ಪಾಟ್ನಾ: ತಾವು ಅಧಿಕಾರದಲ್ಲಿದ್ದಾಗ ಬಳಸುತ್ತಿದ್ದ ಸರ್ಕಾರೀ ಬಂಗಲೆಯಿಂದ ಆರ್ ಜೆಡಿ ನಾಯಕ, ಬಿಹಾರದ ಮಾಜಿ ಸಿಎಂ ತೇಜಸ್ವಿ ಯಾದವ್ ಟಿವಿ, ಸೋಫಾ, ಎಸಿ ಸೇರಿದಂತೆ ಐಷಾರಾಮಿ ವಸ್ತುಗಳನ್ನೆಲ್ಲಾ ಹೊತ್ತೊಯ್ದಿದ್ದಾರೆ ಎಂದು ಬಿಜೆಪಿ ಆರೋಪಿಸಿದೆ.
ತೇಜಸ್ವಿ ಯಾದವ್ ಸರ್ಕಾರೀ ಬಂಗಲೆ ತೆರವು ಮಾಡಿದ ಬಳಿಕ ಅಲ್ಲಿ ಕೆಲವೊಂದು ವಸ್ತುಗಳೇ ಮಾಯವಾಗಿದೆ. ಟಿವಿ, ಸೋಫಾ, ಎಸಿ, ಬೆಡ್ ನ ಬೇಸ್, ಟೆನಿಸ್ ಕೋರ್ಟ್ ನ ನೆಲ ಹಾಸು ಇತ್ಯಾದಿ ವಸ್ತುಗಳನ್ನು ಅವರು ಹೊತ್ತೊಯ್ದಿದ್ದಾರೆ ಎಂದು ಬಿಜೆಪಿ ಗಂಭೀರ ಆರೋಪ ಮಾಡಿದೆ.
ಅಧಿಕಾರ ಕಳೆದುಕೊಂಡ ಮೇಲೆ ಸರ್ಕಾರೀ ಬಂಗಲೆ ತೆರವುಗೊಳಿಸುವಾಗ ಯಾವುದೇ ವಸ್ತುವನ್ನೂ ತೆಗೆದುಕೊಂಡು ಹೋಗುವಂತಿಲ್ಲ. ಸರ್ಕಾರೀ ಬಂಗಲೆಯಲ್ಲಿ ನೀಡುವ ಪ್ರತಿಯೊಂದು ವಸ್ತುವೂ ಸರ್ಕಾರಕ್ಕೆ ಸೇರಿದ್ದಾಗಿದೆ. ಆದರೆ ತೇಜಸ್ವಿ ತಾವು ಮನೆ ತೆರವುಗೊಳಿಸುವಾಗ ಎಲ್ಲವನ್ನೂ ಹೊತ್ತೊಯ್ದಿದ್ದಾರೆ ಎಂದು ಬಿಜೆಪಿ ಆರೋಪಿಸಿದೆ.
ಬಿಹಾರ ಬಿಜೆಪಿ ವಕ್ತಾರ ಡ್ಯಾನಿಶ್ ಇಕ್ಬಾಲ್ ಮಾಧ್ಯಮಗಳ ಮುಂದೆ ಆರೋಪ ಮಾಡಿದ್ದಾರೆ. ನನ್ನದು ಕೇವಲ ಆರೋಪವಲ್ಲ. ತೇಜಸ್ವಿ ಇದನ್ನೆಲ್ಲಾ ತೆಗೆದುಕೊಂಡು ಹೋಗಿದ್ದು ನಿಜ. ಇದಕ್ಕೆ ಸಾಕ್ಷಿಗಳಿವೆ. ಇದು ಅವರ ಮನಸ್ಥಿತಿಯನ್ನು ತೋರಿಸುತ್ತದೆ ಎಂದು ಡ್ಯಾನಿಶ್ ಆರೋಪಿಸಿದ್ದಾರೆ.
