Publish Date: Thu, 02 Jul 2026 (09:02 IST)
Updated Date: Thu, 02 Jul 2026 (09:06 IST)
ಮುಂಬೈ: ಎತ್ತರದ ಕಟ್ಟಡದ ಬಾಲ್ಕನಿಯಿಂದ ಜಿಗಿದು ಆತ್ಮಹತ್ಯೆಗೆ ಯತ್ನಿಸುತ್ತಿದ್ದ ಯುವಕನೊಬ್ಬನನ್ನು ಸ್ಥಳೀಯ ನಿವಾಸಿಯೊಬ್ಬರು ತಮ್ಮ ತ್ವರಿತ ಚಿಂತನೆ ಮತ್ತು ಧೈರ್ಯದಿಂದ ರಕ್ಷಿಸಿದ ರೋಚಕ ಘಟನೆ ಮುಂಬೈನ ಅಂಧೇರಿ ವೆಸ್ಟ್ನ ಮನೀಶ್ ನಗರದಲ್ಲಿ ನಡೆದಿದೆ.
ಮನೀಶ್ ನಗರದ ಬಹುಮಹಡಿ ಕಟ್ಟಡವೊಂದರ ಬಾಲ್ಕನಿಯ ಅಂಚಿನಲ್ಲಿ ನಿಂತಿದ್ದ ಯುವಕನೊಬ್ಬ ಕೆಳಗೆ ಹಾರಲು ಮುಂದಾಗಿದ್ದ. ಇದನ್ನು ಕಂಡು ಕೆಳಗೆ ಜಮಾಯಿಸಿದ್ದ ಜನರು ತೀವ್ರ ಆತಂಕಗೊಂಡು ಕಿರುಚಾಡಲಾರಂಭಿಸಿದರು. ಸ್ಥಳದಲ್ಲಿ ತೀವ್ರ ಗದ್ದಲ ಮತ್ತು ಬಿಗುವಿನ ವಾತಾವರಣ ನಿರ್ಮಾಣವಾಗಿತ್ತು. ಕ್ಷಣಕ್ಷಣಕ್ಕೂ ಆತಂಕ ಹೆಚ್ಚಾಗುತ್ತಿದ್ದಂತೆ, ಯಾವುದೇ ಕ್ಷಣದಲ್ಲಾದರೂ ದುರಂತ ಸಂಭವಿಸುವ ಸಾಧ್ಯತೆ ಇತ್ತು.
ಆದರೆ, ನೆರೆದಿದ್ದ ಜನರ ಆತಂಕ ಮತ್ತು ಗದ್ದಲದ ನಡುವೆಯೂ ಕೆಂಪು ಶರ್ಟ್ ಧರಿಸಿದ್ದ ವ್ಯಕ್ತಿಯೊಬ್ಬರು ಅತ್ಯಂತ ಶಾಂತವಾಗಿ ಪರಿಸ್ಥಿತಿಯನ್ನು ನಿಭಾಯಿಸಿದರು. ಯಾವುದೇ ಗಾಬರಿ ಅಥವಾ ತರಾತುರಿ ತೋರದೆ, ಆತ್ಮಹತ್ಯೆಗೆ ಯತ್ನಿಸುತ್ತಿದ್ದ ಯುವಕನ ಗಮನಕ್ಕೆ ಬಾರದಂತೆ ನಿಧಾನವಾಗಿ ಆತನನ್ನು ಸಮೀಪಿಸಿದರು. ಕಣ್ಣುಮುಚ್ಚಿ ತೆರೆಯುವಷ್ಟರಲ್ಲಿ ತ್ವರಿತವಾಗಿ ಕಾರ್ಯಪ್ರವೃತ್ತರಾಗಿ, ಯುವಕನನ್ನು ಬಲವಾಗಿ ಹಿಡಿದು ಸುರಕ್ಷಿತವಾಗಿ ಬಾಲ್ಕನಿಯೊಳಗೆ ಎಳೆದುಕೊಂಡರು.
ಈ ಅದ್ಭುತ ಕಾರ್ಯಾಚರಣೆಯಿಂದಾಗಿ ಯುವಕ ಪ್ರಾಣಾಪಾಯದಿಂದ ಪಾರಾಗಿದ್ದು, ಆತ ಈಗ ಸಂಪೂರ್ಣ ಸುರಕ್ಷಿತವಾಗಿದ್ದಾನೆ. ಯುವಕನನ್ನು ರಕ್ಷಿಸಿದ ತಕ್ಷಣವೇ ಕೆಳಗೆ ನೆರೆದಿದ್ದ ಜನರು ನೆಮ್ಮದಿಯ ನಿಟ್ಟುಸಿರು ಬಿಟ್ಟರು.
ತಮ್ಮ ಜೀವದ ಹಂಗು ತೊರೆದು, ಅತ್ಯಂತ ಜಾಣ್ಮೆ ಹಾಗೂ ಸಮಯಪ್ರಜ್ಞೆಯಿಂದ ಯುವಕನ ಪ್ರಾಣ ಉಳಿಸಿದ ಆ 'ಕೆಂಪು ಶರ್ಟ್' ವ್ಯಕ್ತಿಯ ಧೈರ್ಯಕ್ಕೆ ಇದೀಗ ಎಲ್ಲೆಡೆ ವ್ಯಾಪಕ ಪ್ರಶಂಸೆ ವ್ಯಕ್ತವಾಗುತ್ತಿದೆ. ಈ ಘಟನೆಯು ತುರ್ತು ಪರಿಸ್ಥಿತಿಯಲ್ಲಿ ಸಾರ್ವಜನಿಕರ ಸಮಯಪ್ರಜ್ಞೆ ಎಷ್ಟು ಮುಖ್ಯ ಎಂಬುದನ್ನು ಹಾಗೂ ಜೀವ ಉಳಿಸುವ ಮಾನವೀಯತೆಯನ್ನು ಮತ್ತೊಮ್ಮೆ ಸಾಬೀತುಪಡಿಸಿದೆ.
About Writer
ಕೃಷ್ಣವೇಣಿ ಕೆ
Completed bachelor degree in Journalism and communication in SDMC Ujire. 15 years of experience as journalist. Worked as sub editor and reporter. Specialties in sports, politics and entertainment.....
ಮತ್ತಷ್ಟು ಓದಿ
