ಕ್ಯಾಪ್ಟನ್ ವಿಜಯ್ ಕಾಂತ್ ಪಾರ್ಥಿವ ಶರೀರದ ಮುಂದೆ ಗಳ ಗಳನೆ ಅತ್ತ ದಳಪತಿ ವಿಜಯ್

Photo Courtesy: Twitter

ಚೆನ್ನೈ: ನಿನ್ನೆ ನಿಧನರಾದ ತಮಿಳು ಸ್ಟಾರ್ ನಟ, ಡಿಎಂಡಿಕೆ ಪಕ್ಷದ ನಾಯಕ ಕ್ಯಾಪ್ಟನ್ ವಿಜಯ್ ಕಾಂತ್ ಪಾರ್ಥಿವ ಶರೀರವನ್ನು ಸಾರ್ವಜನಿಕ ದರ್ಶನಕ್ಕೆ ಇಡಲಾಗಿದೆ.

ನಿನ್ನೆಯಿಂದ ಹಲವಾರು ಗಣ್ಯರು ವಿಜಯ್ ಕಾಂತ್ ಅಂತಿಮ ದರ್ಶನ ಪಡೆಯುತ್ತಿದ್ದಾರೆ. ಇವರಲ್ಲಿ ದಳಪತಿ ವಿಜಯ್ ಕಡಾ ಒಬ್ಬರು. ವಿಜಯ್ ವೃತ್ತಿ ಜೀವನ ಬೆಳವಣಿಗೆಗೆ ವಿಜಯ್ ಕಾಂತ್ ಕೊಡುಗೆ ಅಪಾರ. ಹೀಗಾಗಿ ತಮ್ಮ ಮೆಚ್ಚಿನ ನಟನ ಅಂತಿಮ ದರ್ಶನ ಪಡೆಯಲು ವಿಜಯ್ ಕಣ್ಣೀರು ಹಾಕುತ್ತಲೇ ಬಂದಿದ್ದರು.

ಪಾರ್ಥಿವ ಶರೀರದ ದರ್ಶನ ಮಾಡುತ್ತಲೇ ಭಾವುಕರಾದ ವಿಜಯ್ ಗಳ ಗಳನೆ ಅತ್ತಿದ್ದಾರೆ. ಕೆಲ ಹೊತ್ತು ವಿಜಯ್ ಕಾಂತ್ ಪಾರ್ಥಿವ ಶರೀರದ ಮುಂದೆಯೇ ನಿಂತಿದ್ದ ವಿಜಯ್ ಬಳಿಕ ಕುಟುಂಬಸ್ಥರನ್ನು ಮಾತನಾಡಿಸಿ ಅಲ್ಲಿಂದ ತೆರಳಿದ್ದಾರೆ.

ಅಭಿಮಾನಿಗಳಿಂದ ಪ್ರೀತಿಯಿಂದ ಕ್ಯಾಪ್ಟನ್ ಎಂದೇ ಕರೆಯಿಸಿಕೊಳ್ಳುವ ವಿಜಯ್ ಕಾಂತ್ ಕೊರೋನಾ ಮತ್ತು ಅನಾರೋಗ್ಯದಿಂದಾಗಿ ಮೃತಪಟ್ಟಿದ್ದಾರೆ. ಸುಮಾರು 154 ಸಿನಿಮಾಗಳಲ್ಲಿ ಅಭಿನಯಿಸಿದ್ದಲ್ಲದೆ, ರಾಜಕೀಯದಲ್ಲೂ ವಿಪಕ್ಷ ನಾಯಕನಾಗಿ ಮಿಂಚಿದ ಹೆಗ್ಗಳಿಕೆ ಅವರದ್ದು.