Publish Date: Mon, 05 Feb 2024 (08:47 IST)
Updated Date: Mon, 05 Feb 2024 (08:51 IST)
ಮುಂಬೈ: ಭಾರತ ಮತ್ತು ಇಂಗ್ಲೆಂಡ್ ನಡುವೆ ನಡೆಯಲಿರುವ ಮೂರನೇ ಟೆಸ್ಟ್ ಪಂದ್ಯದ ವೇಳೆ ಕೆಎಲ್ ರಾಹುಲ್ ಫಿಟ್ ಆಗಿ ತಂಡಕ್ಕೆ ಮರಳುವ ಸಾಧ್ಯತೆಯಿದೆ.
ಮೊದಲ ಟೆಸ್ಟ್ ಪಂದ್ಯದಲ್ಲಿ ಉಪಯುಕ್ತ ಇನಿಂಗ್ಸ್ ಆಡಿದ್ದ ರಾಹುಲ್ ಎರಡನೇ ಟೆಸ್ಟ್ ಪಂದ್ಯದ ವೇಳೆಗೆ ತೊಡೆ ನೋವಿನಿಂದಾಗಿ ಹೊರಗುಳಿದಿದ್ದರು. ಅವರ ಅನುಪಸ್ಥಿತಿ ಭಾರತದ ಮಧ್ಯಮ ಕ್ರಮಾಂಕಕ್ಕೆ ಕಾಡುತ್ತಿದೆ. ಆದರೆ ಇದೀಗ ಮೂರನೇ ಟೆಸ್ಟ್ ವೇಳೆಗೆ ಅವರು ತಂಡಕ್ಕೆ ಕಮ್ ಬ್ಯಾಕ್ ಮಾಡಲಿದ್ದಾರೆ ಎಂಬ ಸಿಹಿ ಸುದ್ದಿ ಸಿಕ್ಕಿದೆ.
ಕೌಟುಂಬಿಕ ಕಾರಣಗಳಿಂದಾಗಿ ಕೊಹ್ಲಿ ಕಳೆದ ಎರಡೂ ಟೆಸ್ಟ್ ಪಂದ್ಯಗಳನ್ನು ಆಡಿಲ್ಲ. ಅವರು ಮೂರನೇ ಟೆಸ್ಟ್ ಗೂ ಲಭ್ಯರಾಗುವುದು ಅನುಮಾನವೆನ್ನಲಾಗಿದೆ. ಈ ನಡುವೆ ಕೆಎಲ್ ರಾಹುಲ್ ಕಮ್ ಬ್ಯಾಕ್ ಸುದ್ದಿ ತಂಡಕ್ಕೆ ಸಮಾಧಾನ ನೀಡಬಹುದು. ರಾಹುಲ್ ಅನುಪಸ್ಥಿತಿಯಲ್ಲಿ ತಂಡದಲ್ಲಿ ಸ್ಥಾನ ಪಡೆದ ರಜತ್ ಪಟಿದಾರ್ ಕೂಡಾ ಸಿಕ್ಕ ಅವಕಾಶವನ್ನು ಬಳಸಿಕೊಳ್ಳಲು ವಿಫಲರಾಗಿದ್ದರು.
ಶ್ರೇಯಸ್ ಅಯ್ಯರ್ ಗೆ ಕೊಕ್?
ರಾಹುಲ್ ತಂಡಕ್ಕೆ ಬಂದರೆ ತಂಡದಿಂದ ಹೊರ ನಡೆಯುವವರು ಯಾರು ಎಂಬ ಪ್ರಶ್ನೆಯಿದೆ. ರಜತ್ ಪಟಿದಾರ್ ಗೆ ಕಳೆದ ಪಂದ್ಯದಲ್ಲಿ ಮೊದಲ ಬಾರಿಗೆ ಅವಕಾಶ ಸಿಕ್ಕಿತ್ತು. ಆದರೆ ಅವರು ಬಳಸಿಕೊಳ್ಳಲಿಲ್ಲ. ಇತ್ತ ಶ್ರೇಯಸ್ ಸತತ ವೈಫಲ್ಯಕ್ಕೊಳಗಾಗಿದ್ದು ಭಾರೀ ಒತ್ತಡದಲ್ಲಿದ್ದಾರೆ. ಹೀಗಾಗಿ ಅನುಭವಿ ಶ್ರೇಯಸ್ ರನ್ನು ಪಕ್ಕಕ್ಕಿಟ್ಟು ರಜತ್ ಗೆ ಇನ್ನೊಂದು ಅವಕಾಶ ನೀಡಬಹುದೇ ಎಂದು ಕಾದುನೋಡಬೇಕಿದೆ.