Publish Date: Thu, 02 Jul 2026 (09:30 IST)
Updated Date: Thu, 02 Jul 2026 (09:36 IST)
ಮುಂಬೈ: ಮುಂಬೈನ ಜೀವಾಳವಾಗಿರುವ ಲೋಕಲ್ ಟ್ರೈನ್‌ನಲ್ಲಿ ಪ್ರಯಾಣಿಕರ ಸುರಕ್ಷತೆಯ ಬಗ್ಗೆ ತೀವ್ರ ಆತಂಕ ಮೂಡಿಸುವ ಮತ್ತೊಂದು ಆಘಾತಕಾರಿ ಘಟನೆ ಬೆಳಕಿಗೆ ಬಂದಿದೆ. ಚಲಿಸುತ್ತಿದ್ದ ರೈಲಿನಲ್ಲಿ ಕುಡಿದ ಮತ್ತಿನಲ್ಲಿದ್ದ ಪ್ರಯಾಣಿಕನೊಬ್ಬ, "ನಾನು ಈಗಾಗಲೇ 4 ಕೊಲೆಗಳನ್ನು ಮಾಡಿದ್ದೇನೆ, ಮುಂದಿನ ಸರದಿ ನಿನ್ನದೇ!" ಎಂದು ಸಹ-ಪ್ರಯಾಣಿಕರಿಗೆ ಬಹಿರಂಗವಾಗಿ ಮರಣ ಬೆದರಿಕೆ ಹಾಕಿದ್ದು, ಇಡೀ ಬೋಗಿಯಲ್ಲಿ ಭೀತಿಯ ವಾತಾವರಣ ಸೃಷ್ಟಿಸಿದೆ.
ಕೆಲವೇ ದಿನಗಳ ಹಿಂದಷ್ಟೇ ಮುಂಬೈ ಲೋಕಲ್ ಟ್ರೈನ್‌ನಲ್ಲಿ ರೈಲಿನ ಬಾಗಿಲು ಮುಚ್ಚುವ ವಿಚಾರವಾಗಿ ನಡೆದ ಗಲಾಟೆಯಲ್ಲಿ 22 ವರ್ಷದ ಯುವಕ ಮಾಯಾಂಕ್ ಲೋಹರ್ ಎಂಬಾತನನ್ನು ಸಾರ್ವಜನಿಕವಾಗಿ ಚಾಕುವಿನಿಂದ ಇರಿದು ಭೀಕರವಾಗಿ ಹತ್ಯೆ ಮಾಡಲಾಗಿತ್ತು. ಆ ಘಟನೆಯ ಬೆನ್ನಲ್ಲೇ ಈ ಹೊಸ ಆತಂಕಕಾರಿ ಘಟನೆ ನಡೆದಿರುವುದು ದಿನನಿತ್ಯ ಪ್ರಯಾಣಿಸುವ ಲಕ್ಷಾಂತರ ಪ್ರಯಾಣಿಕರಲ್ಲಿ ನಡುಕ ಹುಟ್ಟಿಸಿದೆ. ರೈಲಿನಲ್ಲಿ ತೀವ್ರವಾಗಿ ಕುಡಿದಿದ್ದ ವ್ಯಕ್ತಿಯೊಬ್ಬ ಸಹ-ಪ್ರಯಾಣಿಕರೊಂದಿಗೆ ವಿನಾಕಾರಣ ಜಗಳ ತೆಗೆದಿದ್ದಾನೆ.
ಆತನ ವರ್ತನೆಯನ್ನು ಪ್ರಶ್ನಿಸಿದಾಗ, ತಾನು ಈಗಾಗಲೇ ನಾಲ್ಕು ಜನರನ್ನು ಕೊಲೆ ಮಾಡಿರುವುದಾಗಿ ಅರಚಾಡಿದ್ದಾನೆ. ಅಷ್ಟಕ್ಕೇ ನಿಲ್ಲದೆ, ಹತ್ತಿರವಿದ್ದ ಪ್ರಯಾಣಿಕರನ್ನು ಬೆರಳು ಮಾಡಿ ತೋರಿಸುತ್ತಾ "ಮುಂದಿನ ಸರದಿ ನಿನ್ನದೇ" ಎಂದು ಗಂಟಲ ಹರಿದುಕೊಳ್ಳುತ್ತಾ ಬೆದರಿಸಿದ್ದಾನೆ. ಮದ್ಯಪಾನಿಯ ಈ ಉಗ್ರಾವತಾರವನ್ನು ಕಂಡು ಬೋಗಿಯಲ್ಲಿದ್ದ ಪ್ರಯಾಣಿಕರು ಜೀವಭಯದಿಂದ ದಿಕ್ಕಾಪಾಲಾಗಿದ್ದಾರೆ.ಇತ್ತೀಚಿನ ರೈಲು ದುರಂತದ ನೆರಳು: ಚರ್ಚ್‌ಗೇಟ್-ನಲಸೋಪಾರಾ ಫಾಸ್ಟ್ ಲೋಕಲ್ ಟ್ರೈನ್‌ನ ಫರ್ಸ್ಟ್‌ ಕ್ಲಾಸ್ ಬೋಗಿಯಲ್ಲಿ ಭಾರಿ ಮಳೆಯ ಕಾರಣಕ್ಕೆ ಬಾಗಿಲು ಮುಚ್ಚುವ ಸಣ್ಣ ವಿವಾದಕ್ಕೆ ಯುವಕನೊಬ್ಬನನ್ನು ಭೀಕರವಾಗಿ ಕೊಲ್ಲಲಾಗಿತ್ತು. ಆರೋಪಿ ರೋಷನ್ ಸುವರ್ಣ ಎಂಬಾತನನ್ನು ಪೊಲೀಸರು ಬಂಧಿಸಿದ್ದಾರಾದರೂ, ರೈಲಿನಲ್ಲಿ ಸಾಮಾನ್ಯ ಜನರ ಸುರಕ್ಷತೆ ಎಷ್ಟರಮಟ್ಟಿಗಿದೆ ಎಂಬ ಪ್ರಶ್ನೆ ಹಾಗೇ ಉಳಿದಿದೆ.
About Writer
ಕೃಷ್ಣವೇಣಿ ಕೆ
Completed bachelor degree in Journalism and communication in SDMC Ujire. 15 years of experience as journalist. Worked as sub editor and reporter. Specialties in sports, politics and entertainment.....
ಮತ್ತಷ್ಟು ಓದಿ
