ರಾಂಚಿ: ಧೋನಿ ಇಂದು ಕ್ರಿಕೆಟ್ ಜಗತ್ತಿನಲ್ಲಿ ಎಷ್ಟೇ ಹೆಸರು ಮಾಡಿರಬಹುದು. ಆದರೆ ತಾವು ಬೆಳೆದು ಬಂದ ಹಾದಿಯನ್ನು ಮಾತ್ರ ಮರೆತಿಲ್ಲ ಎನ್ನುವುದಕ್ಕೆ ಇದೇ ಸಾಕ್ಷಿ.
ಇತ್ತೀಚೆಗೆ ಐಪಿಎಲ್ 2024 ಕ್ಕಾಗಿ ಧೋನಿ ರಾಂಚಿಯಲ್ಲಿ ಅಭ್ಯಾಸ ನಡಸುತ್ತಿರುವ ಫೋಟೋ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿತ್ತು. ಆದರೆ ಧೋನಿ ಬ್ಯಾಟ್ ನಲ್ಲಿದ್ದ ಸ್ಟಿಕ್ಕರ್ ಎಲ್ಲರ ಗಮನ ಸೆಳೆದಿದೆ. ಸಾಮಾನ್ಯವಾಗಿ ಕ್ರಿಕೆಟಿಗರು ತಾವು ಒಪ್ಪಂದ ಮಾಡಿಕೊಂಡಿರುವ ಪ್ರತಿಷ್ಠಿತ ಕಂಪನಿಯ ಸ್ಟಿಕ್ಕರ್ ನ್ನು ಬ್ಯಾಟ್ ಮೇಲೆ ಬಳಸುತ್ತಾರೆ. ಆದರೆ ಧೋನಿ ಬಳಸಿದ್ದು ತಮ್ಮ ಗೆಳೆಯನ ಶಾಪ್ ನ ಹೆಸರಿನ ಸ್ಟಿಕ್ಕರ್.
ಧೋನಿ ಬ್ಯಾಟ್ ನಲ್ಲಿತ್ತು ಪ್ರೈಮ್ ಸ್ಪೋರ್ಟ್ಸ್ ಸ್ಟಿಕ್ಕರ್
ಧೋನಿ ತಮ್ಮ ಬ್ಯಾಟ್ ನಲ್ಲಿ ಗೆಳೆಯ ಪರಮ್ ಜಿತ್ ನ ಕ್ರೀಡಾಪರಿಕರಗಳ ಶಾಪ್ ಪ್ರೈಮ್ ಸ್ಪೋರ್ಟ್ಸ್ ಹೆಸರಿನ ಸ್ಟಿಕ್ಕರ್ ಅಂಟಿಸಿಕೊಂಡಿದ್ದರು. ಪರಮ್ ಜಿತ್ ಸಿಂಗ್ ಬಗ್ಗೆ ಧೋನಿ ಬಯೋಪಿಕ್ ಸಿನಿಮಾದಲ್ಲೂ ಉಲ್ಲೇಖವಿದೆ. ಧೋನಿಯ ಬ್ಯಾಟ್ ಗೆ ಮೊದಲು ಸ್ಪಾನ್ಸರ್ ಮಾಡಿದವರು ಇವರೇ. ಬಾಲ್ಯದಿಂದಲೂ ಧೋನಿಗೆ ಬೆಂಬಲವಾಗಿ ನಿಂತವರು ಪರಮ್ ಜಿತ್. ಧೋನಿ ವೃತ್ತಿ ಜೀವನ ಈ ಮಟ್ಟಕ್ಕೇರಲು ಪರಮ್ ಜಿತ್ ಕೊಡುಗೆ ಅಪಾರವಾಗಿದೆ.
ಈಗ ಧೋನಿಗೆ ಯಶಸ್ಸು ಸಿಕ್ಕಿದೆ. ಹಾಗಂತ ತನ್ನ ವೃತ್ತಿ ಜೀವನ ಬೆಳೆಯಲು ಕಾರಣವಾದ ಗೆಳೆಯನನ್ನು ಮಾತ್ರ ಧೋನಿ ಮರೆತಿಲ್ಲ. ಆತನ ಶಾಪ್ ಹೆಸರನ್ನು ಬ್ಯಾಟ್ ನ ಸ್ಟಿಕ್ಕರ್ ಮಾಡಿಕೊಂಡು ಗೆಳೆಯನ ವೃತ್ತಿಗೆ ಬೆಂಬಲ ನೀಡಿದ್ದಾರೆ. ಪರಮ್ ಜಿತ್ ಸ್ಪೋರ್ಟ್ಸ್ ಶಾಪ್ ರಾಂಚಿಯಲ್ಲಿದೆ. ಧೋನಿಗೆ ಮೊದಲ ಬ್ಯಾಟ್ ಸ್ಪಾನ್ಸರ್ ಮಾಡಿದ್ದು ಪರಮ್ ಜಿತ್. ಅದಕ್ಕೇ ಗೆಳೆಯನಿಗೆ ಈ ರೀತಿ ಕೃತಜ್ಞತೆ ಸಲ್ಲಿಸಿದ್ದಾರೆ ಧೋನಿ.
