IND vs BAN test: ಬಾಲ್ ಹಿಡಿಯಕ್ಕೂ ಲಾಯಕ್ಕಿಲ್ಲದವನು, ಕೆಎಲ್ ರಾಹುಲ್ ಮೇಲೆ ರೋಹಿತ್, ಸಿರಾಜ್ ಸಿಟ್ಟು

Photo Credit: X

ಕಾನ್ಪುರ: ಭಾರತ ಮತ್ತು ಬಾಂಗ್ಲಾದೇಶ ನಡುವಿನ ಎರಡನೇ ಟೆಸ್ಟ್ ಪಂದ್ಯಕ್ಕೆ ವರುಣ ಕೃಪೆ ತೋರಿದ್ದು ನಾಲ್ಕನೇ ದಿನದಾಟ ನಡೆಯುತ್ತಿದೆ. ಇಂದಿನ ದಿನದಾಟದಲ್ಲಿ ಮೈದಾನದಲ್ಲೇ ಕಳಪೆ ಫೀಲ್ಡಿಂಗ್ ಮಾಡಿದ ಕೆಎಲ್ ರಾಹುಲ್ ಮೇಲೆ ನಾಯಕ ರೋಹಿತ್ ಶರ್ಮಾ ಮತ್ತು ಬೌಲರ್ ಮೊಹಮ್ಮದ್ ಸಿರಾಜ್ ಸಿಟ್ಟಾದ ಘಟನೆ ನಡೆದಿದೆ.

ಟಾಸ್ ಗೆದ್ದ ಟೀಂ ಇಂಡಿಯಾ ಮೊದಲು ಫೀಲ್ಡಿಂಗ್ ಆಯ್ದುಕೊಂಡಿತ್ತು. ಮೊದಲ ದಿನ 35 ಓವರ್ ಗಳ ಪಂದ್ಯ ನಡೆದಿತ್ತು. ಬಳಿಕ ಎರಡು ದಿನ ಮಳೆಯಿಂದಾಗಿ ಪಂದ್ಯ ನಡೆಯಲಿಲ್ಲ. ಇಂದು ನಾಲ್ಕನೇ ದಿನ ಪಂದ್ಯ ನಡೆಯುತ್ತಿದೆ. ಬಾಂಗ್ಲಾದೇಶ ಬ್ಯಾಟಿಂಗ್ ಮುಂದುವರಿಸಿದೆ.

ಮೊಮಿನುಲ್ ಹಕ್ ಹೊಡೆದ ಬಾಲ್ ನ್ನು ಕೆಎಲ್ ರಾಹುಲ್ ತಡೆಯಲು ವಿಫಲರಾದರು. ಬಳಿಕ ಚೇಸ್ ಕೂಡಾ ಮಾಡಲಿಲ್ಲ. ಇದು ನಾಯಕ ರೋಹಿತ್ ಶರ್ಮಾ ಮತ್ತು ಬೌಲರ್ ಮೊಹಮ್ಮದ್ ಸಿರಾಜ್ ಕೆಂಗಣ್ಣಿಗೆ ಗುರಿಯಾಯಿತು. ರೋಹಿತ್ ನಿರಾಸೆಯಿಂದ ಮುಖ ಮುಚ್ಚಿಕೊಂಡರೆ ಸಿರಾಜ್ ಕೂಡಾ ಸಿಟ್ಟಿನಿಂದ ದಿಟ್ಟಿಸಿ ನೋಡಿದರು.

ಇಬ್ಬರೂ ತನ್ನ ಮೇಲೆ ಸಿಟ್ಟಿಗೆದ್ದಿರುವುದನ್ನು ನೋಡಿ ಕೆಎಲ್ ರಾಹುಲ್ ಬಾಲ್ ತುಂಬಾ ವೈಡ್ ಆಗಿತ್ತು ಎಂದು ಸಮಜಾಯಿಷಿ ಕೊಡಲು ನೋಡಿದರು. ಆದರೆ ಕೆಎಲ್ ರಾಹುಲ್ ಈ ವಿಚಾರಕ್ಕೆ ಸೋಷಿಯಲ್ ಮೀಡಿಯಾದಲ್ಲಿ ಟ್ರೋಲ್ ಆಗಿದ್ದಾರೆ. ರನ್ ಮಾಡಲ್ಲ, ಫೀಲ್ಡಿಂಗ್ ಗೂ ಲಾಯಕ್ಕಿಲ್ಲ ಎಂದು ನೆಟ್ಟಿಗರು ಟೀಕ್ಷಿಸಿದ್ದಾರೆ.