ಕೊಚ್ಚಿ: ಮಲಯಾಳಂ ಸೂಪರ್ ಸ್ಟಾರ್ ಮಮ್ಮುಟ್ಟಿ ಸೈಕೋಪಾತ್ ಆಗಿ ಬದಲಾಗಲಿದ್ದಾರೆ. ಇದುವರೆಗೂ ವೈವಿದ್ಯಮಯ ಪಾತ್ರ ಮಾಡುತ್ತಾ ಬಂದಿದ್ದ ಮಮ್ಮುಟ್ಟಿ ಈಗ ಮುಂಬರುವ ಸಿನಿಮಾದಲ್ಲಿ ಸೈಕೋಪಾತ್ (ಮನೋರೋಗಿ) ಆಗಿ ಕಾಣಿಸಿಕೊಳ್ಳಲಿದ್ದಾರೆ.
ಈ ಹಿಂದೆ ಮಮ್ಮುಟ್ಟಿಕಂಪನಿ ನಿರ್ಮಾಣದಲ್ಲಿ ದುಲ್ಕರ್ ಸಲ್ಮಾನ್ ಗೆ ಕುರುಪ್ ಸಿನಿಮಾ ಕತೆ ಬರೆದಿದ್ದ ಜಿತಿನ್ ಕೆ ಜೋಸ್ ಚೊಚ್ಚಲ ನಿರ್ದೇಶನದಲ್ಲಿ ಈ ಸಿನಿಮಾ ಮೂಡಿಬರಲಿದೆ ಎನ್ನಲಾಗಿದೆ. ಇತ್ತೀಚೆಗಷ್ಟೇ ಸಹ ನಟ ವಿನಾಯಕನ್ ಜೊತೆಗೆ ಮಮ್ಮುಟ್ಟಿ ಫೇಸ್ ಬುಕ್ ನಲ್ಲಿ ಫೋಟೋವೊಂದನ್ನು ಪೋಸ್ಟ್ ಮಾಡಿದ್ದರು.
ಹೀಗಾಗಿ ಈ ಸಿನಿಮಾ ಶೂಟಿಂಗ್ ಕೂಡಾ ಆರಂಭವಾಗಿರುವುದು ಪಕ್ಕಾ ಆಗಿದೆ. ಆದರೆ ಸಿನಿಮಾ ಬಗ್ಗೆ ಇನ್ನೂ ಚಿತ್ರತಂಡ ಅಧಿಕೃತ ಘೋಷಣೆ ಮಾಡಿಲ್ಲ. ಇತ್ತೀಚೆಗೆ ಮಮ್ಮುಟ್ಟಿ ವೈವಿದ್ಯಮಯ ಕಥಾಪಾತ್ರದ ಮೂಲಕ ವೀಕ್ಷಕರ ಮೆಚ್ಚುಗೆಗೆ ಪಡೆಯುತ್ತಿದ್ದಾರೆ. ಅದರಲ್ಲೂ ನೆಗೆಟಿವ್ ಶೇಡ್ ಇರುವ ಪಾತ್ರಗಳನ್ನೂ ಜನ ಇಷ್ಟಪಡುತ್ತಿದ್ದಾರೆ.
ಈ ಸಿನಿಮಾದಲ್ಲೂ ಅಂತಹದ್ದೇ ಕತೆಯಿದೆ ಎನ್ನಲಾಗಿದೆ. ಇತ್ತೀಚೆಗೆ ಬಂದ ಅವರ ಭ್ರಮಯುಗಂ, ಪುಳು, ರೋಷಾಚ್ ಎನ್ನುವ ಸಿನಿಮಾಗಳ ಕತೆ ಒಂದಕ್ಕಿಂತ ಒಂದು ಭಿನ್ನವಾಗಿತ್ತು. ಇದೂ ಕೂಡಾ ಅಂತಹದ್ದೇ ವ್ಯತ್ಯಸ್ಥ ಕತೆ ಹೊಂದಿದ್ದು ಜಿಷ್ಣು ಶ್ರೀ ಕುಮಾರ್ ಚಿತ್ರಕತೆ ಬರೆದಿದ್ದಾರೆ.
ಮಮ್ಮುಟ್ಟಿ ಕಂಪನಿಯಿಂದ ನಿರ್ಮಾಣವಾಗುತ್ತಿರುವ 7 ನೇ ಸಿನಿಮಾ ಇದಾಗಿರಲಿದೆ. ಈ ಸಿನಿಮಾವನ್ನು ದುಲ್ಕರ್ ಸಲ್ಮಾನ್ ಅವರೇ ವಿತರಿಸಲಿದ್ದಾರೆ. ಸಿನಿಮಾ ಬಗ್ಗೆ ಹೆಚ್ಚಿನ ಮಾಹಿತಿ ಇನ್ನಷ್ಟೇ ಬರಬೇಕಿದೆ.
