ಇಂಧೋರ್: ಸಾವು ಎನ್ನುವುದು ಎಷ್ಟು ಅನಿರೀಕ್ಷಿತ ಎಂದರೆ ಯಾವಾಗ ಬರುತ್ತದೆ ಎಂದು ಊಹಿಸಲೂ ಸಾಧ್ಯವಿಲ್ಲ. ಇಂಧೋರ್ ನಲ್ಲಿ ಯೋಧರೊಬ್ಬರು ಧ್ವಜ ಹಿಡಿದು ನೃತ್ಯ ಮಾಡುತ್ತಲೇ ಸಾವನ್ನಪ್ಪಿದ ದೃಶ್ಯ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ.
ಮಾಜಿ ಯೋಧರೊಬ್ಬರು ದೇಶಭಕ್ತಿ ಬಗ್ಗೆ ಕಾರ್ಯಕ್ರಮವೊಂದು ನಡೆಸಿಕೊಡುತ್ತಿರುತ್ತಾರೆ. ಇದರ ನಡುವೆ ಅವರು ರಾಷ್ಟ್ರಧ್ವಜ ಹಿಡಿದು ನೃತ್ಯ ಮಾಡಲು ಹೊರಟಾಗಲೇ ಕುಸಿದು ಬೀಳುತ್ತಾರೆ. ಆದರೆ ಅಲ್ಲಿದ್ದವರಿಗೆ ಯಾರಿಗೂ ಏನಾಗಿದೆ ಎಂದು ಗೊತ್ತೇ ಆಗುವುದಿಲ್ಲ.
ಅವರು ನೃತ್ಯದ ಭಾಗವಾಗಿ ಕುಸಿದು ಬಿದ್ದಂತೆ ನಾಟಕ ಮಾಡಿದ್ದಾರೆ ಎಂದು ಭಾವಿಸಿ ಆಯೋಜಕರೊಬ್ಬರು ಕೆಳಗೆ ಬಿದ್ದಿದ್ದ ಧ್ವಜವನ್ನು ಕೈಗೆತ್ತಿಕೊಂಡು ಜೋರಾಗಿ ಬೀಸುತ್ತಾರೆ. ಅಲ್ಲಿ ಕಾರ್ಯಕ್ರಮ ವೀಕ್ಷಿಸುತ್ತಿದ್ದವರೆಲ್ಲಾ ಇದು ಪರ್ಫಾರ್ಮೆನ್ಸ್ ಎಂದುಕೊಂಡು ಚಪ್ಪಾಳೆ ತಟ್ಟುತ್ತಲೇ ಇರುತ್ತಾರೆ. ಆಯೋಜಕರೂ ಕುಸಿದು ಬಿದ್ದ ಯೋಧನ ಸ್ಥಿತಿಯನ್ನು ಅರಿಯುವುದೇ ಇಲ್ಲ.
ಈ ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ. ಒಬ್ಬ ಯೋಧನಾಗಿ ರಾಷ್ಟ್ರಧ್ವಜ ಹಿಡಿದುಕೊಂಡೇ ಸಾವನ್ನಪ್ಪಿದ್ದಾರೆ. ವೈದ್ಯರು ಇದು ಹೃದಯಾಘಾತದಿಂದಾದ ಸಾವು ಎಂದು ಶಂಕಿಸಿದ್ದಾರೆ.