ಅಪ್ಪನೇ ಕಳ್ಳತನ ಮಾಡಿದ್ರು, ನಾನು ಮಾಡ್ತೀನಿ… ಮಕ್ಕಳ ಮುಂದೆ ಏನು ಮಾಡಬಾರದು ಎಂಬುದಕ್ಕೆ ಈ ವಿಡಿಯೋ ಸಾಕ್ಷಿ

ಮಕ್ಕಳು ಕೇವಲ ದೊಡ್ಡವರು ಹೇಳುವ ಮಾತುಗಳನ್ನು ಕೇಳಿ ಕಲಿಯುವುದಿಲ್ಲ; ಬದಲಿಗೆ ತಮ್ಮ ಕಣ್ಣೆದುರು ಹಿರಿಯರು ಏನು ಮಾಡುತ್ತಾರೋ ಅದನ್ನೇ ಅನುಕರಿಸುತ್ತಾರೆ ಎಂಬುದಕ್ಕೆ ರಾಜಸ್ಥಾನದ ಜೋಧ್‌ಪುರದಲ್ಲಿ ನಡೆದ ಘಟನೆಯೊಂದು ಅತ್ಯಂತ ಸ್ಪಷ್ಟ ಸಾಕ್ಷಿಯಾಗಿದೆ. ಜೋಧ್‌ಪುರದ ಅಂಗಡಿಯೊಂದರ ಸಿಸಿಟಿವಿ ಕೆಮೆರಾದಲ್ಲಿ ಸೆರೆಹಿಡಿಯಲಾದ ದೃಶ್ಯವೊಂದು ಪ್ರತಿಯೊಬ್ಬ ಪೋಷಕರೂ ಗಂಭೀರವಾಗಿ ಆಲೋಚಿಸುವಂತೆ ಮಾಡಿದೆ.

ಸಿಸಿಟಿವಿ ದೃಶ್ಯದಲ್ಲಿ ಏನಿದೆ?

ವೈರಲ್ ಆಗಿರುವ ಈ ಸಿಸಿಟಿವಿ ವಿಡಿಯೋದಲ್ಲಿ, ತಂದೆಯೊಬ್ಬ ಅಂಗಡಿಗೆ ಬಂದಾಗ ವಸ್ತುವೊಂದನ್ನು ಕದ್ದು ತನ್ನ ಜೇಬಿಗೆ ಇಿಟ್ಟುಕೊಳ್ಳುವುದನ್ನು ಕಾಣಬಹುದು. ಕೇವಲ ಕೆಲವೇ ಕ್ಷಣಗಳಲ್ಲಿ, ಆತನ ಪಕ್ಕದಲ್ಲೇ ನಿಂತಿದ್ದ ಸಣ್ಣ ಮಗು, ತನ್ನ ತಂದೆ ಮಾಡಿದ ಕೃತ್ಯವನ್ನೇ ಅತ್ಯಂತ ಮುಗ್ಧವಾಗಿ ಅನುಕರಿಸಿ, ಅದೇ ಮಾದರಿಯಲ್ಲಿ ವಸ್ತುವೊಂದನ್ನು ಕದ್ದು ತನ್ನ ಜೇಬಿಗೆ ತುರುಕಿಕೊಳ್ಳುತ್ತದೆ. ಮಗುವಿಗೆ ತಾನು ಮಾಡುತ್ತಿರುವುದು ಸರಿ ಅಥವಾ ತಪ್ಪು ಎಂಬ ಅರಿವಿಲ್ಲ, ಆದರೆ ತನ್ನ ತಂದೆ ಮಾಡಿದ್ದನ್ನು ಅನುಕರಿಸುವುದು ಸರಿಯಾದದ್ದು ಎಂದೇ ಆ ಮಗು ಭಾವಿಸಿದೆ.

"ಮನೆಯೇ ಮೊದಲ ಪಾಠಶಾಲೆ, ಜನನಿ ತಾನೇ ಮೊದಲ ಗುರು" ಎಂಬ ಗಾದೆ ಮಾತು ಈ ಘಟನೆಗೆ ಕನ್ನಡಿ ಹಿಡಿದಂತಿದೆ. ಪೋಷಕರು ತಮ್ಮ ಮಕ್ಕಳಿಗೆ "ಸುಳ್ಳು ಹೇಳಬೇಡ, ಕದಿಯಬೇಡ, ಒಳ್ಳೆಯವರಾಗಿರು" ಎಂದು ನೂರಾರು ಬುದ್ಧಿಮಾತುಗಳನ್ನು ಹೇಳಬಹುದು. ಆದರೆ ತಮ್ಮ ಸ್ವಂತ ನಡವಳಿಕೆಯಲ್ಲಿ ಅದನ್ನು ತರದಿದ್ದರೆ, ಆ ಮಾತುಗಳಿಗೆ ಯಾವುದೇ ಮೌಲ್ಯವಿರುವುದಿಲ್ಲ.

ಮಕ್ಕಳ ಮನಸ್ಸು ಹಸಿ ಮಣ್ಣಿನಂತೆ. ನಾವು ಅವರ ಎದುರು ತೋರುವ ಪ್ರತಿಯೊಂದು ಕ್ರಿಯೆ, ಕೋಪ, ಪ್ರಾಮಾಣಿಕತೆ, ಅಥವಾ ಅನೈತಿಕ ನಡವಳಿಕೆಗಳನ್ನು ಅವರು ಅತ್ಯಂತ ವೇಗವಾಗಿ ಹೀರಿಕೊಳ್ಳುತ್ತಾರೆ. ಜೋಧ್‌ಪುರದ ಈ ಘಟನೆಯು ಕೇವಲ ಒಂದು ಸಣ್ಣ ಕಳ್ಳತನದ ಸುದ್ದಿಯಲ್ಲ, ಬದಲಿಗೆ ಪ್ರತಿಯೊಬ್ಬ ಪೋಷಕರೂ ತಮ್ಮ ಮಕ್ಕಳ ಮುಂದೆ ಹೇಗೆ ನಡೆದುಕೊಳ್ಳಬೇಕು ಎಂಬ ಮಹತ್ವದ ಪಾಠವನ್ನು ನೆನಪಿಸುವ ಘಟನೆಯಾಗಿದೆ.

pic.twitter.com/cwJnUpRYqs — Shagufta khan (@Digital_khan01) September 8, 2026