ಬಿಡುಗಡೆಗೂ ಮೊದಲೇ ಅಂತಾರಾಷ್ಟ್ರೀಯ ಪ್ರಶಸ್ತಿ ಬಾಚಿಕೊಂಡ ‘ಜೀವ್ನಾನೇ ನಾಟ್ಕ ಸಾಮಿ’ ಸಿನಿಮಾ

ಬೆಂಗಳೂರು: ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ ಕನ್ನಡತಿ ಧಾರವಾಹಿಯ ಸ್ಪುರದ್ರೂಪಿ ನಟ ಕಿರಣ್ ರಾಜ್ ಮತ್ತು ಜೀ ಕನ್ನಡದ ಸರಿಗಮಪ ರಿಯಾಲಿಟಿ ಶೋ ಖ್ಯಾತಿಯ ಶ್ರೀಹರ್ಷ ಪ್ರಮುಖ ಪಾತ್ರದಲ್ಲಿ ನಟಿಸಿರುವ ಸಿನಿಮಾ ‘ಜೀವ್ನಾನೇ ನಾಟಕ ಸಾಮಿ’ ಈಗ ಸುದ್ದಿ ಮಾಡಿದೆ.

ರಾಜು ಭಂಡಾರಿ ರಾಜಾವರ್ತ ನಿರ್ದೇಶನದ ಈ ಸಿನಿಮಾ ಲಲಿತಾ ರಾಜಶೇಖರ್ ಮತ್ತು ಅಶ್ವಿನಿ ಆನಂದ ಕುಮಾರ್ ನಿರ್ಮಾಣದಲ್ಲಿ ಮೂಡಿಬಂದಿದೆ. ಈ ಸಿನಿಮಾ ಈಗ ಕೋಲ್ಕೊತ್ತಾ, ಲಂಡನ್ ಮತ್ತು ಅಮೆರಿಕಾದಲ್ಲಿ ನಡೆದ ಆನ್ ಲೈನ್ ಫಿಲಂ ಫೆಸ್ಟಿವಲ್ ಗಳಲ್ಲಿ ಪ್ರಶಸ್ತಿಗೆ ಭಾಜನವಾಗಿದೆ. ಕೋಲ್ಕತ್ತಾದಲ್ಲಿ ನಡೆದ ಕಲ್ಟ್ ಕ್ರಿಟಿಕ್ ಇಂಟರ್ನ್ಯಾಷನಲ್ ಫಿಲಂ ಫೆಸ್ಟಿವಲ್ ಸೆಷನ್ ನಲ್ಲಿ ಅತ್ಯುತ್ತಮ ಸಾಧನೆ ಪ್ರಶಸ್ತಿ, ಲಂಡನ್ ನಲ್ಲಿ ನಡೆದ ಲಿಫ್ಟ್ ಆಫ್ ಆನ್ ಲೈನ್ ಇಂಟರ್ನ್ಯಾಷನಲ್ ಫಿಲಂ ಫೆಸ್ಟಿವಲ್ ಸೆಷನ್ ನಲ್ಲಿ ಫೈನಲಿಸ್ಟ್ ಮತ್ತು ಅಮೆರಿಕಾದಲ್ಲಿ ನಡೆದ ಮಿಯಾಮಿ ಇಂಟರ್ನ್ಯಾಷನಲ್ ಆನ್ ಲೈನ್ ಫಿಲಂ ಫೆಸ್ಟಿವಲ್ ಸೆಷನ್ ನಲ್ಲಿ ಆಯ್ಕೆಗೊಂಡು ಪ್ರದರ್ಶನ ಗೊಂಡಿದೆ.

ಸಾಮಾಜಿಕ, ಮನರಂಜನೆಯ ಕಥಾವಸ್ತುವನ್ನೊಳಗೊಂಡ ಈ ಸಿನಿಮಾ ಜನವರಿಯಲ್ಲಿ ಬಿಡುಗಡೆಯಾಗಲಿದೆ. ಆದರೆ ಬಿಡುಗಡೆಗೂ ಮೊದಲೇ ಅಂತಾರಾಷ್ಟ್ರೀಯ ಮಟ್ಟದ ಚಿತ್ರೋತ್ಸವಗಳಲ್ಲಿ ಪ್ರದರ್ಶನಗೊಂಡಿರುವುದಲ್ಲದೆ, ಪ್ರಶಸ್ತಿ ಪಡೆಯುವ ಮೂಲಕ ಸದ್ದು ಮಾಡಿದೆ.