ಸಂಸದೀಯ ಕಾರ್ಯದರ್ಶಿಗಳ ಸ್ಥಾನವನ್ನು ಲಾಭದಾಯಕ ಹುದ್ದೆಯಿಂದ ಹೊರಗಿಡುವ ದೆಹಲಿ ಸರಕಾರದ ವಿಧೇಯಕವನ್ನು ರಾಷ್ಟ್ರಪತಿ ಪ್ರಣಬ್‌ ಮುಖರ್ಜಿ ಅವರು ತಿರಸ್ಕರಿಸುತ್ತಿದ್ದಂತೆ ಮುಖ್ಯಮಂತ್ರಿ ಕೇಜ್ರಿವಾಲ್ ಮತ್ತೆ ಪ್ರಧಾನಿ ಮೋದಿ ಅವರ ವಿರುದ್ಧ ಹರಿಹಾಯ್ದಿದ್ದಾರೆ.
ಮೋದಿ ಅವರಿಗೆ ಆಪ್ ಎಂದರೆ ಭಯ ಎಂದು ಅವರು ವ್ಯಂಗ್ಯವಾಡಿದ್ದಾರೆ.
ನಮ್ಮ ಸರ್ಕಾರದಲ್ಲಿ ಒಬ್ಬ ಶಾಸಕ ವಿದ್ಯುತ್ ಕ್ಷೇತ್ರಕ್ಕೆ, ಇನ್ನೊಬ್ಬ ನೀರು, ಮತೊಬ್ಬಆಸ್ಪತ್ರೆ, ಮಗದೊಬ್ಬ ಶಾಲೆ- ಹೀಗೆ ಒಂದೊಂದು ಕ್ಷೇತ್ರಕ್ಕೆ ಒಬ್ಬೊಬ್ಬ ಶಾಸಕರನ್ನು ಮೀಸಲಾಗಿಡಲಾಗಿದೆ. ನಮ್ಮ ಕಾರ್ಯವೈಖರಿಯಿಂದ ಮೋದಿ ಅವರಿಗೆ ಆತಂಕ ಸುರುವಾಗಿದೆ. ಹೀಗಾಗಿ ನಾನು ಸಹ ಉತ್ತಮ ಕೆಲಸಗಳನ್ನು ಮಾಡುವುದಿಲ್ಲ. ನಿಮಗೂ ಮಾಡಗೊಡುವುದಿಲ್ಲ ಎಂದು ಅವರು ತೋರಿಸುತ್ತಿದ್ದಾರೆ ಎಂದು ಕೇಜ್ರಿವಾಲ್ ಮೋದಿ ವಿರುದ್ಧ ಟ್ವೀಟರ್‌ನಲ್ಲಿ ಸಮರ ಸಾರಿದ್ದಾರೆ.
ಸಂಸದೀಯ ಕಾರ್ಯದರ್ಶಿಗಳಾಗಿ ಸೇವೆ ಸಲ್ಲಿಸುತ್ತಿದ್ದ 21 ಶಾಸಕರುಗಳಿಗೆ ಅವರ ಸೇವೆಗೆ ಪ್ರತಿಯಾಗಿ ಯಾವುದೇ ರೀತಿಯ ಸಂಭಾವನೆ ನೀಡಲಾಗುತ್ತಿರಲಿಲ್ಲ. ಅವರಲ್ಲಿ ಯಾರಿಗೂ ಒಂದೇ ಒಂದು ರೂಪಾಯಿಯನ್ನು, ನಿವಾಸ, ವಾಹನ ನೀಡಲಾಗಿಲ್ಲ. ಎಲ್ಲರೂ ಉಚಿತವಾಗಿ ಸೇವೆ ಸಲ್ಲಿಸುತ್ತಿದ್ದರು ಎಂದು ಅವರು ಹೇಳಿದ್ದಾರೆ.
ಸಂಸದೀಯ ಕಾರ್ಯದರ್ಶಿಯಂತಹ ಲಾಭದಾಯಕ ಹುದ್ದೆಯನ್ನು ಹೊಂದಿರುವ ದೆಹಲಿ ಸರ್ಕಾರದ 21 ಶಾಸಕರನ್ನು ಅನರ್ಹಗೊಳಿಸಲು ಕೋರಿ ರಾಷ್ಟ್ರಪತಿಯವರಿಗೆ ದೂರು ಸಲ್ಲಿಸಲಾಗಿತ್ತು. ಈ ಹಿನ್ನೆಲೆಯಲ್ಲಿ ದಿಲ್ಲಿ ಸರಕಾರ 1997ರ ದಿಲ್ಲಿ ವಿಧಾನಸಭಾ ಕಾಯ್ದೆ (ಅನರ್ಹತೆ) ಕಾಯ್ದೆಗೆ ತಿದ್ದುಪಡಿ ತಂದು ಸಂಸದೀಯ ಕಾರ್ಯದರ್ಶಿ ಸ್ಥಾನವನ್ನು ಲಾಭದಾಯಕ ಹುದ್ದೆಯಿಂದ ಹೊರಗಿರಿಸಲು ಪ್ರಯತ್ನಿಸಿತ್ತು. ಇದಕ್ಕೆ ದೆಹಲಿ ವಿಧಾನಸಭೆಯ ಅನುಮೋದನೆಯೂ ದೊರೆತಿತ್ತು. ಬಳಿಕ ರಾಷ್ಟ್ರಪತಿಯವರ ಅನುಮೋದನೆಗೆ ಕಳಿಸಲಾಗಿತ್ತು. ಆದರೆ ರಾಷ್ಟ್ರಪತಿಯವರು ಇದಕ್ಕೆ ಅನುಮೋದನೆ ನೀಡಿಲ್ಲ. ಹೀಗಾಗಿ 21 ಶಾಸಕರಿಗೆ ಅನರ್ಹತೆ ಭೀತಿ ಎದುರಾಗಿದೆ.
ಒಂದು ವೇಳೆ ಅವರು ಶಾಸಕತ್ವದಿಂದ ಅನರ್ಹರಾದರೆ ಆ ಸ್ಥಾನಗಳಿಗೆ ಮತ್ತೊಮ್ಮೆ ಚುನಾವಣೆ ಎದುರಾಗಲಿದೆ. 70 ವಿಧಾನಸಭಾ ಕ್ಷೇತ್ರಗಳಲ್ಲಿ ಆಪ್ 67 ಸ್ಥಾನಗಳನ್ನು ಹೊಂದಿದೆ. ಅವರಲ್ಲಿ 21 ಶಾಸಕರು ಅನರ್ಹರಾದರೆ ಆಪ್ ಶಾಸಕರ ಸಂಖ್ಯೆ 46ಕ್ಕಿಳಿಯಲಿದೆ. ಆದರೆ ಬಹುಮತಕ್ಕೆ 36 ಸ್ಥಾನವಷ್ಟೇ ಅಗತ್ಯವಿರುವುದರಿಂದ ಸರಕಾರಕ್ಕೆ ಪತನದ ಆತಂಕವಿಲ್ಲ.
ತಾಜಾ ಸುದ್ದಿಗಳಿಗಾಗಿ ವೆಬ್ ದುನಿಯಾ
ಮೊಬೈಲ್ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ.
