Sachin Tendulkar: ಜಮ್ಮು ಕಾಶ್ಮೀರದಲ್ಲಿ ರಸ್ತೆ ಬದಿ ಕ್ರಿಕೆಟ್ ಆಡಿದ ಸಚಿನ್ ತೆಂಡುಲ್ಕರ್

Photo Courtesy: Twitter

ಜಮ್ಮು ಕಾಶ್ಮೀರ: ಜಮ್ಮು ಕಾಶ್ಮೀರ ಪ್ರವಾಸದಲ್ಲಿರುವ ಕ್ರಿಕೆಟ್ ದೇವರು ಸಚಿನ್ ತೆಂಡುಲ್ಕರ್ ರಸ್ತೆ ಬದಿ ಗಲ್ಲಿ ಕ್ರಿಕೆಟ್ ಆಡಿ ಗಮನ ಸೆಳೆದಿದ್ದಾರೆ. ಕಳೆದ ಎರಡು ದಿನಗಳಿಂದ ಕುಟುಂಬ ಸಮೇತ ಸಚಿನ್ ಜಮ್ಮು ಪ್ರವಾಸದಲ್ಲಿದ್ದಾರೆ.

ಕಾರಿನಲ್ಲಿ ಸಾಗುವಾಗ ರಸ್ತೆ ಬದಿ ಕ್ರಿಕೆಟ್ ಆಡುತ್ತಿದ್ದ ಗುಂಪೊಂದನ್ನು ನೋಡಿ ಕಾರು ನಿಲ್ಲಿಸಿದ ಸಚಿನ್ ಅವರೊಂದಿಗೆ ತಾವೂ ಒಂದು ಓವರ್ ಆಡಿದ್ದಾರೆ. ವಿಶೇಷವೆಂದರೆ ಕೊನೆಯ ಎಸೆತದಲ್ಲಿ ನೀವು ಈಗ ನನ್ನನ್ನು ಔಟ್ ಮಾಡಬೇಕು ಎಂದ ಸಚಿನ್ ಬ್ಯಾಟ್ ಉಲ್ಟಾ ಹಿಡಿದು ಬ್ಯಾಟಿಂಗ್ ಮಾಡಿ ಚಮಕ್ ಕೊಟ್ಟಿದ್ದಾರೆ. ಆದರೆ ಕೊನೆಗೂ ಕ್ರಿಕೆಟ್ ದಿಗ್ಗಜನನ್ನು ಔಟ್ ಮಾಡಲು ಸಾಧ‍್ಯವಾಗಲೇ ಇಲ್ಲ. ಸಚಿನ್ ಗಲ್ಲಿ ಕ್ರಿಕೆಟ್ ಆಡುವುದನ್ನು ನೋಡಿದ ನೆಟ್ಟಿಗರು ದೇವರು ಭೂಲೋಕದ ಸ್ವರ್ಗ(ಕಾಶ್ಮೀರವನ್ನು ಭೂಲೋಕದ ಸ್ವರ್ಗ ಎನ್ನುತ್ತಾರೆ) ದಲ್ಲಿ ಕ್ರಿಕೆಟ್ ಆಡುತ್ತಿದ್ದಾರೆ ಎಂದು ಕಾಮೆಂಟ್ ಮಾಡಿದ್ದಾರೆ.

ಬಳಿಕ ಅಲ್ಲಿದ್ದವರ ಕುಶಲ ವಿಚಾರಿಸಿ ಎಲ್ಲರೊಂದಿಗೆ ಸೆಲ್ಫೀ ತೆಗೆದುಕೊಂಡು ಅಲ್ಲಿಂದ ತೆರಳಿದ್ದಾರೆ. ಪತ್ನಿ ಅಂಜಲಿ ಜೊತೆ ಸಚಿನ್ ಜಮ್ಮು ಕಾಶ್ಮೀರ ಪ್ರವಾಸ ಮಾಡುತ್ತಿದ್ದಾರೆ. ಮೊನ್ನೆ ಇಲ್ಲಿನ ಬ್ಯಾಟ್ ಫ್ಯಾಕ್ಟರಿಗೆ ಭೇಟಿ ನೀಡಿ ಅಚ್ಚರಿಗೊಳಿಸಿದ್ದರು. ಅಲ್ಲದೆ, ಇಲ್ಲಿಗೆ ತೆರಳಲು ವಿಮಾನದಲ್ಲಿ ಎಕಾನಮಿ ಕ್ಲಾಸ್ ನಲ್ಲಿ ಕುಳಿತು ಸಹ ಪ್ರಯಾಣಿಕರಿಗೆ ಅಚ್ಚರಿ ನೀಡಿದ್ದರು.

ಕಾಶ್ಮೀರ ಕೇಸರಿಗೆ ಹೆಸರುವಾಸಿ. ಹೀಗಾಗಿ ಇಲ್ಲಿನ ಕೇಸರ್ ಶಾಪ್ ಒಂದಕ್ಕೆ ಭೇಟಿ ನೀಡಿ ಖರೀದಿ ಮಾಡಿದ್ದಾರೆ. ಸ್ಥಳೀಯರೊಂದಿಗೆ ಸಾಮಾನ್ಯರಂತೇ ಕಾಲ ಕಳೆಯುತ್ತಿರುವ ಸಚಿನ್ ತಮ್ಮ ಬ್ರೇಕ್ ಅವಧಿಯನ್ನು ಎಂಜಾಯ್ ಮಾಡುತ್ತಿದ್ದಾರಲ್ಲದೆ, ಇತರರಿಗೂ ಕಾಶ್ಮೀರಕ್ಕೆ ಬರಲು ಪ್ರೇರೇಪಿಸುತ್ತಿದ್ದಾರೆ.