ಬೆಂಗಳೂರು: ವರನಟ, ಡಾ. ರಾಜ್ ಕುಮಾರ್ ಕಾಡುಗಳ್ಳ ವೀರಪ್ಪನ್ ಅಪಹರಿಸಿದ ಕರಾಳ ದಿನಕ್ಕೆ ಇಂದು 20 ವರ್ಷ ತುಂಬಿದೆ. ಡಾ. ರಾಜ್ ನಿವಾಸದಿಂದ ರಾತ್ರೋ ರಾತ್ರಿ ವೀರಪ್ಪನ್ ಅಪಹರಣ ಮಾಡಿದ್ದ.
ಈ ಘಟನೆ ರಾಜ್ಯಾದ್ಯಂತ ಭಾರೀ ಸಂಚಲನ ಮೂಡಿಸಿತ್ತು. ಅಭಿಮಾನಿಗಳು ತಲ್ಲಣಗೊಳ್ಳುವಂತೆ ಮಾಡಿತ್ತು. ಇದಾದ ಬಳಿಕ ಬರೋಬ್ಬರಿ 108 ದಿನಗಳ ಕಾಲ ಡಾ. ರಾಜ್ ವೀರಪ್ಪನ್ ವಶದಲ್ಲಿದ್ದರು. ಹಲವು ಸುತ್ತಿನ ಸಂಧಾನದ ಬಳಿಕ ಡಾ. ರಾಜ್ ರನ್ನು ಬಿಡುಗಡೆ ಮಾಡಿದ್ದ.
ಅಂದು ನಡೆದಿದ್ದೇನು?: ಜುಲೈ 30 ರ ರಾತ್ರಿ ಗಾಜನೂರಿನ ಮನೆಯಲ್ಲಿ ಡಾ. ರಾಜ್ ಊಟ ಮುಗಿಸಿ ಎಲೆ ಅಡಿಕೆ ಹಾಕುತ್ತಾ ಕೂತಿದ್ದಾಗ ವೀರಪ್ಪನ್ ತನ್ನ ಸಹಚರರೊಂದಿಗೆ ಬಂದು ದಾಳಿ ಮಾಡಿದ್ದ. ಡಾ. ರಾಜ್ ರ ಬೆನ್ನಿಗೆ ಬಂದೂಕು ಹಿಡಿದು ಕೈಗಳನ್ನು ಕಟ್ಟಿ ವಶಕ್ಕೆ ತೆಗೆದುಕೊಂಡಿದ್ದ. ಡಾ. ರಾಜ್ ಜತೆಗೆ ಮನೆಯಲ್ಲಿದ್ದ ಮೂವರನ್ನು ಅಪಹರಿಸಿದ್ದ.
ಆ ವೇಳೆ ಪಾರ್ವತಮ್ಮ ರಾಜಕುಮಾರ್ ಅವರನ್ನು ಬಿಟ್ಟುಬಿಡು ಎಂದು ಪರಿ ಪರಿಯಾಗಿ ಬೇಡಿಕೊಂಡರೂ ಬಿಡಲಿಲ್ಲ. ಕೊನೆಗೆ ಡಾ. ರಾಜ್ ವೀರಪ್ಪನ್ ಜತೆ ಹೊರಡಲೇಬೇಕಾಯಿತು. ಈ ಸುದ್ದಿ ರಾಜ್ಯಾದ್ಯಂತ ಸಂಚಲನ ಮೂಡಿಸಿತ್ತು. ಘಟನೆಯಾದ ತಕ್ಷಣ ಮಧ್ಯರಾತ್ರಿ ವೇಳೆ ಪಾರ್ವತಮ್ಮ ಚಾಮರಾಜನಗರಕ್ಕೆ ಬಂದು ಅಲ್ಲಿಂದ ಎಸ್ ಟಿಡಿ ಬೂತ್ ಮೂಲಕ ಮಕ್ಕಳಿಗೆ ಕರೆ ಮಾಡಿ ವಿಷಯ ತಿಳಿಸಿದ್ದರು.
