ಲೀಡ್ಸ್: ಟೀಂ ಇಂಡಿಯಾ ವಿಕೆಟ್ ಕೀಪರ್ ಬ್ಯಾಟಿಗ ರಿಷಭ್ ಪಂತ್ ಶತಕ ಸಿಡಿಸಿದರೆ ಫ್ಲಿಪ್ ಸ್ಟಂಟ್ ಮಾಡಿ ಪ್ರೇಕ್ಷಕರನ್ನು ಮನರಂಜಿಸುತ್ತಾರೆ. ಅವರು ಈ ರೀತಿ ಫ್ಲಿಪ್ ಮಾಡಿ ಸೆಲೆಬ್ರೇಷನ್ ಮಾಡುವುದರ ಹಿಂದೆ ರೋಚಕ ಕಹಾನಿ ಒಂದಿದೆ.
ಅದನ್ನು ಅವರೇ ಸಂದರ್ಶನವೊಂದರಲ್ಲಿ ಬಾಯ್ಬಿಟ್ಟಿದ್ದಾರೆ. ರಿಷಭ್ ಪಂತ್ ಇಂಗ್ಲೆಂಡ್ ವಿರುದ್ಧ ಮೊದಲ ಟೆಸ್ಟ್ ಪಂದ್ಯದ ಎರಡೂ ಇನಿಂಗ್ಸ್ ಗಳಲ್ಲಿ ಶತಕ ಗಳಿಸಿದ್ದರು. ಮೊದಲ ಇನಿಂಗ್ಸ್ ನಲ್ಲಿ ಶತಕ ಗಳಿಸಿದ ಬಳಿಕ ಒಂದು ಫ್ಲಿಪ್ ಮಾಡಿ ಸೆಲೆಬ್ರೇಷನ್ ಮಾಡಿದ್ದರು. ಈ ಹಿಂದೆ ಐಪಿಎಲ್ ನಲ್ಲಿ ಶತಕ ಗಳಿಸಿದಾಗಲೂ ಅವರು ಮೊದಲ ಬಾರಿಗೆ ಈ ರೀತಿ ಸೆಲೆಬ್ರೇಷನ್ ಮಾಡಿ ಎಲ್ಲರ ಗಮನ ಸೆಳೆದಿದ್ದರು.
ಅಷ್ಟಕ್ಕೂ ರಿಷಭ್ ಈ ರೀತಿ ಮಾಡುವುದಕ್ಕೂ ಕಾರಣವಿದೆ. ರಿಷಭ್ ಚಿಕ್ಕವರಿದ್ದಾಗಿನಿಂದಲೂ ಜಿಮ್ನಾಸ್ಟಿಕ್ ಮೇಲೆ ಭಾರೀ ಆಸಕ್ತಿಯಿತ್ತಂತೆ. ಹೀಗಾಗಿ ಆಗಲೇ ರಿಷಭ್ ಫ್ಲಿಪ್ ಮಾಡುವುದನ್ನೆಲ್ಲಾ ಅಭ್ಯಾಸ ಮಾಡುತ್ತಿದ್ದರು. ಆದರೆ ಕಾರಣಾಂತರಗಳಿಂದ ಅವರು ಕ್ರಿಕೆಟಿಗರಾದರು. ಆದರೆ ಈಗಲೂ ಅವರಿಗೆ ಜಿಮ್ನಾಸ್ಟಿಕ್ ಮೇಲೆ ಒಲವಿದೆಯಂತೆ. ಇದೇ ಕಾರಣಕ್ಕೆ ಅವರು ಶತಕ ಸಿಡಿಸಿದಾಗ ಎಲ್ಲರಿಗಿಂತ ಭಿನ್ನವಾಗಿ ಫ್ಲಿಪ್ ಮಾಡಿ ಸಂಭ್ರಮಿಸುವುದನ್ನು ಶುರು ಮಾಡಿದ್ದಾರೆ.
