ನವದೆಹಲಿ : ಪ್ರಯಾಣಿಕರೊಬ್ಬರು ದೆಹಲಿಯ ಮೇಲೆ ಹಾರಾಡುತ್ತಿದ್ದ ವಿಮಾನವೊಂದರಿಂದ ತೆಗೆದಿರುವ ಫೋಟೋ ವೈರಲ್‌ ಆಗಿದೆ. ಇಡೀ ದೆಹಲಿಯನ್ನು ಮುಸುಕಿರುವ ಮಂಜಿನ ದಟ್ಟ ಪರದೆ ಚಿತ್ರದಲ್ಲಿ ಸ್ಪಷ್ಟವಾಗಿ ಕಾಣುತ್ತಿದ್ದು, ಅದರಲ್ಲಿ ಗಗನಚುಂಬಿ ಕಟ್ಟಡಗಳ ತಲೆಯ ಭಾಗವೂ ಸಹ ಅಸ್ಪಷ್ಟವಾಗಿ ಕಾಣುತ್ತಿದೆ. ಈ ಚಿತ್ರವು ಇಡೀ ಎನ್‌ಸಿಆರ್‌ ವಲಯದ ರಾಜ್ಯಗಳ ಹವಾಮಾನ ಪರಿಸ್ಥಿತಿಗೆ ಹಿಡಿದಿರುವ ಕನ್ನಡಿಯಂತಿದೆ. ವಿನಮ್ರ ಲೊಂಗಾನಿ ಎಂಬುವವರು ಈ ಫೋಟೋ ಕ್ಲಿಕ್ಕಿಸಿದ್ದು, ಇದನ್ನು ಸಾಮಾಜಿಕ ಜಾಲತಾಣ ಎಕ್ಸ್‌ ನಲ್ಲಿ ಹಂಚಿಕೊಂಡಿದ್ದಾರೆ.
ಕೆಲದಿನಗಳಿಂದ ಪ್ರತಿಕೂಲ ವಾತಾವರಣದಿಂದಾಗಿ ವಿಮಾನಗಳ ಸಂಚಾರ ಸಂಪೂರ್ಣ ಅಸ್ತವ್ಯಸ್ಥಗೊಂಡಿದೆ. ದಟ್ಟವಾಗಿ ಕವಿದಿರುವ ಮಂಜಿನಿಂದಾಗಿ ವಿಮಾನಗಳು ಮಾತ್ರವಲ್ಲದೇ ವಾಹನಗಳೂ ಸಹ ರಸ್ತೆಯಲ್ಲಿ ಸಂಚರಿಸಲು ಕಷ್ಟವಾಗಿದೆ.
