ಮಂಗಳೂರು ಬ್ಯಾಂಕ್ ದರೋಡೆಕೋರರನ್ನು ಹಿಡಿಯುವುದು ಒಂದೇ ದಿನ ತಡವಾಗಿದ್ದರೂ ಈ ಅನಾಹುತವಾಗ್ತಿತ್ತು

ಮಂಗಳೂರು: ಕೋಟೆಕಾರಿನ ಸಹಕಾರಿ ಬ್ಯಾಂಕ್ ನಲ್ಲಿ ನಡೆದಿದ್ದ ಬ್ಯಾಂಕ್ ದರೋಡೆಯ ಆರೋಪಿಗಳನ್ನು ಬಂಧಿಸುವಲ್ಲಿ ಒಂದೇ ದಿನ ತಡವಾಗಿದ್ದರೂ ಈ ಒಂದು ಅನಾಹುತ ನಡೆಯುತ್ತಿತ್ತು. ಅದೇನದು ಈ ವಿವರ ನೋಡಿ.

ಮಂಗಳೂರಿನ ಕೋಟೆಕಾರ್ ಸಹಕಾರಿ ಬ್ಯಾಂಕ್ ನಲ್ಲಿ ಜನವರಿ 17 ರಂದು ಹಾಡ ಹಗಲೇ ಐವರು ಮುಸುಕುಧಾರಿಗಳು ದರೋಡೆ ಮಾಡಿದ್ದು ಭಾರೀ ಸುದ್ದಿಯಾಗಿತ್ತು. ಘಟನೆಗೆ ಸಂಬಂಧಿಸಿದಂತೆ ಮೂರು ದಿನಗಳ ಬಳಿಕ ತಮಿಳುನಾಡಿನಲ್ಲಿ ಮೂವರನ್ನು ಪೊಲೀಸರು ಬಂಧಿಸಿದ್ದರು. ಅದಾದ ಬಳಿಕ ಉಳಿದ ಆರೋಪಿಗಳೂ ಸಿಕ್ಕಿಬಿದ್ದಿದ್ದರು.

ಅದೃಷ್ಟವಶಾತ್ ಆರೋಪಿಗಳು ಕದ್ದಿದ್ದ ಎಲ್ಲಾ ಮಾಲುಗಳೂ ಯಥಾ ಪ್ರಕಾರ ಸಿಕ್ಕಿದೆ. ಎಲ್ಲಾ ಆರೋಪಿಗಳಿಂದಲೂ ಕದ್ದ ಚಿನ್ನಾಭರಣಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಕಣ್ಣನ್ ನಿಂದ 2 ಕೆ.ಜಿಯಷ್ಟು ಚಿನ್ನಾಭರಣ ವಶಪಡಿಸಿಕೊಳ್ಳಲಾಗಿತ್ತು.

ಈ ಆರೋಪಿಗಳನ್ನು ಬಂಧಿಸುವುದು ಒಂದೇ ಒಂದು ದಿನ ತಡವಾಗಿದ್ದರೂ ಕದ್ದ ಮಾಲು ಅಕ್ರಮ ಮಾರುಕಟ್ಟೆ ಪಾಲಾಗುತ್ತಿತ್ತು ಎಂಬ ಆಘಾತಕಾರೀ ವಿಚಾರ ಬೆಳಕಿಗೆ ಬಂದಿದೆ. ಗುರುವಾರ ಎಲ್ಲಾ ಚಿನ್ನಾಭರಣಗಳನ್ನು ಮುಂಬೈಗೆ ರವಾನಿಸಲು ಆರೋಪಿಗಳು ಸಿದ್ಧತೆ ಮಾಡಿದ್ದರು. ಆದರೆ ಪೊಲೀಸರು ಅಷ್ಟರಲ್ಲಿ ಇವರಿಗೆ ಬಲೆ ಬೀಸಿದ್ದರಿಂದ ಸಂಚು ವಿಫಲವಾಗಿದೆ.