ಮುಂಬೈ: ಸುಶಾಂತ್ ಸಿಂಗ್ ರಜಪೂತ್ ಆತ್ಮಹತ್ಯೆ ಮಾಡಿಕೊಂಡಿದ್ದಕ್ಕೆ ಬಾಲಿವುಡ್ ನಲ್ಲಿ ಸ್ವಜನ ಪಕ್ಷಪಾತವೇ ಕಾರಣ ಎಂಬ ಆರೋಪದ ಬೆನ್ನಲ್ಲೇ ದಿವಂಗತ ನಟಿ ಜಿಯಾ ಖಾನ್ ತಾಯಿ ರಬಿಯಾ ಸಲ್ಮಾನ್ ಖಾನ್ ವಿರುದ್ಧ ಗಂಭೀರ ಆರೋಪ ಮಾಡಿದ್ದಾರೆ.
2015 ರಲ್ಲಿ ತೀರಿಕೊಂಡಿದ್ದ ಜಿಯಾ ಖಾನ್ ಆತ್ಮಹತ್ಯೆ ಮಾಡಿಕೊಂಡಿದ್ದರು ಎಂದು ವರದಿಯಾಗಿತ್ತು. ಆದರೆ ಬಳಿಕ ಅವರ ಸಾವಿಗೆ ಗೆಳೆಯ ಸೂರಜ್ ಪಾಂಚೋಲಿ ಜತೆಗಿನ ವೈಮನಸ್ಯ ಕಾರಣ ಎಂಬ ಅನುಮಾನ ಹರಡಿತ್ತು. ಇದು ವಿವಾದವಾದ ಹಿನ್ನಲೆಯಲ್ಲಿ ಪ್ರಕರಣ ವಿಚಾರಣೆಯನ್ನು ಸಿಬಿಐಗೆ ವಹಿಸಲಾಗಿತ್ತು.
ಆದರೆ ಸಿಬಿಐ ಅಧಿಕಾರಿಗಳಿಗೆ ನಿತ್ಯ ಕರೆ ಮಾಡಿ ಸಲ್ಮಾನ್ ಆ ಹುಡುಗನನ್ನು ಬಿಟ್ಟು ಬಿಡಿ. ಈ ಪ್ರಕರಣದಲ್ಲಿ ಆತನನ್ನು ಪ್ರಶ್ನೆ ಮಾಡಬೇಡಿ. ನಾನು ಆತನ ಮೇಲೆ ಸಾಕಷ್ಟು ಹಣ ಹೂಡಿಕೆ ಮಾಡಿದ್ದೇನೆ ಎಂದು ಒತ್ತಡ ಹೇರುತ್ತಿದ್ದರು. ಹೀಗಾಗಿ ನಾವೇನು ಮಾಡಲಾಗುತ್ತಿಲ್ಲ ಮೇಡಂ ಎಂದು ಸಿಬಿಐ ಅಧಿಕಾರಿಯೊಬ್ಬರೇ ನನ್ನ ಎದುರು ಅಸಹಾಯಕತೆ ವ್ಯಕ್ತಪಡಿಸಿದ್ದರು. ಇದರ ಬಗ್ಗೆ ನಾನು ಕೋರ್ಟ್ ಗಮನಕ್ಕೂ ತಂದಿದ್ದೆ ಎಂದು ಜಿಯಾ ಖಾನ್ ತಾಯಿ ವಿಡಿಯೋ ಸಂದೇಶ ಮೂಲಕ ಆರೋಪ ಹೊರಿಸಿದ್ದಾರೆ.
