ಪತ್ನಿಯೇ ಪತಿಯನ್ನು ಕೊಲ್ಲುವಷ್ಟು ಕ್ರೂರಿಯಾಗುವುದು ಯಾಕೆ

Photo credit: AI Image
ಬೆಂಗಳೂರು: ಭಾರತೀಯ ಸಂಪ್ರದಾಯದಲ್ಲಿ ಪತ್ನಿಯಾದವಳು ಪತಿಯನ್ನು ದೇವರಂತೆ ಆರಾಧಿಸುತ್ತಾಳೆ. ಆದರೆ ಇತ್ತೀಚೆಗಿನ ದಿನಗಳಲ್ಲಿ ಪತ್ನಿಯೇ ಪತಿಯನ್ನು ಕೊಲೆ ಮಾಡುವ ಹಲವು ಘಟನೆಗಳು ನಡೆಯುತ್ತಿವೆ. ಇಷ್ಟಕ್ಕೂ ಪತ್ನಿ ಪತಿಯನ್ನು ಕೊಲ್ಲುವಷ್ಟು ಕ್ರೂರಿಯಾಗುವುದು ಯಾಕೆ? ಸೈಕಾಲಜಿ ಏನು ಹೇಳುತ್ತದೆ ಇಲ್ಲಿದೆ ನೋಡಿ ವಿವರ.

ಹೆಚ್ಚಿನ ಸಂದರ್ಭಗಳಲ್ಲಿ ಅನೈತಿಕ ಸಂಬಂಧಕ್ಕೆ ಸಿಲುಕಿ ಪತ್ನಿಯೇ ಪತಿಯನ್ನು ಕೊಲೆ ಮಾಡುವ ಹಂತಕ್ಕೆ ಹೋಗಿರುತ್ತದೆ. ಈಗ ನಡೆಯುತ್ತಿರುವ ರಾಜ ರಘುವಂಶಿ ಕೇಸ್ ಇರಲಿ, ಇದಕ್ಕೆ ಮೊದಲು ನಡೆದ ಕಾರ್ಕಳದ ಪ್ರತಿಮಾ ಕೇಸ್ ಇರಲಿ ಎಲ್ಲದರ ಹಿಂದೆ ಅನೈತಿಕ ಸಂಬಂಧವೇ ಕೊಲೆ ಹಂತಕ್ಕೆ ಹೋಗುವ ಮನಸ್ಥಿತಿಗೆ ಮಹಿಳೆಯರನ್ನು ತಂದು ನಿಲ್ಲಿಸಿರುತ್ತದೆ.

ಬಹುತೇಕ ಸಂದರ್ಭಗಳಲ್ಲಿ ತಮ್ಮ ಸಂಬಂಧಕ್ಕೆ ಸಮಾಜ ಅಥವಾ ಮನೆಯವರು ಏನನ್ನುತ್ತದೋ ಎಂಬ ಭಯ. ಅತ್ತ ಗಂಡನನ್ನೂ ಬಿಡಲಾಗದೇ ಇತ್ತ ಸಮಾಜವನ್ನೂ ಎದುರಿಸಲಾಗದ ಸಂದರ್ಭ ಬಂದಾಗ ಮಹಿಳೆಯರು ಇಂಥಾ ಹಾದಿಯನ್ನು ಹಿಡಿಯುತ್ತಾರೆ. ಬಹುತೇಕ ಸಂದರ್ಭಗಳಲ್ಲಿ ಪ್ರಿಯಕರನ ಧೈರ್ಯದಲ್ಲೇ ಈ ಸಾಹಸಕ್ಕೆ ಕೈ ಹಾಕುತ್ತಾಳೆ.

ಬಲವಂತದ ಮದುವೆ, ಒಲ್ಲದ ಗಂಡನೊಂದಿಗೆ ಸಂಸಾರ ಬೇರೊಂದು ಆಕರ್ಷಣೆಗೆ ಒಳಗಾಗುವಂತೆ ಮಾಡುತ್ತದೆ. ಇಂತಹ ಸಂದರ್ಭಗಳಲ್ಲಿ ಒಲ್ಲದ ಸಂಬಂಧವನ್ನು ದೂರವಾಗಲು ವಿಚ್ಛೇದನದಂತಹ ಅವಕಾಶಗಳಿದ್ದರೂ ಬಾಹ್ಯ ಒತ್ತಡಕ್ಕೆ ಒಳಗಾಗಿ ಅಥವಾ ಪ್ರಿಯಕರನ ಮೇಲಿನ ಅತಿಯಾದ ವ್ಯಾಮೋಹ ಇಂತಹ ಕೆಲಸಕ್ಕೆ ಕೈ ಹಾಕಿಸುತ್ತದೆ.

ವಿಚ್ಛೇದನ ಪಡೆಯುವುದು ಅಷ್ಟು ಸುಲಭದ ಮಾತಲ್ಲ. ಹೀಗಾಗಿ ಗಂಡನಿಂದ ದೂರವಾಗಲು ಸುಲಭ ದಾರಿ ಯಾವುದು ಎಂದು ನೋಡಿಕೊಳ್ಳುತ್ತಾರೆ. ಇತ್ತೀಚೆಗಂತೂ ಸೋಷಿಯಲ್ ಮೀಡಿಯಾಗಳು, ಅಂತರ್ಜಾಲಗಳ ಪ್ರಭಾವ ಹಲವು ಕೆಟ್ಟ ನಿರ್ಧಾರಗಳಿಗೆ ಕಾರಣವಾಗಬಹುದು. ತನ್ನ ಕೆಲಸಕ್ಕೆ ಒಬ್ಬರ ಬೆಂಬಲ ಸಿಗುತ್ತದೆ ಎನ್ನುವಾಗ ಎಂತಹದ್ದೇ ದುಸ್ಸಾಹಸಕ್ಕೆ ಕೈ ಹಾಕಲು ಮನುಷ್ಯ ಮುಂದಾಗುತ್ತಾನೆ. ಇಲ್ಲಿ ಆಗುತ್ತಿರುವುದೂ ಇದೇ.