ಮುಂಬೈ: 2011 ರ ಏಕದಿನ ವಿಶ್ವಕಪ್ ಭಾರತದಲ್ಲಿ ನಡೆದಾಗ ಟೀಂ ಇಂಡಿಯಾ ಆಟಗಾರರು ತಮ್ಮ ಮೆಚ್ಚಿನ ಹಿರಿಯ ಆಟಗಾರ ಸಚಿನ್ ತೆಂಡುಲ್ಕರ್ ಗೆ ಟ್ರೋಫಿ ಉಡುಗೊರೆಯಾಗಿ ನೀಡಲು ಬಯಸಿದ್ದರು.
ಸಚಿನ್ ಅಷ್ಟು ವರ್ಷ ಕ್ರಿಕೆಟ್ ಆಡಿಯೂ ಅವರಿಗೆ ವಿಶ್ವಕಪ್ ಗೆಲುವಿನ ಕಿರೀಟ ಸಿಕ್ಕಿರಲಿಲ್ಲ. ಆದರೆ ಅದು ಸಚಿನ್ ಪಾಲಿಗೆ ಕೊನೆಯ ವಿಶ್ವಕಪ್ ಆಗಿದ್ದರಿಂದ ಸಹ ಕ್ರಿಕೆಟಿಗರು ತಮ್ಮ ಮೆಚ್ಚಿನ ‘ಪಾಜಿ’ ಗಾಗಿ ಟೂರ್ನಿ ಗೆದ್ದು ಉಡುಗೊರೆ ನೀಡಲು ಬಯಸಿದ್ದರು. ಅದರಂತೆ ಮಾಡಿದ್ದರು ಕೂಡಾ.
ಇದೀಗ ಟೀಂ ಇಂಡಿಯಾ ಮತ್ತೆ ತವರಿನಲ್ಲಿ ವಿಶ್ವಕಪ್ ಆಡುತ್ತಿದೆ. 2023 ರ ಏಕದಿನ ವಿಶ್ವಕಪ್ ಅಕ್ಟೋಬರ್ 5 ರಿಂದ ಭಾರತದಲ್ಲೇ ನಡೆಯಲಿದೆ. ಈ ಬಾರಿ ಟೀಂ ಇಂಡಿಯಾ ಕ್ರಿಕೆಟಿಗರು ಕೊಹ್ಲಿಗಾಗಿ ಕಪ್ ಗೆಲ್ಲಲು ಪ್ರಯತ್ನಿಸಬಹುದು ಎಂದು ಮಾಜಿ ಕ್ರಿಕೆಟಿಗ ವೀರೇಂದ್ರ ಸೆಹ್ವಾಗ್ ಹೇಳಿದ್ದಾರೆ. ಅಂದು ನಾವು ಸಚಿನ್ ಗಾಗಿ ಆಡಿದೆವು. ಇಂದು ಟೀಂ ಇಂಡಿಯಾ ಕ್ರಿಕೆಟಿಗರು ಟ್ರೋಫಿ ಗೆದ್ದು ಕೊಹ್ಲಿಗೆ ಅರ್ಪಿಸಬಹುದು ಎಂದಿದ್ದಾರೆ ಸೆಹ್ವಾಗ್.