ಚಿತ್ರಕಥಾ ಮೂಲಕ ಮತ್ತೆ ಬಂದರು ಸುಧಾರಾಣಿ!

ಯಶಸ್ವಿ ಬಾಲಾದಿತ್ಯ ನಿರ್ದೇಶನದ ಚಿತ್ರಕಥಾ ಈ ವಾರ ಬಿಡುಗಡೆಯಾಗಲಿದೆ. ಹೊಸಬರ ತಂಡ, ಹೊಸತನ ಹೊಂದಿರೋ ಕಥೆಯ ಹೊಳಹಿನೊಂದಿಗೇ ಈ ಚಿತ್ರ ಸೃಷ್ಟಿಸಿರೋ ಅಚ್ಚರಿದಾಯಕ ಕ್ರೇಜ್ ಬಲವಾಗಿಯೇ ಇದೆ. ಹೊಸಾ ತಂಡದಿಂದಲೇ ರೂಪಿಸಲ್ಪಟ್ಟಿರೋ ಈ ಚಿತ್ರ ಟ್ರೈಲರ್, ಪೋಸ್ಟರ್ ಸೇರಿದಂತೆ ಎಲ್ಲ ರೀತಿಯಲ್ಲಿಯೂ ಪ್ರೇಕ್ಷಕರಲ್ಲಿ ಭರವಸೆ ಹುಟ್ಟು ಹಾಕಿದೆ. ಇಂಥಾ ಅಗಾಧ ನಿರೀಕ್ಷೆಗಳೊಂದಿಗೆ ಈ ಚಿತ್ರ ಹನ್ನೆರಡನೇ ತಾರೀಕು ಅಂದರೆ ಇದೇ ವಾರ ತೆರೆಗಾಣುತ್ತಿದೆ.

ಚಿತ್ರಕಥಾ ಅನ್ನೋದು ಯಾವ ಜಾನರಿನ ಚಿತ್ರ ಎಂಬ ಬಗ್ಗೆ ಕಡೇಯ ಕ್ಷಣಗಳಲ್ಲಿ ವ್ಯಾಪಕ ಕುತೂಹಲ ಮಡುಗಟ್ಟಿದೆ. ಆದರೆ ಈ ವರೆಗೆ ಬಿಡುಗಡೆಯಾಗಿರೋ ಪೋಸ್ಟರುಗಳು, ಟ್ರೈಲರ್ನಲ್ಲಿ ಗೊಂದಲಕ್ಕೆ ತಳ್ಳುವಂಥಾ ನಡೆಯನ್ನೇ ಚಿತ್ರತಂಡ ಅನುಸರಿಸಿದೆ. ಅದರಲ್ಲಿ ಕೆಲವು ಕಲಾತ್ಮಕ ಗಂಧ ಹರಡಿದರೆ, ಮತ್ತೆ ಕೆಲವು ಪಕ್ಕಾ ಕಮರ್ಶಿಯಲ್ ಜಾಡಿನ ಸೂಚನೆ ಹೊರ ಹಾಕುವಂತಿವೆ.

ಕಲಾವಿದನೊಬ್ಬ ಬರೆದ ಚಿತ್ರವೊಂದರ ಸುತ್ತಾ ನಡೆಯೋ ಚಿತ್ರವಿಚಿತ್ರವಾದ ಘಟನಾವಳಿಗಳ ಸುತ್ತಾ ಸಸ್ಪೆನ್ಸ್ ಥ್ರಿಲ್ಲರ್ ಮಾದರಿಯಲ್ಲಿ ಈ ಕಥೆ ಸುತ್ತುತ್ತದೆ. ಈ ಘಟನಾವಳಿಗಳಿಂದ ಇಲ್ಲಿನ ಪಾತ್ರಗಳೇ ತಮ್ಮ ಸುತ್ತಾ ಏನಾಗುತ್ತಿದೆ ಎಂಬ ಗೊಂದಲದಿಂದ ಕಂಗಾಲಾಗಿ ನಿಲ್ಲುತ್ತವೆ. ಅಂಥಾ ಗೊಂದಲಗಳನ್ನೆಲ್ಲ ನಿವಾರಿಸಿ ಕಥೆಗೆ ಮತ್ತೊಂದು ದಿಕ್ಕು ತೋರುವ ಪಾತ್ರದಲ್ಲಿ ಹಿರಿಯ ನಟಿ ಸುಧಾರಾಣಿ ನಟಿಸಿದ್ದಾರೆ. ಅವರಿಲ್ಲಿ ಮನಶಾಸ್ತ್ರಜ್ಞೆಯಾಗಿ ಕಾಣಿಸಿಕೊಂಡಿದ್ದಾರೆ. ಅವರದ್ದು ಇಡೀ ಕಥೆಯ ಸೂತ್ರ ಹಿಡಿದಿರುವಂಥಾ ಪಾತ್ರ. ಇದೂ ಸೇರಿದಂತೆ ಒಟ್ಟಾರೆ ಚಿತ್ರದ ಮಜಾ ಏನೆಂಬುದು ಈ ವಾರವೇ ಜಾಹೀರಾಗಲಿದೆ.