ರಾಯ್ಪುರ: ಸೆಲೆಬ್ರಿಟಿ ಕ್ರಿಕೆಟ್ ಲೀಗ್ ಗೆ ಇಂದಿನಿಂದ ಚಾಲನೆ ಸಿಗುತ್ತಿದ್ದು, ಇಂದು ಕರ್ನಾಟಕ ಬುಲ್ಡೋಜರ್ಸ್ ಮತ್ತು ಬೆಂಗಾಳ್ ಟೈಗರ್ಸ್ ನಡುವೆ ಪಂದ್ಯ ನಡೆಯಲಿದೆ.
ರಾಯ್ಪುರದಲ್ಲಿ ಇಂದಿನ ಪಂದ್ಯ ನಡೆಯಲಿದ್ದು, ಕಿಚ್ಚ ಸುದೀಪ್ ನೇತೃತ್ವದ ಕರ್ನಾಟಕ ಬುಲ್ಡೋಜರ್ಸ್ ಗೆ ಜಿಶು ಸೇನ್ ಗುಪ್ತಾ ನೇತೃತ್ವದ ಬೆಂಗಾಳ್ ಟೈಗರ್ಸ್ ಎದುರಾಳಿಯಾಗಿದೆ.
ವಿವಿಧ ಸಿನಿಮಾ ರಂಗದ ಒಟ್ಟು 8 ತಂಡಗಳು ಸೆಲೆಬ್ರಿಟಿ ಕ್ರಿಕೆಟ್ ನ ಭಾಗವಾಗಿದೆ. ಕರ್ನಾಟಕ ಬುಲ್ಡೋಜರ್ಸ್ ಆಡುವ ಪಂದ್ಯಗಳ ನೇರಪ್ರಸಾರವನ್ನು ಜೀ ಪಿಚ್ಚರ್ಸ್ ಮತ್ತು ಜೀ ಬಂಗಾಲ್ ವಾಹಿನಿಯಲ್ಲಿ ವೀಕ್ಷಿಸಬಹುದು. ಎಲ್ಲಾ ತಂಡಗಳ ಪಂದ್ಯಗಳ ನೇರಪ್ರಸಾರವಾಗಿದ್ದು ಒಟ್ಟು 9 ವಾಹಿನಿಗಳಲ್ಲಿ ನೇರಪ್ರಸಾರವಿರಲಿದೆ.
ಕರ್ನಾಟಕ ತಂಡದಲ್ಲಿ ಕಿಚ್ಚ ಸುದೀಪ್, ಪ್ರದೀಪ್, ಜಯರಾಮ್ ಕಾರ್ತಿಕ್, ಚಂದನ್ ಕುಮಾರ್, ರಾಜೀವ್ ಸೇರಿದಂತೆ ಘಟಾನುಘಟಿಗಳಿದ್ದಾರೆ. ಕರ್ನಾಟಕ ಬುಲ್ಡೋಜರ್ಸ್ ಇದಕ್ಕೆ ಮೊದಲು ಎರಡು ಬಾರಿ ಸಿಸಿಎಲ್ ಚಾಂಪಿಯನ್ ಆಗಿತ್ತು. ಇಂದಿನ ಪಂದ್ಯ 2.30 ಕ್ಕೆ ಆರಂಭವಾಗಲಿದೆ.
