ಇದು ಸುಳಿಗಾಳಿಯಲ್ಲಿ ಆಟ ಆಡುವ ಶ್ವಾನದ ದೃಶ್ಯ. ಸುಳಿಗಾಳಿಯನ್ನು ಕುತೂಹಲದಿಂದ ನೋಡುವ ಶ್ವಾನವೊಂದು ಪ್ರತಿಕ್ರಿಯಿಸಿದ ಪರಿ ಇದು. ಈ ದೃಶ್ಯ ಎಲ್ಲರಲ್ಲೂ ಮಂದಹಾಸ ಮೂಡಿಸದೇ ಇರದು. ಬೀಸುತ್ತಿದ್ದ ಭಾರೀ ಗಾಳಿಗೆ ಮಾರ್ಗದ ಮಧ್ಯದಲ್ಲಿ ಧೂಳಿನ ಸುಳಿ ಏಳುವ ದೃಶ್ಯದ ಮೂಲಕ 15 ಸೆಕೆಂಡಿನ ಈ ಕ್ಲಿಪ್ ಶುರುವಾಗುತ್ತದೆ. ಇದೇ ದಾರಿಯಲ್ಲಿ ಮಗುವೊಂದು ಸಾಗುತ್ತಿರುವ ದೃಶ್ಯ ಕೂಡಾ ಕಾಣಿಸುತ್ತದೆ. ಅಷ್ಟರಲ್ಲಿ ಅಲ್ಲಿಗೆ ಓಡಿ ಬರುವ ಶ್ವಾನ ಈ ಸುಳಿಯ ನಡುವೆಯೇ ಹೋಗಿ ನಿಂತುಕೊಳ್ಳುತ್ತದೆ. ಆಗ ಕೊಂಚ ತಗ್ಗುವ ಸುಳಿ ಮತ್ತೆ ಇನ್ನೊಂದು ಕಡೆಯಲ್ಲಿ ಸುರುಳಿ ಸುತ್ತಲು ಆರಂಭಿಸುತ್ತದೆ. ಆಗಲೂ ಈ ಸುಳಿಯ ಮೇಲೆ ಹೋಗಿ ನಿಂತು ಈ ಶ್ವಾನ ಖುಷಿಪಡುತ್ತದೆ. ಈ ಶ್ವಾನದ ಈ ಆಟದ ಕ್ಷಣ ಎಲ್ಲರಲ್ಲೂ ನಗುವರಳಿಸದೇ ಇರದು. ‘ಇಂದಿನ ಹೆಡ್‌ಲೈನ್ : ಸೂಪರ್‌ ಹೀರೋ ಸುಂಟರಗಾಳಿಯನ್ನು ನಾಶಪಡಿಸುತ್ತಾನೆ ಮತ್ತು ವಿಪತ್ತಿನಿಂದ ನಗರವನ್ನು ಉಳಿಸುತ್ತಾನೆ’ ಎಂಬ ತಮಾಷೆಯ ಕ್ಯಾಪ್ಶನ್‌ನೊಂದಿಗೆ ಈ ವಿಡಿಯೋವನ್ನು ಹಂಚಿಕೊಳ್ಳಲಾಗಿದೆ.