ಚಿತ್ರಕಥಾ: ಚಿತ್ರದಿಂದೆದ್ದು ಕೊಲ್ಲಲು ಹವಣಿಸೋ ಅಘೋರಿ!

ವಿಶಿಷ್ಟವಾದ ಕಥೆಯನ್ನು ಹೊಂದಿರುವ ಚಿತ್ರಕಥಾ ಚಿತ್ರ ಈ ವಾರ ತೆರೆ ಕಾಣಲು ಸಜ್ಜುಗೊಂಡಿದೆ. ಯಶಸ್ವಿ ಬಾಲಾದಿತ್ಯ ನಿರ್ದೇಶನದ ಈ ಚೊಚ್ಚಲ ಚಿತ್ರದ ಮೂಲಕವೇ ಸುಜಿತ್ ರಾಥೋಡ್ ನಾಯಕನಾಗಿಯೂ ಎಂಟ್ರಿ ಕೊಡುತ್ತಿದ್ದಾರೆ. ಆರಂಭ ಕಾಲದಿಂದಲೂ ಪೋಸ್ಟರ್ಗಳ ಮೂಲಕವೇ ಜನರನ್ನು ಸೆಳೆಯುತ್ತಾ ಬಂದಿರೋ ಚಿತ್ರವಿದು. ಆ ನಂತರ ರೋರಿಂಗ್ ಸ್ಟಾರ್ ಬಿಡುಗಡೆಗೊಳಿಸಿದ್ದ ಟ್ರೈಲರ್ನಿಂದ ಚಿತ್ರಕಥಾ ಮತ್ತಷ್ಟು ರಂಗು ಪಡೆದುಕೊಂಡಿತ್ತು.

ಹೀಗೆ ಪ್ರತೀ ಹಂತದಲ್ಲಿಯೂ ಗಾಢ ಕುತೂಹಲವನ್ನು ಹರಡುತ್ತಾ ಸಾಗಿ ಬಂದಿರೋ ಚಿತ್ರಕಥಾ ಸಸ್ಪೆನ್ಸ್ ಥ್ರಿಲ್ಲರ್ ಜಾನರಿನ ಚಿತ್ರ. ಆದರೆ ಇದು ಆ ಜಾನರಿನಲ್ಲಿಯೇ ವಿಶೇಷವಾದ ಚಿತ್ರವೂ ಹೌದು. ಅದರಲ್ಲಿಯೂ ಈ ಸಿನಿಮಾದ ಕಥೆಯೇ ಸೊಗಸಾಗಿರೋ ಸುಳಿವನ್ನು ಚಿತ್ರತಂಡ ಬಿಟ್ಟು ಕೊಡುತ್ತದೆ. ಈ ಸಿನಿಮಾ ನಾಯಕ ಹರಸಾಹಸ ಪಟ್ಟು ಗುರಿಯ ನೇರದಲ್ಲಿರುವಾಗಲೇ ಅಪರಿಚಿತ ಕಲಾವಿದ ಬಿಡಿಸಿದ ಚಿತ್ರವೊಂದು ಕಣ್ಣಿಗೆ ಬೀಳುತ್ತೆ. ಆ ಚಿತ್ರ ಅಂತಿಮ ರೂಪ ಪಡೆಯುತ್ತಲೇ ಅಲ್ಲೊಂದು ಅಘೋರಿಯ ಚಿತ್ರ ಜೀವ ಪಡೆದಿರುತ್ತೆ.

ಹಾಗೆ ನಾಯಕ ಕ್ಯಾನ್ವಾಸಿನ ಮೇಲೆ ಚಿತ್ರವಾಗಿ ನೋಡಿದ್ದ ಅದೇ ಅಘೋರಿ ಅದೊಂದು ದಿನ ಎದುರಿಗೆ ಪ್ರತ್ಯಕ್ಷನಾಗಿ ಕೊಲ್ಲಲು ಹವಣಿಸುತ್ತಾನೆ. ಆ ನಂತರದಲ್ಲಿ ನಾಯಕ ಎಲ್ಲೇ ಹೋದರೂ ಈ ಅಘೋರಿ ನಾನಾ ರೀತಿಯಲ್ಲಿ ಕೊಲ್ಲಲು ಪ್ರಯತ್ನಿಸುತ್ತಲೇ ಸಾಗುತ್ತಾನೆ. ಆ ಅಘೋರಿ ಯಾರು, ಆತನೇಕೆ ನಾಯಕನನ್ನು ಕೊಲ್ಲಲು ನೋಡುತ್ತಾನೆ ಎಂಬುದರಿಂದ ಮೊದಲ್ಗೊಂಡು ಎಲ್ಲವೂ ಇಲ್ಲಿ ಕೌತುಕಗಳೇ. ಇಂಥಾ ಚಿತ್ರವಿಚಿತ್ರವಾದ ಪಾತ್ರಗಳೊಂದಿಗೆ, ಗಟ್ಟಿತನ ಹೊಂದಿದ ಕಥೆಯೊಂದಿಗೆ ಈ ಚಿತ್ರ ಪ್ರೇಕ್ಷಕರನ್ನು ಆವರಿಸಿಕೊಳ್ಳಲು ರೆಡಿಯಾಗಿದೆ. ಇಷ್ಟೂ ಕಾಲ ಈ ಚಿತ್ರದ ಬಗ್ಗೆ ಎದ್ದಿರೋ ಪ್ರಶ್ನೆಗಳಿಗೆಲ್ಲ ಇದೇ ಹನ್ನೆರಡನೇ ತಾರೀಕಿನಂದು ಉತ್ತರ ಸಿಗಲಿದೆ.