ಬಡ ಪತಿಯೊಬ್ಬ ತನ್ನ ಮೃತ ಪತ್ನಿಯ ಶವವನ್ನು ಸಾಗಿಸಲು ಹಣವಿಲ್ಲದೆ, ಹೆಗಲ ಮೇಲೆ ಹೊತ್ತು ಸಾಗಿದ ಹೃದಯವಿದ್ರಾವಕ ಕಥೆಯನ್ನು ಓದಿರುತ್ತೀರ. ಮತ್ತೀಗ ಅಂತಹದೇ ಘಟನೆಯೊಂದು ನಮ್ಮದೇ ರಾಜ್ಯದಲ್ಲಿ ನಡೆದಿದೆ.
ಮಗಳನ್ನು ಕಳೆದುಕೊಂಡ ದುಃಖದಲ್ಲಿದ್ದ ತಂದೆಯೋರ್ವ ಅಂಬುಲೆನ್ಸ್ ಸೇವೆ ದೊರೆಯದಿದ್ದುದರಿಂದ ತನ್ನ ಮಗಳ ಶವವನ್ನು ಬೈಕ್‌ನಲ್ಲಿ ಸಾಗಿಸಿದ್ದಾನೆ.
ಘಟನೆ ವಿವರ: ಮಧುಗಿರಿಯ ವೀರಾಪುರದ ತಿಮ್ಮಪ್ಪ ಎಂಬುವವರ ಮಗಳು ರತ್ನವ್ವ(20) ಉಸಿರಾಟದ ಸಮಸ್ಯೆಯಿಂದ ಬಳಲುತ್ತಿದ್ದು ಆಕೆಯನ್ನು ಕೊಡಿಗೇನಹಳ್ಳಿ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಆದರೆ ದುರದೃಷ್ಟವಶಾತ್ ಆಕೆ ಸಾವನ್ನಪ್ಪಿದ್ದಾಳೆ.
ಮಗಳ ಶವವನ್ನು ತನ್ನ ಗ್ರಾಮ ವೀರಾಪುರಕ್ಕೆ ಸಾಗಿಸಲು ಹೋಬಳಿ ಕೇಂದ್ರದ ಈ ಸರ್ಕಾರಿ ಆಸ್ಪತ್ರೆಯಲ್ಲಿ ಆಂಬುಲೆನ್ಸ್ ಕೂಡ ಇರಲಿಲ್ಲ.ಹೀಗಾಗಿ ತಿಮ್ಮಪ್ಪ ಪರಿಚಯಸ್ಥರೊಬ್ಬರ ಸಹಾಯ ಪಡೆದು ಟಿವಿಎಸ್ ಬೈಕ್ನಲ್ಲಿಯೇ ಶವವನ್ನು ಸಾಗಿಸಿದ್ದಾರೆ. ಖಾಸಗಿ ಕಾರ್ ಬಾಡಿಗೆ ಪಡೆದು ಶವವನ್ನು ಸಾಗಿಸುವಂತೆ ಸ್ಥಳೀಯರು ಸಲಹೆ ನೀಡಿದರೂ ಹಣವಿಲ್ಲದಿದ್ದುದರಿಂದ ಟಿವಿಎಸ್ ಬೈಕ್ನಲ್ಲಿಯೇ ಮಗಳ ದೇಹವನ್ನು ಸಾಗಿಸಿದ್ದಾರೆ.
ರತ್ನವ್ವ ಆಸ್ಪತ್ರೆಗೆ ದಾಖಲಾದ ಸಂದರ್ಭದಲ್ಲಿ ಅಲ್ಲಿ ವೈದ್ಯರು ಇಲ್ಲದಿದ್ದುರಿಂದ ಸಕಾಲಕ್ಕೆ ಚಿಕಿತ್ಸೆ ದೊರೆಯದೆ ಸಾವನ್ನಪ್ಪಿದ್ದಾಳೆ ಎಂದು ಸಹ ಹೇಳಲಾಗುತ್ತಿದೆ.
