ಬೆಂಗಳೂರು: ಅಕಾಲಿಕವಾಗಿ ಭಾರೀ ಮಳೆಯಾಗಿದ್ದರಿಂದ ರೈತರ ಬೆಳೆಗಳಿಗೆ ಭಾರೀ ಹಾನಿಯಾಗಿದೆ. ಇದರಿಂದಾಗಿ ರಾಜ್ಯ ರಾಜಧಾನಿ ಬೆಂಗಳೂರಿನಲ್ಲಿ ತರಕಾರಿ ರೇಟು ಗಗನಕ್ಕೇರಿದೆ. ಯಾವ ತರಕಾರಿಗೆ ಯಾವ ಬೆಲೆ ಇಲ್ಲಿದೆ ವಿವರ.
ಈರುಳ್ಳಿ, ಟೊಮೆಟೊ ಸೇರಿದಂತೆ ರೈತರು ಬೆಳೆದು ದಾಸ್ತಾನು ಇರಿಸಿದ್ದ ತರಕಾರಿಗಳು ಭಾರೀ ಮಳೆಯಿಂದಾಗಿ ಕೊಳೆಯುವ ಪರಿಸ್ಥಿತಿ ಬಂದಿದೆ. ಇದರಿಂದಾಗಿ ತರಕಾರಿ ರೇಟು ವಿಪರೀತ ಏರಿಕೆಯಾಗಿದೆ. ಅದರಲ್ಲೂ ಟೊಮೆಟೊ ಬಲು ದುಬಾರಿಯಾಗಿದ್ದು 60-70 ರೂ.ಗೆ ಬಂದು ನಿಂತಿದೆ.
ಕಳೆದ ವಾರ ಟೊಮೆಟೊ ದರ 50 ರೂ.ಗಳಷ್ಟಿತ್ತು. ಆದರೆ ಈಗ ಮಳೆಯಿಂದಾಗಿ 70 ರೂ.ವರೆಗೆ ಬಂದು ನಿಂತಿದೆ. ಈರುಳ್ಳಿಯೂ ಹೆಚ್ಚು ಕಡಿಮೆ ಇದೇ ಬೆಲೆ ಹೊಂದಿದೆ. ಆಲೂಗಡ್ಡೆಯೂ ಬೆಲೆ ಏರಿಕೆಯಾಗಿದೆ. ಹಸಿಮೆಣಸು, ಬೀನ್ಸ್, ಕ್ಯಾರೆಟ್ ಬೆಲೆಯೂ ಹೆಚ್ಚಾಗಿದ್ದು ಗ್ರಾಹಕರಿಗೆ ಬೆಲೆ ಏರಿಕೆಯ ಬಿಸಿ ತಟ್ಟಿದೆ.
ನಾಟಿ ಬೀನ್ಸ್ 120 ರೂ, ಟೊಮೆಟೊ 60, ಬದನೆ 60 ರೂ., ನುಗ್ಗೆಕಾಯಿ 100, ಮೆಣಸಿನಕಾಯಿ 80 ರೂ., ಮೂಲಂಗಿ 40 ರೂ., ಆಲೂಗಡ್ಡೆ 40 ರೂ., ದಪ್ಪ ಈರುಳ್ಳಿ 60 ರೂ., ಕ್ಯಾಪ್ಸಿಕಂ 40 ರೂ., ಶುಂಠಿ 150 ರೂ., ಬೆಳ್ಳುಳ್ಳಿ 400 ರೂ., ನಾಟಿ ಬಟಾಣಿ 200 ರೂ., ಪುದಿನ ಸೊಪ್ಪು ಕಟ್ಟಿಗೆ 90 ರೂ., ಕೊತ್ತಂಬರಿ ಸೊಪ್ಪು ಕಟ್ಟು 30 ರೂ. ಗಳಷ್ಟಿದೆ. ದೀಪಾವಳಿ ಹಬ್ಬದ ಸಂದರ್ಭದಲ್ಲಿ ಇದು ಇನ್ನಷ್ಟು ಏರಿಕೆಯಾಗುವ ಸಾಧ್ಯತೆಯಿದೆ.
