ಮೈನಾ ಹಕ್ಕಿಗಾಗಿ ನೆರೆಹೊರೆಯ ಕುಟುಂಬಗಳ ನಡುವೆ ನಡೆದ ಜಗಳ ಕೋರ್ಟ್ ಮೆಟ್ಟಿಲೇರಿದ ಘಟನೆ ಪಶ್ಚಿಮ ಬಂಗಾಳದ ದಕ್ಷಿಣ ಪರಗಣ 24 ಜಿಲ್ಲೆಯಲ್ಲಿ ನಡೆದಿದೆ.
ಜಿಲ್ಲೆಯ ವಿದ್ಯಾಧರಪುರದಲ್ಲಿ ಈ ಘಟನೆ ನಡೆದಿದ್ದು, ಮಾತಿನಲ್ಲಿ ಪ್ರಾರಂಭವಾದ ಜಗಳ ಕೈ ಕೈ ಮಿಲಾಯಿಸಿ ಹೊಡೆದಾಡಿಕೊಳ್ಳುವ ಮಟ್ಟಿಗೆ ಬೆಳೆದಿದೆ. ಬಳಿಕ ವಿವಾದ ಕೋರ್ಟ್ ಮೆಟ್ಟಿಲೇರಿದ್ದು ಜಗಳದ ಹಿಂದಿನ ಕಾರಣವನ್ನು ತಿಳಿದ ಬಳಿಕ ಆಶ್ಚರ್ಯ ಪಡುವ ಸರದಿ ವಕೀಲರದು ಮತ್ತು ನ್ಯಾಯಮೂರ್ತಿಗಳದಾಗಿತ್ತು.
ಘಟನೆ ವಿವರ: ಅಮಿತ್ ಕುಮಾರ್ ಸರ್ಕಾರ್ ಅವರು ಸಾಕಿದ್ದ ಮೈನಾ ಹಕ್ಕಿ ಜೂನ್ 14 ರಂದು ನೆರೆಮನೆಯ ಮಿಲನ್ ಮಂಡಲ್ ಅವರ ಮನೆಗೆ ಹಾರಿ ಹೋಗಿತ್ತು. ಮಿಲನ್ ಅವರ ತಾಯಿ ಮತ್ತು ಪತ್ನಿ ಆಹಕ್ಕಿಯನ್ನು ತಮ್ಮ ಮನೆಯಲ್ಲಿಯೇ ಇಟ್ಟುಕೊಂಡರು. ಸಂಜೆಯಾದರೂ ಪ್ರೀತಿಯ ಹಕ್ಕಿ ಮನೆಗೆ ಮರಳದಿದ್ದಾಗ ಗಾಬರಿಯಾದ ಸರ್ಕಾರ್ ಕುಟುಂಬದವರಿಗೆ ಕೊನೆಗೆ ಅದು ಮಿಲನ್ ಮನೆಯಲ್ಲಿರುವುದು ಗೊತ್ತಾಗಿದೆ.
ಇದೇ ಕಾರಣಕ್ಕೆ ಎರಡು ಕುಟುಂಬಗಳ ಮಧ್ಯೆ ಜಗಳ ಪ್ರಾರಂಭವಾಗಿ ಪರಷ್ಪರ ಹೊಡೆದಾಡಿಕೊಂಡಿದ್ದಾರೆ. ಘಟನೆಯಲ್ಲಿ ಅಮಿತ್ ಅವರ ತಲೆಗೆ ಗಾಯವಾಗಿದ್ದು, ಮಿಲನ್ ಅವರ ಪತ್ನಿ ಮಿತಾ ಮತ್ತು ತಾಯಿ ದುರ್ಗಾ ವಿರುದ್ಧ ಸೋನಾರ್ಪುರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಯಿತು.
ಐಪಿಸಿ ವಿಭಾಗ 326, 341 ಮತ್ತು 321(ಜಾಮೀನು ರಹಿತ) ಅಡಿಯಲ್ಲಿ ಪ್ರಕರಣ ಮಿಲನ್ ಕುಟುಂಬದವರ ವಿರುದ್ಧ ಎಫ್‌ಐಆರ್ ದಾಖಲಾಯಿತು. ಬಂಧನವನ್ನು ತಪ್ಪಿಸಿಕೊಳ್ಳಲು ಮಿಲನ್ ಕುಟುಂಬ ಕೋರ್ಟ್‌ಗೆ ಹೋಗಬೇಕಾಯಿತು. ಒಂದು ಹಕ್ಕಿಗಾಗಿ ಪ್ರಾರಂಭವಾದ ಜಗಳ ಕೋರ್ಟ್ ಮೆಟ್ಟಿಲೇರಿದ್ದು ಜಡ್ಜ್, ವಕೀಲರನನ್ನು ಸಹ ಅಚ್ಚರಿಗೆ ದೂಡಿತು. ಮಿಲನ್ ಕುಟುಂಬಕ್ಕೆ ನ್ಯಾಯಾಧೀಶರು 10ಸಾವಿರ ರೂಪಾಯಿ ಬಾಂಡ್ ಖಾತರಿಯೊಂದಿಗೆ ಜಾಮೀನು ನೀಡಿದೆ.
ತಾಜಾ ಸುದ್ದಿಗಳಿಗಾಗಿ ವೆಬ್ ದುನಿಯಾ
ಮೊಬೈಲ್ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ.
