ತಮಿಳುನಾಡು :ಇಂದು ಬೆಳಗ್ಗೆ ಕಾಡಿನತ್ತ ಹೋಗಿದ್ದ ದನಗಳನ್ನು ಅಟ್ಟಲು ಇಬ್ಬರೂ ಮಹಿಳೆಯರು ತೆರಳಿದ್ದರು. ಆ ವೇಳೆ ಒಂಟಿ ಸಲಗವೊಂದು ಕಾಡಿನಲ್ಲಿ ಪ್ರತ್ಯಕ್ಷವಾಗಿತ್ತು. ಭಯಭೀತರಾಗಿದ್ದ ಮಹಿಳೆಯರು ಓಡುವಾಗ ಅಟ್ಟಿಸಿಕೊಂಡು ಬಂದ ಆನೆ ಕಾಲ್ತುಳಿತದಿಂದಾಗಿ ಇಬ್ಬರೂ ಮಹಿಳೆಯರು ಸ್ಥಳದಲ್ಲಿಯೇ ಸಾವನ್ನಪ್ಪಿದ್ದಾರೆ. ಕಾಡಾನೆ ದಾಳಿಗೆ ಇಬ್ಬರು ದನಗಾಹಿ ಮಹಿಳೆಯರು ದಾರುಣವಾಗಿ ಮೃತಪಟ್ಟಿರುವ ಘಟನೆ ಕರ್ನಾಟಕ -ತಮಿಳುನಾಡು ಗಡಿ ಪ್ರದೇಶವಾದ ತಳಿ ಅರಣ್ಯಪ್ರದೇಶದಲ್ಲಿ ಭಾನುವಾರ ಮುಂಜಾನೆ ನಡೆದಿದೆ. ವಸಂತಮ್ಮ (37) ಹಾಗೂ ಅನ್ನಿಯಾಳಮ್ಮ (45) ಮೃತ ದುರ್ದೈವಿಗಳು. ದಾಳಿಯಲ್ಲಿ ಎರಡು ಹಸುಗಳೂ ಸಹ ಮೃತಪಟ್ಟಿವೆ.
ನಿನ್ನೆಯಷ್ಟೇ ಒಂಟಿ ಸಲಗವೊಂದು ಡೆಂಕಣಿಕೋಟೆಯ ಬಳಿ ಸುಳಿದಾಡಿ ಗ್ರಾಮಸ್ಥರಲ್ಲಿ ಆತಂಕ ಸೃಷ್ಟಿಸಿತ್ತು. ಆ ಆನೆಯೇ ಇಂದು ಮಹಿಳೆಯರ ಮೇಲೆ ದಾಳಿ ನಡೆಸಿದೆ. ಇದಕ್ಕೆ ಅರಣ್ಯಾಧಿಕಾರಿಗಳ ನಿರ್ಲಕ್ಷ್ಯವೇ ಕಾರವಣವೆಂದು ಆರೋಪಿಸಿ ಗ್ರಾಮಸ್ಥರು ಪ್ರತಿಭಟನೆ ನಡೆಸುತ್ತಿದ್ದಾರೆ.
ಆದರೆ ನಿನ್ನೆ ಡೆಂಕಣಿಕೋಟೆಯಲ್ಲಿ ಕಾಣಿಸಿಕೊಂಡ ಆನೆ ಅರಣ್ಯಕ್ಕೆ ವಾಪಸಾಗಿದೆ. ಇದು ಬೇರೆಯದೇ ಆನೆ ಎಂದು ವಾದಿಸುತ್ತಿರುವ ಅರಣ್ಯ ಇಲಾಖೆ ಅಧಿಕಾರಿಗಳು ಸಂಜೆಯ ಮೇಲೆ ಹಾಗೂ ಮುಂಜಾನೆಯ ಸಮಯದಲ್ಲಿ ಅರಣ್ಯಪ್ರದೇಶಕ್ಕೆ ತೆರಳದಂತೆ ಗ್ರಾಮಸ್ಥರಲ್ಲಿ ಮನವಿ ಮಾಡಿದ್ದಾರೆ.