INDw vs NZw: ತನ್ನ ಮೇಲಿದ್ದ ಅಪವಾದ ತೊಡೆದು ಹಾಕಿದ ಸ್ಮೃತಿ ಮಂಧಾನಾ

ಅಹ್ಮದಾಬಾದ್: ತಕ್ಕ ಸಮಯದಲ್ಲೇ ಕೈ ಕೊಡ್ತಾರೆ, ಬೇಕಿದ್ದ ಪಂದ್ಯದಲ್ಲಿ ಆಡಲ್ಲ ಮೇಕಪ್ ಗೆ ಮಾತ್ರ ಲಾಯಕ್ಕು ಎಂದೆಲ್ಲಾ ಅಪವಾದ ಹೊತ್ತುಕೊಂಡಿದ್ದ ಸ್ಮೃತಿ ಮಂಧಾನಾ ನಿನ್ನೆಯ ನ್ಯೂಜಿಲೆಂಡ್ ವಿರುದ್ಧದ ಏಕದಿನ ಪಂದ್ಯದಲ್ಲಿ ಶತಕ ಸಿಡಿಸಿ ನಿವಾಳಿಸಿದರು.

ಎರಡೂ ತಂಡಗಳು ಸರಣಿಯಲ್ಲಿ 1-1 ರಿಂದ ಸಮಬಲ ಸಾಧಿಸಿದ್ದರಿಂದ ನಿನ್ನೆಯ ಪಂದ್ಯಕ್ಕೆ ಫೈನಲ್ ಕಳೆ ಬಂದಿತ್ತು. ನಿನ್ನೆಯ ಮಾಡು ಇಲ್ಲವೇ ಮಡಿ ಪಂದ್ಯದಲ್ಲಿ ಸ್ಮೃತಿ ಮಂಧಾನಾ ತಕ್ಕ ಸಮಯದಲ್ಲೇ ಶತಕ ಸಿಡಿಸಿ ತಂಡದ ಗೆಲುವಿನಲ್ಲಿ ಪ್ರಧಾನ ಪಾತ್ರ ವಹಿಸಿದರು. ಇದರಿಂದಾಗಿ ಭಾರತ 6 ವಿಕೆಟ್ ಗಳ ಗೆಲುವು ಸಾಧಿಸಿ ಸರಣಿ ತನ್ನದಾಗಿಸಿಕೊಂಡಿತು.

ರನ್ ಚೇಸಿಂಗ್ ಮಾಡುವಾಗ ಭಾರತ ತಂಡಕ್ಕೆ ಸ್ಮೃತಿ ಮತ್ತು ಹರ್ಮನ್ ರಂತಹ ಅನುಭವಿಗಳ ಸಾಥ್ ಬೇಕಾಗಿತ್ತು. ನಿನ್ನೆಯ ಪಂದ್ಯದಲ್ಲಿ ಸ್ಮೃತಿ 100 ರನ್ ಗಳಿಸಿದರೆ ಹರ್ಮನ್ ಅಜೇಯ 59 ರನ್ ಗಳಿಸಿದರು. ಈ ಮೂಲಕ ಇತ್ತೀಚೆಗೆ ನಡೆದಿದ್ದ ಟಿ20 ವಿಶ್ವಕಪ್ ನ ಲೀಗ್ ಪಂದ್ಯದಲ್ಲಿ ಕಂಡಿದ್ದ ಸೋಲಿಗೆ ಸೇಡು ತೀರಿಸಿಕೊಂಡರು.

ನಿನ್ನೆಯ ಪಂದ್ಯದಲ್ಲಿ ಒಟ್ಟು 122 ಎಸೆತ ಎದುರಿಸಿದ ಸ್ಮೃತಿ 10 ಬೌಂಡರಿಗಳೊಂದಿಗೆ 100 ರನ್ ಗಳಿಸಿ ಬೌಲ್ಡ್ ಔಟ್ ಆದರು. ತಂಡದ ಗೆಲುವಿಗೆ ಇನ್ನು ನಾಲ್ಕು ರನ್ ಇದೆ ಎಂದಾಗ ಅವರು ಔಟಾಗಿದ್ದಾರೆ. ಅಷ್ಟರವರೆಗೂ ತಂಡಕ್ಕೆ ಆಧಾರವಾಗಿ ನಿಂತರು. ಈ ಮೂಲಕ ಅಭಿಮಾನಿಗಳ ಮೆಚ್ಚುಗೆ ಗಳಿಸಿದರು.