ಬೆಂಗಳೂರು: ನಿನ್ನೆ ವಿಶ್ವ ಯೋಗ ದಿನಾಚರಣೆ ನಿಮಿತ್ತ ರಾಜ್ಯ ನಾಯಕರೂ ಯೋಗ ಮಾಡಿ ಗಮನ ಸೆಳೆದಿದ್ದರು. ಸಿಎಂ ಸಿದ್ದರಾಮಯ್ಯ, ಡಿಸಿಎಂ ಡಿಕೆ ಶಿವಕುಮಾರ್, ಸಚಿವ ದಿನೇಶ್ ಗುಂಡೂರಾವ್ ಮುಂತಾದವರು ಆಯಾಯ ಕಾರ್ಯಕ್ರಮದಲ್ಲಿ ಯೋಗ ಮಾಡಿದ್ದಾರೆ.
ಆದರೆ ಯೋಗ ದಿನಾಚರಣೆ ದಿನ ಯೋಗ ಮಾಡಲು ಹೋಗಿ ಡಿಸಿಎಂ ಡಿಕೆ ಶಿವಕುಮಾರ್ ಟ್ರೋಲ್ ಗೊಳಗಾಗಿದ್ದಾರೆ. ನಿನ್ನೆ ವಿಧಾನಸೌಧದ ಮುಂಭಾಗ ನಡೆದ ಯೋಗ ದಿನಾಚರಣೆ ಕಾರ್ಯಕ್ರಮದಲ್ಲಿ ಸಚಿವ ದಿನೇಶ್ ಗುಂಡೂರಾವ್ ಜೊತೆ ಡಿಸಿಎಂ ಡಿಕೆ ಶಿವಕುಮಾರ್ ಕೂಡಾ ಯೋಗ ದಿನಾಚರಣೆಯಲ್ಲಿ ಪಾಲ್ಗೊಂಡಿದ್ದರು.
ಆದರೆ ವೃಕ್ಷಾಸನ ಭಂಗಿಯಲ್ಲಿ ನಿಂತುಕೊಳ್ಳಲು ಡಿಕೆ ಶಿವಕುಮಾರ್ ಮತ್ತು ದಿನೇಶ್ ಗುಂಡೂರಾವ್ ಸೇರಿದಂತೆ ಇತರೆ ಸಚಿವರು ತುಂಬಾನೇ ಕಷ್ಟಪಟ್ಟರು. ಕಾಲು ಮೇಲೆತ್ತಲಾಗದೇ ಪರದಾಡಿದರು. ಕೊನೆಗೆ ಕೈ ಚಾಚಿಕೊಂಡು ನಿಂತರು. ಸಚಿವ ದಿನೇಶ್ ಗುಂಡೂರಾವ್ ಸ್ಥಿತಿಯೂ ಇದೇ ಆಗಿತ್ತು.
ಇದನ್ನು ನೋಡಿದ ನೆಟ್ಟಿಗರು ಡಿಕೆಶಿ ಹಾಗೂ ಇತರರನ್ನು ಟ್ರೋಲ್ ಮಾಡಿದ್ದಾರೆ. ಯೋಗ ಮಾಡುವುದು ಅಷ್ಟು ಸುಲಭವಲ್ಲ ಸರ್. ಯೋಗ ಮಾಡಲೂ ಯೋಗ ಬೇಕು ಎಂದು ಕೆಲವರು ಕಾಲೆಳೆದಿದ್ದಾರೆ. ಇನ್ನು ಕೆಲವರು ಹೊಟ್ಟೆ ಕರಗಿಸಲೂ ಸಲಹೆ ನೀಡಿದ್ದಾರೆ.