ವಿಶ್ವ ಚಾಂಪಿಯನ್ ಆದ ಮಹಿಳಾ ಕ್ರಿಕೆಟಿಗರನ್ನು ಭೇಟಿಯಾದ ಮೋದಿ: ಟ್ರೋಫಿ ಜೊತೆಗೆ ಪೋಸ್

Photo Credit: X

ನವದೆಹಲಿ: ಐಸಿಸಿ ಏಕದಿನ ವಿಶ್ವಕಪ್ ಚಾಂಪಿಯನ್ ಆದ ಮಹಿಳಾ ಕ್ರಿಕೆಟ್ ತಂಡವನ್ನು ಇಂದು ಪ್ರಧಾನಿ ಮೋದಿ ಭೇಟಿ ಮಾಡಿದ್ದಾರೆ. ತಮ್ಮ ನಿವಾಸದಲ್ಲಿ ಕ್ರಿಕೆಟಿಗರ ಜೊತೆ ಸಂವಾದವನ್ನೂ ನಡೆಸಿದ್ದಾರೆ.

ಈ ಹಿಂದೆ ಪುರುಷ ಕ್ರಿಕೆಟಿಗರು ಟಿ20 ವಿಶ್ವಕಪ್ ಗೆದ್ದಾಗ ಪ್ರಧಾನಿ ಮೋದಿ ತಮ್ಮ ನಿವಾಸದಲ್ಲಿ ಆಟಗಾರರಿಗೆ ಆತಿಥ್ಯ ನೀಡಿದ್ದರು. ಇದೀಗ ಮಹಿಳಾ ತಾರೆಯರಿಗೂ ಅದೇ ಜಾಗದಲ್ಲಿ ಫೋಟೋಗೆ ಪೋಸ್ ನೀಡಿದ್ದಾರೆ.

ಭಾರತ ತಂಡದ ಆಟಗಾರ್ತಿಯರ ಜೊತೆ ಕೋಚ್, ಸಹಾಯಕ ಸಿಬ್ಬಂದಿಗಳೂ ಮೋದಿ ಭೇಟಿಯಾಗಿದ್ದರು. ನಾಯಕಿ ಹರ್ಮನ್ ಪ್ರೀತ್ ಕೌರ್ ವಿಶ್ವಕಪ್ ಟ್ರೋಫಿಯನ್ನು ಪ್ರಧಾನಿ ಮೋದಿಗೆ ನೀಡಿದರು. ಟ್ರೋಫಿ ಜೊತೆಗೆ ಕ್ರಿಕೆಟಿಗರೆಲ್ಲರೂ ಫೋಟೋಗೆ ಪೋಸ್ ನೀಡಿದರು.

ಇದರ ಜೊತೆಗೆ ಎಲ್ಲಾ ಆಟಗಾರರನ್ನು ಕೂರಿಸಿಕೊಂಡು ವಿಶ್ವಕಪ್ ನ ಅನುಭವಗಳನ್ನು ಮೋದಿ ಕೇಳಿ ತಿಳಿದುಕೊಂಡರು. ಪ್ರತಿಯೊಬ್ಬ ಕ್ರಿಕೆಟಿಗರ ಜೊತೆಯೂ ಮೋದಿ ಮಾತನಾಡಿದ್ದಾರೆ. ಅಲ್ಲದೆ ಇತಿಹಾಸ ಸೃಷ್ಟಿಸಿದ ಕ್ರಿಕೆಟಿಗರಿಗೆ ಅಭಿನಂದನೆಗಳನ್ನು ಸಲ್ಲಿಸಿದ್ದಾರೆ.