನ್ನಣೆ ಸಿಗುತ್ತಿಲ್ಲ ಎಂದು ಹೋದಲೆಲ್ಲಾ ಪ್ರತಿಪಾದಿಸುತ್ತಿದ್ದಾರೆ. ಹೀಗಾಗಿ ಡಿಕೆಶಿಗೆ ಅಧಿಕಾರ ನೀಡುವುದು ಅಷ್ಟು ಸುಲಭದ ಮಾತಲ್ಲ. ಮುಂದಿನ ಹೆಜ್ಜೆ ಯಾವುದೇ ಇದ್ದರೂ ಅದು ಕತ್ತಿಯ ಮೇಲಿನ ನಡಿಗೆಯಾಗಲಿದೆ.