ಅಂಬರೀಷ್ ಸ್ಮಾರಕಕ್ಕೆ ಭೂಮಿ ಪೂಜೆ: ಭಾವುಕರಾದ ಸುಮಲತಾ

ಬೆಂಗಳೂರು: ರೆಬಲ್ ಸ್ಟಾರ್ ಅಂಬರೀಷ್ ಅವರ ಸ್ಮಾರಕ ನಿರ್ಮಾಣಕ್ಕೆ ಇಂದು ಸಿಎಂ ಬಸವರಾಜ ಬೊಮ್ಮಾಯಿ ಭೂಮಿ ಪೂಜೆ ನೆರವೇರಿಸಿದ್ದಾರೆ.

ಅವರ ಸಮಾಧಿ ಜಾಗದಲ್ಲಿ ಸ್ಮಾರಕ ನಿರ್ಮಾಣವಾಗಬೇಕೆಂಬುದು ಅವರ ಕುಟುಂಬದವರು, ಅಭಿಮಾನಿಗಳ ಕನಸಾಗಿತ್ತು. ಅದರಂತೆ ಇಂದು ಭೂಮಿ ಪೂಜೆ ಮಾಡಲಾಗಿದೆ.

ಈ ವೇಳೆ ಮಾತನಾಡಿರುವ ಸುಮಲತಾ ಅಂಬರೀಷ್ ‘ಚಿತ್ರರಂಗದ ಕಷ್ಟ ಎಂದರೆ ಮುಂದೆ ನಿಲ್ಲುತ್ತಿದ್ದವರು ಅಂಬರೀಷ್. ಈ ಮಾತನ್ನು ನಾನು ಅವರ ಪತ್ನಿಯಾಗಿ ಅಲ್ಲ, ಅಭಿಮಾನಿಯಾಗಿ ಹೇಳುತ್ತಿದ್ದೇನೆ. 200 ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಟಿಸಿದರೂ 50% ಮಾತ್ರ ಸಂಭಾವನೆ ಪಡೆದಿದ್ದಾರೆ. ಎಷ್ಟೋ ನಿರ್ಮಾಪಕರು ಕಷ್ಟ ಎಂದು ಬಂದಾಗ ಸಂಭಾವನೆ ತೆಗೆದುಕೊಳ್ಳದೇ ಸಿನಿಮಾ ಮಾಡಿಕೊಟ್ಟಿದ್ದಾರೆ. ಕಾವೇರಿ ನೀರಿನ ಸಮಸ್ಯೆ ಬಂದಾಗ ರಾಜ್ಯದ ಜನರ ಪರವಾಗಿ ನಿಂತು ಕೇಂದ್ರ ಸಚಿವ ಸ್ಥಾನಕ್ಕೆ ರಾಜೀನಾಮೆ ಕೊಟ್ಟವರು’ ಎಂದು ಭಾವುಕರಾಗಿ ನೆನೆಸಿಕೊಂಡಿದ್ದಾರೆ.