ನವದೆಹಲಿ: ಇಂದು ರಕ್ಷಾ ಬಂಧನವಾಗಿದ್ದು, ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿಗೆ ಸಹೋದರಿ ಪ್ರಿಯಾಂಕ ವಾದ್ರ ವಿಶೇಷ ವಿಡಿಯೋ ಮೂಲಕ ಶುಭಾಶಯ ಹೇಳಿದ್ದಾರೆ. ಈ ವಿಡಿಯೋ ನೋಡಿದರೆ ಇಬ್ಬರಲ್ಲಿ ಯಾರು ದೊಡ್ಡವರು ಎಂಬುದು ಸ್ಪಷ್ಟವಾಗುತ್ತದೆ.
ರಾಜೀವ್ ಗಾಂಧಿ ಮಕ್ಕಳ ಪೈಕಿ ರಾಹುಲ್ ಮತ್ತು ಪ್ರಿಯಾಂಕ ನಡುವೆ ಯಾರು ದೊಡ್ಡವರು ಎಂಬ ಬಗ್ಗೆ ಅನೇಕರಲ್ಲಿ ಅನುಮಾನಗಳಿವೆ. ಪ್ರಿಯಾಂಕ ಇಂದು ಹಂಚಿಕೊಂಡಿರುವ ವಿಡಿಯೋದಲ್ಲಿ ಎಲ್ಲರ ಅನುಮಾನಕ್ಕೆ ಸ್ಪಷ್ಟವಾದ ಉತ್ತರ ಸಿಗುತ್ತದೆ. ಇಬ್ಬರ ಅನೇಕ ಸುಂದರ ಕ್ಷಣಗಳ ವಿಡಿಯೋ ಹಂಚಿಕೊಂಡ ಪ್ರಿಯಾಂಕ ರಕ್ಷಾ ಬಂಧನಕ್ಕೆ ರಾಹುಲ್ ಗೆ ಶುಭ ಕೋರಿದ್ದಾರೆ.ಈ ವಿಡಿಯೋದಲ್ಲಿ ರಾಹುಲ್ ಮತ್ತು ಪ್ರಿಯಾಂಕ ತಮ್ಮ ಬಾಲ್ಯದ ಫೋಟೋಗಳನ್ನೂ ಹಂಚಿಕೊಂಡಿದ್ದಾರೆ.
ರಾಹುಲ್ ಗಾಂಧಿಗಿಂತ ಪ್ರಿಯಾಂಕ 2 ವರ್ಷ ಚಿಕ್ಕವರು. ರಾಹುಲ್ 1970 ರಲ್ಲಿ ಜನಿಸಿದ್ದರೆ ಪ್ರಿಯಾಂಕ 1972 ರಲ್ಲಿ ಜನಿಸಿದ್ದರು. ಇಬ್ಬರ ನಡುವೆ ಎರಡು ವರ್ಷಗಳ ಅಂತರವಿದೆ. ಈ ಮೂಲಕ ರಾಹುಲ್ ಅಣ್ಣನಾಗಿದ್ದರೆ ಪ್ರಿಯಾಂಕ ತಂಗಿ. ಈ ವಿಡಿಯೋದಲ್ಲೂ ಪ್ರಿಯಾಂಕ ಚುನಾವಣಾ ಸಮಾವೇಶದಲ್ಲಿ ನನ್ನ ಅಣ್ಣ ಎಂದು ಕರೆದಿರುವ ತುಣುಕನ್ನು ಸೇರಿಸಿಕೊಂಡಿದ್ದಾರೆ.
ಸಹೋದರ-ಸಹೋದರಿಯ ನಡುವಿನ ಸ್ನೇಹ ಪರ್ವದ ಸುಂದರ ದಿನಕ್ಕೆ ದೇಶದ ಎಲ್ಲಾ ನಾಗರಿಕರಿಗೆ ಶುಭಾಶಯಗಳು. ಈ ಸಹೋದರತ್ವದ ಭಾವ ನಮ್ಮೆಲ್ಲರನ್ನೂ ಒಗ್ಗೂಡಿಸಲಿ ಎಂದು ಪ್ರಿಯಾಂಕ ಭಾವನಾತ್ಮಕ ಸಂದೇಶ ಬರೆದು ಅಣ್ಣ ರಾಹುಲ್ ಗೆ ಶುಭ ಕೋರಿದ್ದಾರೆ.