ಮುಂಬೈ: 200 ರ ಗಡಿ ದಾಟಿದರೂ ಎದುರಾಳಿ ಕಿಂಗ್ಸ್ ಪಂಜಾಬ್ ನ್ನು ನಿಯಂತ್ರಿಸಲಾಗದೇ ಸೋತ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಟ್ವಿಟರಿಗರಿಂದ ಟ್ರೋಲ್ ಗೊಳಗಾಗಿದೆ.
ನಿನ್ನೆಯ ಪಂದ್ಯದಲ್ಲಿ ಪಂಜಾಬ್ ವಿರುದ್ಧ ಮೊದಲು ಬ್ಯಾಟಿಂಗ್ ಮಾಡಿ ಆರ್ ಸಿಬಿ 205 ರನ್ ಗಳ ಬೃಹತ್ ಮೊತ್ತ ಪೇರಿಸಿತ್ತು. ಇಷ್ಟು ರನ್ ಗಳಿಸಿದ ಮೇಲೆ ಆರ್ ಸಿಬಿ ಗೆಲ್ಲಬಹುದು ಎಂಬುದೇ ಎಲ್ಲರ ಲೆಕ್ಕಾಚಾರವಾಗಿತ್ತು. ಆದರೆ ಪಂಜಾಬ್ ಬ್ಯಾಟಿಗರು ಈ ಮೊತ್ತವನ್ನು 19 ಓವರ್ ಗಳಲ್ಲೇ ತಲುಪಿ 5 ವಿಕೆಟ್ ಗಳ ಗೆಲುವು ಕಂಡರು. ನಾಯಕ ಮಯಾಂಕ್ ಅಗರ್ವಾಲ್ 32,ಶಿಖರ್ ಧವನ್, ಭನುಕಾ ರಾಜಕಪಕ್ಸ ತಲಾ 43, ಒಡಿಯಾನ್ ಸ್ಮಿತ್ ಅಜೇಯ 25, ಶಾರುಖ್ ಖಾನ್ ಅಜೇಯ 24 ರನ್ ಗಳಿಸಿ ತಂಡವನ್ನು ಗೆಲುವಿನ ದಡ ಮುಟ್ಟಿಸಿದರು. ಅಂತಿಮವಾಗಿ ಪಂಜಾಬ್ 19 ಓವರ್ ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 208 ರನ್ ಗಳಿಸಿತು.
ಇಷ್ಟು ದೊಡ್ಡ ಮೊತ್ತ ಗಳಿಸಿಯೂ ಸೋತ ಆರ್ ಸಿಬಿ ಟ್ವಿಟರ್ ನಲ್ಲಿ ಟ್ರೋಲ್ ಗೊಳಗಾಗಿದೆ. ಹಳೆಯ ಆರ್ ಸಿಬಿ ವಾಪಸ್ ಬಂದಿದೆ ಎಂದು ಹಲವರು ಕಿಚಾಯಿಸಿದ್ದಾರೆ. ಇನ್ನು ಕೆಲವರು ಕೊಹ್ಲಿಯ ಫೋಟೋ ಪ್ರಕಟಿಸಿ, ಸದ್ಯ ಪ್ರೆಸೆಂಟೇಷನ್ ಕಾರ್ಯಕ್ರಮದಲ್ಲಿ ಸೋಲಿಗೆ ಕಾರಣ ಕೊಡುವ ತಲೆನೋವು ತಪ್ಪಿತು ಎಂದು ಲೇವಡಿ ಮಾಡಿದ್ದಾರೆ.
