ಬೆಂಗಳೂರು: ತನ್ನ ಪಾಡಿಗೆ ತಾನು ನಡೆದು ಹೋಗುತ್ತಿದ್ದ ಮಹಿಳೆಯನ್ನು ನಡು ರಸ್ತೆಯಲ್ಲೇ ವಿನಾಕಾರಣ ಎಳೆದಾಡಿ ಹಿಂಸಿಸಿದ ದೃಶ್ಯವೊಂದು ಸೋಷಿಯಲ್ ಮೀಡಿಯಾದಲ್ಲಿ ವೈರಲ್
ಆಗಿದೆ.
ಘಟನೆ ನಮ್ಮ ಬೆಂಗಳೂರಿನಲ್ಲೇ ನಡೆದಿದೆ ಎನ್ನುವುದು ಶಾಕಿಂಗ್ ವಿಚಾರವಾಗಿದೆ. ಬೆಂಗಳೂರಿನ ಬನ್ನೇರು ಘಟ್ಟ ರಸ್ತೆ ಬಳಿ ಘಟನೆ ನಡೆದಿದೆ ಎನ್ನಲಾಗಿದೆ. ಎಲ್ಲವೂ ಸಿಸಿಟಿವಿಯಲ್ಲಿ ಸೆರೆಯಾಗಿದ್ದು, ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ. ವಿಡಿಯೋ ವೈರಲ್ ಆಗುತ್ತಿದ್ದಂತೇ ಸಾರ್ವಜನಿಕರಿಂದ ತೀವ್ರ ಆಕ್ರೋಶ ವ್ಯಕ್ತವಾಗಿದೆ.
ಒಬ್ಬ ಮಹಿಳೆ ಬುಟ್ಟಿ ಹಿಡಿದುಕೊಂಡು ತರಕಾರಿ ತರಲೆಂದು ಮನೆಯಿಂದ ಹೊರಟು ಎರಡು ಹೆಜ್ಜೆ ಮುಂದೆ ಬಂದಾಗ ಓರ್ವ ಕುಡುಕ ಹತ್ತಿರ ಬಂದು ಏನೋ ಕೆಟ್ಟದಾಗಿ ಮಾತನಾಡುತ್ತಾನೆ. ಆಗ ಇನ್ನೊಬ್ಬಾತ ಆತನನ್ನು ಎಳೆದು ಸ್ವಲ್ಪ ಕರೆದೊಯ್ಯುತ್ತಾನೆ. ಮಹಿಳೆ ಮತ್ತೆ ತನ್ನ ಪಾಡಿಗೆ ಮುಂದೆ ನಡೆಯಲು ಹೊರಟಾಗ ಮತ್ತೊಮ್ಮೆ ಅದೇ ಯುವಕ ಆಕೆಯನ್ನು ಅಡ್ಡಗಟ್ಟಿ ಕೆಟ್ಟದಾಗಿ ನಡೆದುಕೊಳ್ಳುತ್ತಾನೆ.
ನಾಲ್ಕಾರು ಯುವಕರು ಸೇರಿಕೊಂಡು ಮಹಿಳೆಯ ಜುಟ್ಟು ಹಿಡಿದೆಳೆದು ಅಮಾನುಷವಾಗಿ ನಡೆದುಕೊಳ್ಳುತ್ತಾರೆ. ಇದನ್ನು ಕಂಡು ಅದೇ ದಾರಿಯಲ್ಲಿ ಬರುವ ಬೈಕ್ ಸವಾರರೊಬ್ಬರು ಆ ಮಹಿಳೆಯನ್ನು ರಕ್ಷಿಸಿ ಕರೆದುಯ್ಯುವಾಗ ಮತ್ತೆ ಬರುವ ಯುವಕರ ಗುಂಪು ಆತನ ಮೇಲೂ ಹಲ್ಲೆ ನಡೆಸುತ್ತಾರೆ. ಈ ವಿಡಿಯೋ ಈಗ ವೈರಲ್ ಆಗಿದ್ದು, ಇಂತಹ ದುರುಳರಿಗೆ ತಕ್ಕ ಶಾಸ್ತಿ ಮಾಡಬೇಕು ಎಂದು ಸಾರ್ವಜನಿಕರು ಆಗ್ರಹಿಸಿದ್ದಾರೆ.
