ನ್ಯೂಯಾರ್ಕ್: ಪಹಲ್ಗಾಮ್ ದಾಳಿಯನ್ನು ಆಂತರಿಕ ದಂಗೆ, ಭಯೋತ್ಪಾದಕ ಕೃತ್ಯವಲ್ಲ ಎಂದಿದ್ದ ಅಮೆರಿಕಾ ಈಗ ತನ್ನ ದೇಶದ ಶಕ್ತಿ ಕೇಂದ್ರ ವೈಟ್ ಹೌಸ್ ಮೇಲೆ ದಾಳಿ ಮಾಡಲು ಬಂದವರನ್ನು ಉಗ್ರರು ಎಂದು ಕುದಿಯುತ್ತಿದೆ.
ಅಮೆರಿಕಾದ ವೈಟ್ ಹೌಸ್ ಪಕ್ಕದಲ್ಲೇ ರಾಷ್ಟ್ರೀಯ ರಕ್ಷಣಾ ಪಡೆ ಯೋಧರ ಮೇಲೆ ಗುಂಡಿನ ದಾಳಿ ನಡೆದಿದೆ. ಶ್ವೇತಭವನದ ಬಳಿ 17 ನೇ ಸ್ಟ್ರೀಟ್ ಮತ್ತು ಐ ಸ್ಟ್ರೀಟ್ ಎನ್ ಡಬ್ಲ್ಯೂ ಬಳಿ ಗಸ್ತು ತಿರುಗುತ್ತಿದ್ದ ಯೋಧರ ಮೇಲೆ ಮೂಲೆಯಿಂದ ಬಂದ ಶಂಕಿತನೋರ್ವ ಇದ್ದಕ್ಕಿದ್ದಂತೆ ಗುಂಡಿನ ದಾಳಿ ನಡೆಸಿದ್ದಾನೆ.
ತಕ್ಷಣವೇ ಯೋಧರೂ ಪ್ರತಿದಾಳಿ ನಡೆಸಿದ್ದಾರೆ. ಘಟನೆಯಲ್ಲಿ ಯೋಧರಿಗೆ ಗಾಯವಾಗಿದೆ. ಜೊತೆಗೆ ಶಂಕಿತ ಉಗ್ರನೂ ಗಂಭೀರ್ ಗಾಯಗೊಂಡಿದ್ದಾನೆ ಎಂದು ತಿಳಿದುಬಂದಿದೆ. ಸದ್ಯದ ವರದಿಗಳ ಪ್ರಕಾರ ಈತ ಅಫ್ಘನ್ ಮೂಲದ ಭಯೋತ್ಪಾದಕ ಎನ್ನಲಾಗುತ್ತಿದೆ.
ಇದನ್ನು ಭಯೋತ್ಪಾದಕ ಕೃತ್ಯ ಎಂದು ಪರಿಗಣಿಸಿ ತನಿಖೆ ನಡೆಸಲಾಗುತ್ತಿದೆ. ಕೆಲವೇ ದಿನಗಳ ಹಿಂದೆ ಪಹಲ್ಗಾಮ್ ನಲ್ಲಿ ಅಷ್ಟು ದೊಡ್ಡ ಭಯೋತ್ಪಾದಕ ದಾಳಿಯಾಗಿದ್ದರ ಬಗ್ಗೆ ಇತ್ತೀಚೆಗೆ ಅಮೆರಿಕಾ ಇದು ಭಯೋತ್ಪಾದಕ ದಾಳಿಯಲ್ಲ, ಆಂತರಿಕ ಕಲಹ ಎಂದೆಲ್ಲಾ ಹೇಳಿಕೊಂಡಿತ್ತು. ಈಗ ತನ್ನದೇ ದೇಶದಲ್ಲಿ ಗುಂಡಿನ ದಾಳಿಯಾದ ಬೆನ್ನಲ್ಲೇ ಭಯೋತ್ಪಾದಕ ದಾಳಿ ಎಂದು ಆಕ್ರೋಶ ಹೊರಹಾಕಿದೆ.
