ಆಸ್ಟ್ರೇಲಿಯಾದ ಈ ಸಚಿವ ಆರ್ ಸಿಬಿಯ ಕಟ್ಟಾ ಅಭಿಮಾನಿಯಂತೆ: ಅದಕ್ಕೆ ಕಾರಣ ಇವರು

Photo Credit: X

ಸಿಡ್ನಿ: ಆಸ್ಟ್ರೇಲಿಯಾದ ಸಚಿವ ಟಿಮ್ ವ್ಯಾಟ್ಸ್ ಐಪಿಎಲ್ ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಕಟ್ಟಾ ಅಭಿಮಾನಿಯಂತೆ. ಅದಕ್ಕೆ ಕಾರಣ ಈ ಆಟಗಾರ ಎಂದು ಅವರು ಬಹಿರಂಗಪಡಿಸಿದ್ದಾರೆ.

ಆಸ್ಟ್ರೇಲಿಯಾ ಪ್ರವಾಸ ಮಾಡಿರುವ ಟೀಂ ಇಂಡಿಯಾವನ್ನು ಮೊನ್ನೆಯಷ್ಟೇ ಆಸೀಸ್ ಪ್ರಧಾನಿಗಳು ತಮ್ಮ ಅಧಿಕೃತ ನಿವಾಸಕ್ಕೆ ಕರೆಸಿ ಗೌರವಿಸಿದ್ದರು. ಈ ವೇಳೆ ಆಸ್ಟ್ರೇಲಿಯಾದ ಪ್ರಧಾನಿ ಮತ್ತು ಇತರೆ ಸಚಿವರು ಟೀಂ ಇಂಡಿಯಾ ಆಟಗಾರರನ್ನು ಭೇಟಿ ಮಾಡಿದ್ದಾರೆ. ಈ ಪೈಕಿ ಟಿಮ್ ವ್ಯಾಟ್ ಟ್ವಿಟರ್ ನಲ್ಲಿ ಕುತೂಹಲಕಾರೀ ವಿಚಾರವನ್ನು ಬಹಿರಂಗಪಡಿಸಿದ್ದಾರೆ.

ಟೀಂ ಇಂಡಿಯಾ ದಿಗ್ಗಜ ಆಟಗಾರ ವಿರಾಟ್ ಕೊಹ್ಲಿ ಜೊತೆಗೆ ಸೆಲ್ಫೀ ತೆಗೆಸಿಕೊಂಡಿದ್ದ ಟಿಮ್ ಇದನ್ನು ಟ್ವೀಟ್ ಮಾಡಿದ್ದು ನಾನು ಆರ್ ಸಿಬಿ ಅಭಿಮಾನಿ. ಅದಕ್ಕೆ ಕಾರಣ ವಿರಾಟ್ ಕೊಹ್ಲಿ. ಅವರು ಆರ್ ಸಿಬಿ ತಂಡದಲ್ಲಿರುವರೆಗೂ ನಾನು ಆರ್ ಸಿಬಿ ಅಭಿಮಾನಿಯಾಗಿಯೇ ಇರುತ್ತೇನೆ ಎಂದು ಟಿಮ್ ವ್ಯಾಟ್ ಹೇಳಿದ್ದಾರೆ.

‘ಆಸ್ಟ್ರೇಲಿಯಾ ಮನೋಭಾವದ ಟೀಂ ಇಂಡಿಯಾದ ಕ್ರಿಕೆಟಿಗನನ್ನು ಭೇಟಿಯಾಗಲು ಖುಷಿಯಾಗಿದೆ. ನಾನು ವಿರಾಟ್ ಕೊಹ್ಲಿಗೆ ಹೇಳಿದ್ದೇನೆ, ಐಪಿಎಲ್ ನಲ್ಲಿ ನಾನು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಅಭಿಮಾನಿ ಎಂದು. ಯಾಕೆಂದರೆ ಆಗ ಮಾತ್ರ ನಾನು ಅವರ ಪರವಾಗಿ ಚಿಯರ್ ಮಾಡಬಹುದು. ವಿರಾಟ್ ಕೊಹ್ಲಿಗೆ ಆಸ್ಟ್ರೇಲಿಯಾದ ಮನೋಭಾವವಿದೆ. ಹೀಗಾಗಿ ಆತ ನನ್ನ ಮೆಚ್ಚಿನ ಆಟಗಾರ, ಆತನಿಗೆ ನನ್ನಿಂದ ಅಷ್ಟು ಸಾಧ್ಯವೋ ಅಷ್ಟು ವಿಶೇಷವಾಗಿ ಹೊಗಳಿಕೆ ನೀಡಿದ್ದೇನೆ. ಆತ ಆಸ್ಟ್ರೇಲಿಯನ್ನನಂತೆ ಆಡುವುದು ನನಗೆ ಇಷ್ಟ ಎಂದು ಹೇಳಿದ್ದೇನೆ. ಆದರೆ ಆಸ್ಟ್ರೇಲಿಯಾ ವಿರುದ್ಧ ಆಡುವಾಗ ಇಷ್ಟಪಡಲ್ಲ’ ಎಂದಿದ್ದಾರೆ ವ್ಯಾಟ್.