ಆತ್ಮಹತ್ಯೆಗೆ ನಿರ್ದೇಶಕ ಗುರುಪ್ರಸಾದ್ ನಡೆಸಿದ್ದರು ವ್ಯವಸ್ಥಿತ ತಯಾರಿ: ಎಲ್ಲವೂ ಈಗ ಬಹಿರಂಗ

ಬೆಂಗಳೂರು: ಸ್ಯಾಂಡಲ್ ವುಡ್ ನಿರ್ದೇಶಕ ಗುರುಪ್ರಸಾದ್ ಇತ್ತೀಚೆಗೆ ನೇಣಿಗೆ ಶರಣಾಗಿದ್ದರು. ಇದಕ್ಕಾಗಿ ಅವರು ಮೊದಲೇ ಮಾಡಿಕೊಂಡಿದ್ದ ತಯಾರಿ ಈಗ ಬಯಲಾಗಿದೆ.

ತಮ್ಮ ಅಪಾರ್ಟ್ ಮೆಂಟ್ ನಲ್ಲಿ ಏಕಾಂಗಿಯಾಗಿ ವಾಸವಿದ್ದ ಗುರುಪ್ರಸಾದ್ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದರು. ಎರಡು ದಿನಗಳ ನಂತರ ಅವರ ಶವ ಕೊಳೆತ ವಾಸನೆ ಬರುತ್ತಿದ್ದರಿಂದ ಅನುಮಾನಗೊಂಡು ಅಕ್ಕಪಕ್ಕದ ಮನೆಯವರು ಪೊಲೀಸರಿಗೆ ತಿಳಿಸಿದ್ದರು. ಅದರಂತೆ ಪೊಲೀಸರು ಬಂದು ನೋಡಿದಾಗ ಕೊಳೆತ ಸ್ಥಿತಿಯಲ್ಲಿ ಮೃತದೇಹ ಪತ್ತೆಯಾಗಿತ್ತು.

ವಿಪರೀತ ಸಾಲ ಮಾಡಿಕೊಂಡಿದ್ದ ಕಾರಣಕ್ಕೇ ಗುರುಪ್ರಸಾದ್ ಆತ್ಮಹತ್ಯೆ ಮಾಡಿಕೊಂಡಿರಬಹುದು ಎಂದು ಪೊಲೀಸರು ಅನುಮಾನಿಸಿದ್ದಾರೆ. ಅವರ ಪತ್ನಿಯೂ ಇದೇ ಹೇಳಿಕೆ ನೀಡಿದ್ದರು. ಹೀಗಾಗಿ ಈಗ ಸಾಲ ಮಾಡಿಕೊಂಡಿದ್ದವರ ಮಾಹಿತಿ ಪಡೆದು ಪೊಲೀಸರು ವಿಚಾರಣೆ ನಡೆಸಲು ಸಿದ್ಧತೆ ನಡೆಸಿದ್ದಾರೆ.

ಈ ನಡುವೆ ಅವರು ಆತ್ಮಹತ್ಯೆಗೆ ಮೊದಲೇ ತಯಾರಿ ಮಾಡಿಕೊಂಡಿದ್ದರು ಎಂಬುದು ಪತ್ತೆಯಾಗಿದೆ. ಇದಕ್ಕಾಗಿ ನೈಲನ್ ಹಗ್ಗ ಮತ್ತು ಕರ್ಟನ್ ಗಳನ್ನು ಮೊದಲೇ ಖರೀದಿ ಮಾಡಿ ತಂಡಿದ್ದರು. ಮೊದಲು ಕಿಟಿಕಿಯಿಂದ ಯಾರೂ ನೋಡದಂತೆ ಕಿಟಿಕಿಗಳಿಗೆ ಕರ್ಟನ್ ಹಾಕಿ ಮುಚ್ಚಿದ್ದರು. ಬಳಿಕ ದಿವಾನ್ ಕಾಟ್ ಮೇಲೆ ನಿಂತು ಹಗ್ಗ ಬಿಗಿದುಕೊಂಡು ಜಿಗಿದಿದ್ದಾರೆ. ಅಕ್ಟೋಬರ್ 29 ರಂದು ಅವರನ್ನು ಕೊನೆಯ ಬಾರಿ ನೋಡಿದವರಿದ್ದಾರೆ. ಹೀಗಾಗಿ ಅದೇ ದಿನ ರಾತ್ರಿ ಅವರು ಆತ್ಮಹತ್ಯೆ ಮಾಡಿಕೊಂಡಿರಬಹುದು ಎಂದು ಶಂಕಿಸಲಾಗಿದೆ.