ನೂತನ ಮನೆಗೆ ವಾಜಪೇಯಿ ಹೆಸರಿಟ್ಟು ಅಭಿಮಾನ ಮೆರೆದ ಚಾಲಕ!

ಅಜಾತ ಶತೃ, ಭಾರತ ರತ್ನ ಅಟಲ್ ಬಿಹಾರಿ ವಾಜಪೇಯಿ ಹೆಸರನ್ನ ತಮ್ಮ ನೂತನ ಮನೆಗೆ ಇಡುವ ಮೂಲಕ ಕಾರ್ ಚಾಲಕನೋರ್ವ ಆದರ್ಶ ಮೆರೆದ ಘಟನೆ ನಡೆದಿದೆ.

ಗದಗದ ಪಂಚಾಕ್ಷರಿ ನಗರದ ನಿವಾಸಿ ವೀರಭದ್ರಪ್ಪ ಡಂಬಳ ಎಂಬುವರು ತಮ್ಮ ಕನಸಿನ ಮನೆಗೆ ವಾಜಪೇಯಿ ನಿವಾಸ ಎಂದು ಹೆಸರಿಟ್ಟಿದ್ದಾರೆ. ಸ್ಥಳೀಯ ಸಾರ್ವಜನಿಕರ ಸಮ್ಮುಖದಲ್ಲಿ ನಾಮಫಲಕ ಉದ್ಘಾಟಿಸಿದರು. ನಂತರ ಪುಷ್ಪಗಳಿಂದ ಅಲಂಕಾರಗೊಂಡ ಅಟಲ್ ಜಿ ಭಾವಚಿತ್ರಕ್ಕೆ ಪೂಜೆ ಸಲ್ಲಿಸಿದರು.

ನೂತನ ನಿವಾಸದ ಉದ್ಘಾಟನೆಯಲ್ಲಿ ಪಾಲ್ಗೊಂಡವರಿಗೆ ಸಿಹಿ ಹಂಚಿದರು. ವೃತ್ತಿಯಲ್ಲಿ ಕಾರ್ ಡ್ರೈವರ್ ವೀರಭದ್ರಪ್ಪ ಇವರು, ಹದಗೆಟ್ಟ ರಸ್ತೆಗಳಿಂದ ಬೇಸತ್ತಿದ್ದ ಸಂದರ್ಭದಲ್ಲಿ, ಅಟಲ್ ಬಿಹಾರಿ ವಾಜಪೇಯಿ ಪ್ರಧಾನಿ ವೇಳೆ ದೇಶಾದ್ಯಂತ ಚತುಷ್ಪತ ರಸ್ತೆ, ಗ್ರಾಮ ಸಡಕ್ ಯೋಜನೆಯಂತ ರಸ್ತೆ ಯೋಜನೆಗಳನ್ನ ಜಾರಿಗೆ ತಂದು ವಾಹನ ಚಾಲಕರಿಗೆ ಆಗುವ ತೊಂದರೆಗಳನ್ನ ನಿವಾರಿಸಿದ್ದರು. ಈ ಕಾರಣದಿಂದ ಮನೆಗೆ ವಾಜಪೇಯಿ ನಿವಾಸ ಎಂದು ಹೆಸರಿಟ್ಟಿದ್ದೇನೆ ಅಂತಿದ್ದಾರೆ ಕಾರ್ ಚಾಲಕ ವೀರಭದ್ರಪ್ಪ.