ಬಾಂಗ್ಲಾದೇಶವು ಭಾರತಕ್ಕೆ ಮತ್ತೊಂದು ಪಾಕಿಸ್ತಾನವಾಗಿ ಪರಿಣಮಿಸಿದೆ

Photo Credit X

ನವದೆಹಲಿ: ಬಾಂಗ್ಲಾದೇಶದ ಮಾಜಿ ಪ್ರಧಾನಿ ಶೇಖ್ ಹಸೀನಾ ಅವರ ಪುತ್ರ ಸಾಜೀಬ್ ವಾಜೆದ್ ಬುಧವಾರ ಮಾತನಾಡಿ, "ಬಾಂಗ್ಲಾದೇಶವು ಭಾರತದ ಪೂರ್ವ ಗಡಿಯಲ್ಲಿ ಮತ್ತೊಂದು ಪಾಕಿಸ್ತಾನವಾಗಿ ಮಾರ್ಪಟ್ಟಿದೆ" ಎಂದು ಹೇಳಿದ್ದಾರೆ ಮತ್ತು ಬಾಂಗ್ಲಾದೇಶದಲ್ಲಿ ವಿದೇಶಿ ಗುಪ್ತಚರ ಸಂಸ್ಥೆಗಳ ಪಾತ್ರದ ಬಗ್ಗೆ ಕಳವಳ ವ್ಯಕ್ತಪಡಿಸಿದ್ದಾರೆ.

ದಕ್ಷಿಣ ಏಷ್ಯಾದ 'ಫಾರಿನ್ ಕರೆಸ್ಪಾಂಡೆಂಟ್ಸ್ ಕ್ಲಬ್' (FCC) ಆಯೋಜಿಸಿದ್ದ ಕಾರ್ಯಕ್ರಮವೊಂದರಲ್ಲಿ ಶೇಖ್ ಹಸೀನಾ ಅವರು ವರ್ಚುವಲ್ (ಆನ್‌ಲೈನ್) ಮೂಲಕ ಭಾಷಣ ಮಾಡುವುದಕ್ಕೂ ಮುನ್ನ ಮಾತನಾಡಿದ ವಾಜೆದ್, ಜುಲೈ-ಆಗಸ್ಟ್ 2024ರ ಬಾಂಗ್ಲಾದೇಶದ ಪ್ರತಿಭಟನೆಗಳಿಗೆ ಸಂಬಂಧಿಸಿದಂತೆ ವರದಿಯಾದ ಸಾವಿನ ಸಂಖ್ಯೆಯ ಬಗ್ಗೆಯೂ ಪ್ರಶ್ನೆಗಳನ್ನು ಎತ್ತಿದರು.

ಅವರು ವಿಶ್ವಸಂಸ್ಥೆ ನೀಡಿದ ಅಂಕಿಅಂಶಗಳು ಮತ್ತು ಮುಹಮ್ಮದ್ ಯೂನಸ್ ನೇತೃತ್ವದ ಹಿಂದಿನ ಆಡಳಿತವು ನೀಡಿದ ಅಂಕಿಅಂಶಗಳ ನಡುವಿನ ವ್ಯತ್ಯಾಸಗಳನ್ನು ಎತ್ತಿ ತೋರಿಸಿದರು.

ಮೊದಲನೆಯದಾಗಿ, 2024ರ ಜುಲೈನಲ್ಲಿ ನಡೆದ ಈ ಪ್ರತಿಭಟನೆಯ ಸಂದರ್ಭದಲ್ಲಿ ಸಂಭವಿಸಿದ ಸಾವುಗಳ ಬಗ್ಗೆ ನೀವು ಪದೇ ಪದೇ ಕೇಳಿದ್ದೀರಿ. ಈ ಸಂಖ್ಯೆಗಳ ಬಗ್ಗೆ ವಿವಿಧ ಲೆಕ್ಕಾಚಾರಗಳಿವೆ. ವಿಶ್ವಸಂಸ್ಥೆಯು 1,400 ಸಾವುಗಳೆಂದು ಹೇಳಿದರೆ, ಸರ್ಕಾರವು 800ರ ಆಸುಪಾಸಿನಲ್ಲಿ ಸಂಖ್ಯೆಯನ್ನು ನೀಡಿದೆ. ಹೆಚ್ಚುವರಿಯಾಗಿರುವ ಆ 600 ಜನರು ಯಾರು? ಆ ಹೆಸರುಗಳು ವಿಶ್ವಸಂಸ್ಥೆಗೆ ಎಲ್ಲಿಂದ ಸಿಕ್ಕವು ಎಂದು ಅವರು ಪ್ರಶ್ನಿಸಿದರು.

ನಮ್ಮ ಪಕ್ಷವು ವಿಶ್ವಸಂಸ್ಥೆಗೆ ಪತ್ರ ಬರೆದಿದೆ. ನಮ್ಮ ವಕೀಲರು ಪದೇ ಪದೇ ವಿಶ್ವಸಂಸ್ಥೆಗೆ ಪತ್ರ ಬರೆದಿದ್ದಾರೆ. ಆದರೆ ಇಂದಿನವರೆಗೂ ವಿಶ್ವಸಂಸ್ಥೆಯು ಯಾವುದೇ ಹೆಸರುಗಳನ್ನು ನೀಡಿಲ್ಲ ಎಂದು ವಾಜೆದ್ ಹೇಳಿದರು. 

ಆಗಸ್ಟ್ 15, 2024ರವರೆಗಿನ ಅವಧಿಯನ್ನು ಮಾತ್ರ ವಿಶ್ವಸಂಸ್ಥೆಯು ತನ್ನ ಮೌಲ್ಯಮಾಪನದಲ್ಲಿ ಪರಿಗಣಿಸಿದೆ ಎಂದು ಆರೋಪಿಸಿದ ಅವರು, ಆ ದಿನಾಂಕದ ನಂತರವೂ ಸಾವುಗಳು ಸಂಭವಿಸಿವೆ ಎಂಬುದನ್ನು ಗಮನಸೆಳೆದರು.