ಬೆಂಗಳೂರು: ಮೊನ್ನೆಯಷ್ಟೇ ನಟಿ ವೈಷ್ಣವಿ ಗೌಡ ವಿರಾಜ್ ಸಿನಿಮಾ ನಾಯಕ ವಿದ್ಯಾಭರಣ್ ಜೊತೆ ವಿವಾಹ ನಿಶ್ಚಿತಾರ್ಥ ಮಾಡಿಕೊಂಡಿದ್ದಾರೆ ಎಂದು ಸುದ್ದಿಯಾಗಿತ್ತು. ಇದರ ಬೆನ್ನಲ್ಲೇ ವೈಷ್ಣವಿ ಇದು ನಿಶ್ಚಿತಾರ್ಥವಲ್ಲ. ನಾನಿನ್ನೂ ಮದುವೆಗೆ ಒಪ್ಪಿಕೊಂಡಿಲ್ಲ ಎಂದು ಸ್ಪಷ್ಟನೆ ನೀಡಿದ್ದರು.
ಇದರ ಬೆನ್ನಲ್ಲೇ ಈಗ ವೈಷ್ಣವಿ ಮದುವೆಯಾಗಲಿದ್ದಾರೆ ಎನ್ನಲಾಗಿದ್ದ ವರ ವಿದ್ಯಾಭರಣ್ ಬಗ್ಗೆ ಕೆಲವು ಯುವತಿಯರು ವಂಚನೆಯ ಆರೋಪ ಮಾಡಿದ್ದಾರೆ. ಈ ಯುವತಿಯರು ವಿದ್ಯಾಭರಣ್ ಮಾಡಿರುವ ವಂಚನೆ ಬಗ್ಗೆ ಫೋನ್ ಮೂಲಕ ಮಾತನಾಡಿರುವ ಅಡಿಯೋ ಈಗ ವೈರಲ್ ಆಗಿದೆ.
ವಿದ್ಯಾಭರಣ್ ಈಗಾಗಲೇ ಹಲವು ಯುವತಿಯರೊಂದಿಗೆ ಡೇಟಿಂಗ್ ಎಂದು ಸುತ್ತಾಡಿ ಕೈಕೊಟ್ಟಿದ್ದಾನೆ. ಆತ ಮತ್ತು ಆತನ ಕುಟುಂಬದವರೂ ಇದರಲ್ಲಿ ಶಾಮೀಲಾಗಿದ್ದಾರೆ. ನಟಿಸಿದ್ದು ಕೇವಲ ಒಂದು ಸಿನಿಮಾದಲ್ಲಿ. ಯುವತಿಯರಿಗೆ ತನ್ನ ಬಳಿ ಆಡಿ ಕಾರಿದೆ, ಬ್ಯುಸಿನೆಸ್ ಇದೆ ಎಂದು ಬಲೆಗೆ ಬೀಳಿಸಿ ಮೋಸ ಮಾಡುತ್ತಿದ್ದ ಎಂದು ಅಡಿಯೋದಲ್ಲಿ ಆರೋಪಿಸಲಾಗಿದೆ.
ಇದರ ಬೆನ್ನಲ್ಲೇ ಪ್ರತಿಕ್ರಿಯಿಸಿರುವ ವಿದ್ಯಾಭರಣ್, ನನಗೆ ಮತ್ತು ವೈಷ್ಣವಿಗೆ ಇನ್ನೂ ನಿಶ್ಚಿತಾರ್ಥವಾಗಿಲ್ಲ. ಅವರು ಒಪ್ಪಿಕೊಂಡ ಮೇಲಷ್ಟೇ ಮುಂದಿನ ಮಾತು ಎಂದಿದ್ದಾರೆ.
