ಎಲ್ಲಿದ್ದೆ ಇಲ್ಲಿತನಕ: ಇದು ಸೃಜಾ ಕೆರಿಯರ್ನಲ್ಲೇ ಸ್ಪೆಷಲ್ ಸಿನಿಮಾ!

ಲೋಕೇಶ್ ಅವರು ನಟಿಸಿದ್ದ ಎಲ್ಲಿಂದಲೋ ಬಂದವರು ಚಿತ್ರದಲ್ಲಿ `ಎಲ್ಲಿದ್ದೆ ಇಲ್ಲಿತನಕ ಎಲ್ಲಿಂದ ಬಂದ್ಯವ್ವ’ ಎಂಬ ಹಾಡು ಕನ್ನಡ ಚಿತ್ರಪ್ರೇಮಿಗಳ ಮನಸಲ್ಲಿ ಎಂದಿಗೂ ಹಸಿರಾಗಿರುತ್ತದೆ. ಒಂದೂ ಮರೆಯದ ಎವರ್ಗ್ರೀನ್ ಹಾಡುಗಳಲ್ಲಿ ಅದೂ ಕೂಡಾ ಸ್ಥಾನ ಪಡೆದುಕೊಂಡಿದೆ.

ಇದೀಗ ಲೋಕೇಶ್ ಪುತ್ರ ಸೃಜನ್ ಲೋಕೇಶ್ ಆ ಪ್ರಸಿದ್ಧ ಹಾಡಿನ ಸಾಲನ್ನೇ ಶೀರ್ಷಿಕೆಯಾಗಿಸಿಕೊಂಡಿರೋ `ಎಲ್ಲಿದ್ದೆ ಇಲ್ಲಿತನಕ’ ಇದೇ ತಿಂಗಳ 11ರಂದು ಬಿಡುಗಡೆಗೆ ರೆಡಿಯಾಗಿದೆ. ಈ ಸಿನಿಮಾ ಇಂದು ಭಾರೀ ನಿರೀಕ್ಷೆ ಹುಟ್ಟಿಸಿರೋದಕ್ಕೆ ಹತ್ತಾರು ಕಾರಣಗಳಿವೆ.

ಮಜಾ ಟಾಕೀಸ್ ಶೋ ಮೂಲಕವೇ ಭಾರೀ ಪ್ರಸಿದ್ಧಿ ಪಡೆದುಕೊಂಡಿರುವವರು ಸೃಜನ್ ಲೋಕೇಶ್. ಕನ್ನಡದ ಮಟ್ಟಿಗೆ ಕಿರುತೆರೆ ಪ್ರೇಕ್ಷಕರಿಗೆ ಹೊಸಾ ಅನುಭವ ನೀಡಿದ, ವರ್ಷಾಂತರಗಳ ಕಾಲ ಮಸ್ತ್ ಮಜಾ ಕೊಟ್ಟ ಈ ಶೋನ ಕ್ರಿಯೇಟಿವ್ ಡೈರೆಕ್ಟರ್ ಆಗಿದ್ದವರು ತೇಜಸ್ವಿ. ಅವರೇ ಎಲ್ಲಿದ್ದೆ ಇಲ್ಲಿತನಕ ಚಿತ್ರದ ನಿರ್ದೇಶನವನ್ನೂ ಮಾಡಿದ್ದಾರೆ. ಹಲವಾರು ವರ್ಷಗಳ ಕಾಲ ಸೃಜನ್ ಒಡನಾಡಿಯಾಗಿದ್ದುಕೊಂಡು ಯಶಸ್ವೀ ಶೋಗಳನ್ನು ನಿರ್ದೇಶನ ಮಾಡಿರುವ ತೇಜಸ್ವೀ ಈ ಸಿನಿಮಾವನ್ನು ಸೃಜನ್ ಕೆರಿಯರ್ನಲ್ಲಿಯೇ ಸ್ಪೆಷಲ್ ಮೂವಿಯಾಗಿ ದಾಖಲಾಗುವಂತೆ ನಿದೇಶನ ಮಾಡಿದ್ದಾರಂತೆ. ಈಗಾಗಲೇ ಹಾಡುಗಳು ಮತ್ತು ಟ್ರೇಲರ್ ಮೂಲಕ ಅದರ ಸ್ಪಷ್ಟ ಸುಳಿವು ಜಾಹೀರಾಗಿದೆ. ಇದರೊಂದಿಗೇ ಎಲ್ಲಿದ್ದೆ ಇಲ್ಲಿತನಕ ಭರವಸೆಯ ಚಿತ್ರವಾಗಿಯೂ ಹೊರಹೊಮ್ಮಿದೆ.

ಇನ್ನುಳಿದಂತೆ ಮಜಾ ಟಾಕೀಸ್ನ ಯಶಸ್ವೀ ತಂಡವೇ ಈ ಸಿನಿಮಾ ರೂಪಿಸೋದರಲ್ಲಿಯೂ ಪ್ರಧಾನ ಪಾತ್ರ ವಹಿಸಿದೆ. ಈ ಮೂಲಕ ಮತ್ತೊಂದು ಪ್ರತಿಭಾವಂತರ ತಂಡ ಕಿರುತೆರೆಯಿಂದ ಹಿರಿತೆರೆಗೆ ಪಾದಾರ್ಪಣೆ ಮಾಡಿದಂತಾಗಿದೆ.

ಸೃಜನ್ ಲೋಕೇಶ್ ಅಟವರಿಗೆ ಸೂಟ್ ಆಗುವ, ಮನೋರಂಜನೆಯೇ ಪ್ರಧಾನವಾದರೂ ಎಲ್ಲ ಅಂಶಗಳನ್ನು ಒಳಗೊಂಡಿರುವ ಕಥೆಯೊಂದಿಗೆ ಈ ಸಿನಿಮಾ ಮೂಡಿ ಬಂದಿದೆ. ಲೋಕೇಶ್ ಪ್ರೊಡಕ್ಷನ್ಸ್ ಮೂಲಕವೇ ಅದ್ದೂರಿಯಾಗಿ ನಿರ್ಮಾಣಗೊಂಡಿರೋ ಈ ಚಿತ್ರ ಇದೇ ತಿಂಗಳ 11ರಂದು ಬಿಡುಗಡೆಯಾಗಲಿದೆ.