ಶೇಂಗಾ ಬರ್ಫಿ ಮಾಡಿ ರುಚಿ ಸವಿಯಿರಿ

ಶೇಂಗಾ ಬರ್ಫಿಯನ್ನು ಸಾಮಾನ್ಯವಾಗಿ ಎಲ್ಲಾ ವಯಸ್ಸಿನವರು ಇಷ್ಟಪಡುತ್ತಾರೆ. ಇದನ್ನು ತಿನ್ನುವಾಗ ಮಧ್ಯ ಮಧ್ಯ ಸಿಗುವ ಶೇಂಗಾ ಬೀಜಗಳು ಇದರ ರುಚಿಯನ್ನು ಇನ್ನಷ್ಟು ಹೆಚ್ಚಿಸುತ್ತದೆ. ಮತ್ತು ಕಡಿಮೆ ಖರ್ಚಿನಲ್ಲಿ ಇದನ್ನು ಮಾಡಬಹುದು. ಹಾಗಾದರೆ ಮಾಡುವುದು ಹೇಗೆ ಎಂದು ನೋಡೋಣ ಬನ್ನಿ.

ಬೇಕಾಗುವ ಸಾಮಗ್ರಿಗಳು:

ಶೇಂಗಾ 1 ಕಪ್

ಸಕ್ಕರೆ 3/4 ಕಪ್

ತುಪ್ಪ 1 ಚಮಚ

 ಮಾಡುವ ವಿಧಾನ:

ಮೊದಲು ಶೇಂಗಾವನ್ನು ಸಣ್ಣ ಉರಿಯಲ್ಲಿ ಗರಿ ಗರಿಯಾಗಿ ಹುರಿದುಕೊಳ್ಳಬೇಕು. ಆದರ ಬಿಸಿ ಆರಿದ ಮೇಲೆ ಅದರ ಮೇಲಿನ ತೆಳುವಾದ ಸಿಪ್ಪೆಯನ್ನು ತೆಗೆಯಬೇಕು. ನಂತರ ಅರ್ಧ ಶೇಂಗಾವನ್ನು ಮಿಕ್ಸಿ ಜಾರಿನಲ್ಲಿ ಹಾಕಿ ಒಂದು ಸುತ್ತು ತಿರುಗಿಸಬೇಕು ಅಂದರೆ ಶೇಂಗಾ 2 ರಿಂದ 3 ಚೂರು ಆಗಬೇಕು ಅಷ್ಟೇ. ಉಳಿದದ್ದನ್ನು ಹಾಗೆಯೇ ಸೇರಿಸಬೇಕು. ನಂತರ ದಪ್ಪ ತಳದ ಬಾಣಲೆಯನ್ನು ತೆಗೆದುಕೊಂಡು ಅದರಲ್ಲಿ ಸಕ್ಕರೆಯನ್ನು ಹಾಕಿ 1/2 ಚಮಚ ತುಪ್ಪ ಹಾಕಿ ಸಣ್ಣ ಉರಿಯಲ್ಲಿ ಅದು ಕರಗಿ ಸಕ್ಕರೆಯೂ ಪೂರ್ತಿಯಾಗಿ ಕರಗಿದ ಮೇಲೆ ಅದರ ಪಾಕವು ಹೊಂಬಣ್ಣಕ್ಕೆ ತಿರುಗುತ್ತದೆ.

ನಂತರ ಶೇಂಗಾವನ್ನು ಹಾಕಿ ಚೆನ್ನಾಗಿ ಕಲೆಸಬೇಕು. ನಂತರ ಒಂದು ಸ್ವಚ್ಛವಾದ ಕಲ್ಲಿನ ಮೇಲೆ (ಪ್ಲೇಟಿನಲ್ಲಿ ಈ ಮಿಶ್ರಣವನ್ನು ಹರವಬಾರದು. ಏಕೆಂದರೆ ಅದನ್ನು ಪ್ಲೇಟಿನಿಂದ ತೆಗೆಯುವುದು ತುಂಬಾ ಕಷ್ಟಕರ) ತುಪ್ಪವನ್ನು ಸವರಿ ಈ ಮಿಶ್ರಣವನ್ನು ಅದರ ಮೇಲೆ ಹಾಕಿ ಲಟ್ಟಣಿಗೆಯಿಂದ ಅದನ್ನು ಲಟ್ಟಿಸಿ ಅದು ಪೂರ್ತಿಯಾಗಿ ಬಿಸಿ ಆರುವುದರೊಳಗಾಗಿ ಚಾಕುವಿನಿಂದ ಹಲ್ವದ ತರಹ ಕತ್ತರಿಸಿದರೆ ರುಚಿ ರುಚಿಯಾದ ಶೇಂಗಾ ಬರ್ಫಿ ಸವಿಯಲು ಸಿದ್ಧ.