ರಾಮಲಲ್ಲಾನ ನೋಡಲು ಅಯೋಧ್ಯೆ ರಾಮಮಂದಿರಕ್ಕೆ ಬಂದ ಹನುಮ

ಅಯೋಧ್ಯೆ: ರಾಮ ಎಲ್ಲಿ ಇರುತ್ತಾನೋ ಅಲ್ಲಿ ಹನುಮ ಇರುತ್ತಾನೆ ಎಂಬ ಮಾತು ಅಕ್ಷರಶಃ ನಿಜವಾಗಿದೆ. ಮೊನ್ನೆಯಷ್ಟೇ ಲೋಕಾರ್ಪಣೆಗೊಂಡಿರುವ ಅಯೋಧ್ಯೆಯ ರಾಮಮಂದಿರಕ್ಕೆ ರಾಮಲಲ್ಲಾನನ್ನು ನೋಡಲು ಹನುಮ ಬಂದಿದ್ದಾನೆ!

ರಾಮಮಂದಿರದ ಒಳಗೆ ಕೋತಿಯೊಂದು ಬಂದಿದ್ದು, ಯಾರಿಗೂ ತೊಂದರೆ ಮಾಡದೇ ಮಂದಿರವಿಡೀ ಓಡಾಡಿ ಹೊರಗೆ ಹೋಗಿದೆ. ಈ ವಿಚಾರವನ್ನು ಖುದ್ದು ರಾಮ ಜನ್ಮಭೂಮಿ ಟ್ರಸ್ಟ್ ಸೋಷಿಯಲ್ ಮೀಡಿಯಾದಲ್ಲಿ ಪ್ರಕಟಿಸಿದೆ.

ನಿನ್ನೆ ಸಂಜೆ 5.50 ರ ಸುಮಾರಿಗೆ ದಕ್ಷಿಣ ದ್ವಾರದ ಮೂಲಕ ದೇಗುಲ ಪ್ರವೇಶಿಸಿದ್ದ ಒಂದು ಕೋತಿ ಗರ್ಭಗುಡಿ ಪ್ರವೇಶಿಸಿ ಉತ್ಸವ ಮೂರ್ತಿಯ ಬಳಿ ತಲುಪಿದೆ.  ಕೋತಿ ಉತ್ಸವ ಮೂರ್ತಿಗೆ ತೊಂದರೆ ಮಾಡಬಹುದು ಎಂದು ಭಾವಿಸಿ ಭದ್ರತಾ ಸಿಬ್ಬಂದಿಗಳು ಕೋತಿಯತ್ತ ಧಾವಿಸಿದ್ದಾರೆ.

ಆದರೆ ಸಿಬ್ಬಂದಿಯನ್ನು ನೋಡಿದ ಕೋತಿ ಯಾವುದೇ ತೊಂದರೆ ಮಾಡದೇ ಉತ್ತರ ದ್ವಾರದ ಕಡೆಗೆ ಓಡಿದೆ. ಅಲ್ಲಿ ಗೇಟ್ ಮುಚ್ಚಿದ್ದರಿಂದ ಪೂರ್ವ ದ್ವಾರದ ಕಡೆಗೆ ತೆರಳಿ ಅಲ್ಲಿಂದ ಹೊರಹೋಗಿದೆ ಎಂದು ಟ್ರಸ್ಟ್ ತಿಳಿಸಿದೆ. ನಿಜಕ್ಕೂ ರಾಮನನ್ನು ನೋಡಲು ಬಂಟ ಹನುಮನೇ ಈ ರೀತಿ ಬಂದಿರಬಹುದು ಎಂದು ಟ್ರಸ್ಟ್ ಹೇಳಿದೆ.