ಅವನೇ ಶ್ರೀಮನ್ನಾರಾಯಣನ ಕೌಂಟ್ ಡೌನ್ ಟ್ರೆಂಡ್!

ಅಖಂಡ ಎರಡ್ಮೂರು ವರ್ಷಗಳ ನಿರಂತರ ಪರಿಶ್ರಮ ಮತ್ತು ಅಷ್ಟೇ ಕಾಲದಿಂದ ಪ್ರೇಕ್ಷಕ ವರ್ಗದಲ್ಲಿ ಮನೆ ಮಾಡಿಕೊಂಡಿರುವ ಕಾತರಗಳೆಲ್ಲ ಸಾಕಾರಗೊಳ್ಳುವ ಕ್ಷಣಗಳು ಹತ್ತಿರಾಗುತ್ತಿವೆ. ಈ ವಾರವೇ ಬಹು ನಿರೀಕ್ಷಿತ ಅವನೇ ಶ್ರೀಮನ್ನಾರಾಯಣ ಚಿತ್ರ ತೆರೆಗಾಣುತ್ತಿದೆ.

ರಕ್ಷಿತ್ ಶೆಟ್ಟಿ ಕಿರಿಕ್ ಪಾರ್ಟಿ ನಂತರ ಈ ಸಿನಿಮಾ ಮೂಲಕ ಮತ್ತೆ ಪ್ರೇಕ್ಷಕರ ಮುಂದೆ ಬರುತ್ತಿದ್ದಾರೆ. ಕೆಜಿಎಫ್ ನಂತರದಲ್ಲಿ ಪ್ಯಾನಿಂಡಿಯಾ ಲೆವೆಲ್ಲನಲ್ಲೊಂದು ದಾಖಲೆ ಸೃಷ್ಟಿಸುತ್ತದೆಂಬಂಥಾ ಗಾಢ ನಂಬಿಕೆಗೆ ಕಾರಣವಾಗಿರುವ ಈ ಚಿತ್ರ ತೆರೆಗಾಣುವ ಕ್ಷಣದ ಕೌಂಟ್ಡೌನ್ ಟ್ರೆಂಡ್ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಚಾಲ್ತಿಯಲ್ಲಿದೆ.

ಪುಷ್ಕರ್ ಮಲ್ಲಿಕಾರ್ಜುನಯ್ಯ ಅವನೇ ಶ್ರೀಮನ್ನಾರಾಯಣ ಚಿತ್ರದ ಪ್ರಚಾರಕ್ಕೆ ಅನುಸರಿಸುತ್ತಿರುವ ಹೊಸತನದ ಮಾರ್ಗಗಳೇ ಇದೀಗ ಎಲ್ಲೆಡೆ ವ್ಯಾಪಕ ಮೆಚ್ಚುಗೆಗೆ ಪಾತ್ರವಾಗಿವೆ. ಇದೇ ಹೊತ್ತಿನಲ್ಲಿ ಸಾಮಾಜಿಕ ಜಾಲತಾಣಗಳಲ್ಲಿಯೂ ಶ್ರೀಮನ್ನಾರಾಯಣನ ಆಗಮನದ ಖುಷಿಯನ್ನು ಸಂಭ್ರಮಿಸಲಾಗುತ್ತಿದೆ. ಈ ಸಿನಿಮಾ ಬಗ್ಗೆ ತಮ್ಮದೇ ಆದ ನಿರೀಕ್ಷೆ ಮತ್ತು ಅದು ಮೂಡಿ ಬಂದಿರಬಹುದಾದ ರೀತಿಯ ಬಗ್ಗೆ ಕುತೂಹಲಕರ ಅಂಶಗಳನ್ನು ಹಂಚಿಕೊಳ್ಳುತ್ತಲೇ ಬಿಡುಗಡೆಯ ಕ್ಷಣಗಳನ್ನು ಎಂಜಾಯ್ ಮಾಡಲಾಗುತ್ತಿದೆ. ಇದು ಎಲ್ಲ ಪ್ರಚಾರಗಳನ್ನೂ ಮೀರಿದ ಮೈಲೇಜನ್ನು ಶ್ರೀಮನ್ನಾರಾಯಣನಿಗೆ ತಂದು ಕೊಡುತ್ತಿರೋದು ಸುಳ್ಳಲ್ಲ.

ಪ್ರಚಾರದ ವಿಚಾರದಲ್ಲಿ ಹೊಸಾ ದಿಕ್ಕಿನತ್ತ ಮುಖ ಮಾಡಿರುವ ಪುಷ್ಕರ್ ಮಲ್ಲಿಕಾರ್ಜುನಯ್ಯ ಅವನೇ ಶ್ರೀಮನ್ನಾರಾಯಣ ಚಿತ್ರದ ಬೃಹತ್ ಕಟೌಟ್ ಮುಂದೆ ನಿಂತು ಎನ್ನು ಎಪ್ಪತ್ತೆರಡು ಗಂಟೆಗಳು ಮಾತ್ರ ಬಾಕಿ ಅಂತ ಸಾಮಾಜಿಕ ಜಾಲತಾಣಗಳಲ್ಲಿ ಬರೆದುಕೊಂಡಿದ್ದರು. ಇದಕ್ಕೆ ಬಂದಿರೋ ಪ್ರತಿಕ್ರಿಯೆಗಳಲ್ಲಿಯೇ ಅವನೇ ಶ್ರೀಮನ್ನಾರಾಯಣ ಚಿತರ್ರದ ಬಗ್ಗೆ ಎಂಥಾ ಕ್ರೇಜ್ ಎಲ್ಲೆಡೆ ಹರಡಿಕೊಂಡಿದೆ ಎಂಬುದರ ಚಿತ್ರಣವನ್ನು ನೀಡಿದೆ. ಇದೀಗ ಬಹುತೇಕರು ಗಂಟೆಗಳನ್ನು ಲೆಕ್ಕ ಹಾಕುತ್ತಾ ಶ್ರೀಮನ್ನಾರಾಯಣನನ್ನು ಜಪಿಸಲಾರಂಭಿಸಿದ್ದಾರೆ.