ಜೈಪುರ: ಬೆಂಕಿಗೆ ಆಹುತಿಯಾಗಿದ್ದ ಚಾಲಕರಹಿತ ಕಾರೊಂದು ನಡು ರಸ್ತೆಯಲ್ಲಿ ಎಗ್ಗಿಲ್ಲದೇ ಓಡಾಡುತ್ತಿದ್ದರೆ ಸುತ್ತಮುತ್ತಲಿದ್ದ ಜನ ಎದ್ದೆನೋ ಬಿದ್ದೆನೋ ಎಂದು ಓಡಿದ ವೈರಲ್ ವಿಡಿಯೋ ಈಗ ಎಲ್ಲರ ಗಮನಸೆಳೆಯುತ್ತಿದೆ.
ಜೈಪುರದ ಅಜ್ಮೀರ್ ರಸ್ತೆಯಲ್ಲಿ ಈ ಘಟನೆ ನಡೆದಿದೆ. ತನ್ನಿಂದ ತಾನೇ ಚಾಲನೆಗೊಳಗಾದ ಕಾರು, ಬೆಂಕಿ ಉಗುಳುತ್ತಾ ರಸ್ತೆಯಲ್ಲಿ ಎಗ್ಗಿಲ್ಲದೇ ಚಲಿಸಿದ್ದು, ಅಕ್ಕಪಕ್ಕದ ವಾಹನಗಳು, ರಸ್ತೆ ವಿಭಜಕಕ್ಕೆ ಗುದ್ದುತ್ತಾ ಸಂಚರಿಸಿದೆ. ಹೊತ್ತಿ ಉರಿಯುತ್ತಿದ್ದ ಕಾರು ತಮ್ಮತ್ತ ಬಂದರೆ ಎಂದು ಜನ ತಮ್ಮ ವಾಹನವನ್ನೂ ಅರ್ಧದಲ್ಲೇ ಬಿಟ್ಟು ಓಡಿದ್ದಾರೆ.
ಕೊನೆಗೆ ರಸ್ತೆ ವಿಭಜಕವೊಂದಕ್ಕೆ ಗುದ್ದಿ ಕಾರು ತಾನಾಗಿಯೇ ನಿಂತಿದೆ. ಆದರೆ ಅಷ್ಟರಲ್ಲಿ ಅದು ಭಾಗಶಃ ಸುಟ್ಟು ಕರಕಲಾಗಿದೆ. ಅದೃಷ್ಟವಶಾತ್ ಕಾರಿನ ಅಕ್ಕಪಕ್ಕ ಇದ್ದ ಯಾರಿಗೂ ಯಾವುದೇ ಗಾಯ, ನೋವುಗಳಾಗಿಲ್ಲ. ಇತರೆ ವಾಹನಕ್ಕೆ ಗುದ್ದಿದರೂ ಅವು ಯಾವುದಕ್ಕೂ ಬೆಂಕಿ ತಗುಲಿಲ್ಲ.
ಆದರೆ ಬೆಂಕಿ ಉಂಡೆಯಂತೆ ತಮ್ಮನ್ನೇ ಅಟ್ಟಾಡಿಸಿಕೊಂಡು ಬರುತ್ತಿರುವ ಕಾರನ್ನು ನೋಡಿ ಜನ ಭಯಭೀತರಾಗಿ ಓಡಿದ್ದಾರೆ. ಈ ರೀತಿ ಹೆದ್ದಾರಿಯಲ್ಲಿ ಕಾರಿಗೆ ಬೆಂಕಿ ತಗುಲಿರುವುದು ವಿಶೇಷವೇನಲ್ಲ. ಆದರೆ ಬೆಂಕಿ ತಗುಲಿದ ಬಳಿಕವೂ ಆ ಕಾರು ಚಾಲಕನಿಲ್ಲದಿದ್ದರೂ ರಸ್ತೆಯಲ್ಲಿ ಓಡಾಡಿದ್ದು ವಿಶೇಷವಾಗಿತ್ತು.