ನ್ಯೂಯಾರ್ಕ್: ಕದನ ವಿರಾಮ ಎಂದು ಘೋಷಿಸಿದ ಬಳಿಕವೂ ಯುದ್ಧ ಮುಂದುವರಿಸಿದ ಇಸ್ರೇಲ್ ಮತ್ತು ಇರಾನ್ ಮೇಲೆ ಸಿಟ್ಟಿಗೆದ್ದ ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಆಕ್ಷೇಪಾರ್ಹ ಪದವೊಂದನ್ನು ಬಳಸಿ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಇರಾನ್ ಮತ್ತು ಇಸ್ರೇಲ್ ನಡುವಿನ ಯುದ್ಧದಲ್ಲಿ ಇಸ್ರೇಲ್ ಜೊತೆ ಅಮೆರಿಕಾ ಕೂಡಾ ಕೈ ಜೋಡಿಸಿತ್ತು. ಇರಾನ್ ನ ನ್ಯೂಕ್ಲಿಯರ್ ಸ್ಥಾವರಗಳ ಮೇಲೆ ದಾಳಿ ನಡೆಸಿತ್ತು. ಇದಾದ ಬಳಿಕ ನಿನ್ನೆ ಟ್ರಂಪ್ ಕದನ ವಿರಾಮವಾಗಿದೆ ಎಂದು ಘೋಷಿಸಿದ್ದರು. ಆದರೆ ಇದನ್ನು ಇರಾನ್ ಒಪ್ಪಿರಲಿಲ್ಲ.
ಎರಡೂ ದೇಶಗಳೂ ಕದನ ವಿರಾಮ ಘೋಷಣೆಯಾದ ಬಳಿಕವೂ ಪರಸ್ಪರ ದಾಳಿ ಮುಂದುವರಿಸಿತ್ತು. ಹೀಗಾಗಿ ಟ್ರಂಪ್ ಸಿಟ್ಟಿಗೆದ್ದಿದ್ದರು. ಇದೇ ಸಿಟ್ಟಿನ ಭರದಲ್ಲಿ ಅವರು ಫ.. ಎಂದು ಆರಂಭವಾಗುವ ಆಕ್ಷೇಪಾರ್ಹ ಪದ ಬಳಸಿ ಅವರು ಏನು ಮಾಡುತ್ತಿದ್ದಾರೆಂದೇ ನನಗೆ ತಿಳಿಯುತ್ತಿಲ್ಲ ಎಂದು ಆಕ್ರೋಶ ಹೊರಹಾಕಿದ್ದರು. ತನ್ನ ಮಾತು ಕೇಳದ ಉಭಯ ದೇಶಗಳ ಮೇಲೆ ಟ್ರಂಪ್ ಸಿಟ್ಟು ಮಾಡಿಕೊಂಡಿದ್ದಾರೆ.
ಇನ್ನು ಕದನ ವಿರಾಮದ ಹೊರತಾಗಿಯೂ ಇರಾನ್ ದಾಳಿಗೆ ಸಿದ್ಧತೆ ಮಾಡಿದ್ದು ಇದು ಕದನ ವಿರಾಮದ ಉಲ್ಲಂಘನೆಯಾಗಿದೆ. ಹೀಗಾಗಿ ನಾವೂ ಪ್ರತಿ ದಾಳಿಗೆ ಸಿದ್ಧರಾಗಿದ್ದೇವೆ ಎಂದು ಇಸ್ರೇಲ್ ಹೇಳಿತ್ತು. ಆದರೆ ಇದನ್ನು ಇರಾನ್ ನಿರಾಕರಿಸಿದೆ.
