ನವಜಾತ ಶಿಶುವನ್ನು ಟಾಯ್ಲೆಟ್ ಗೆ ಹಾಕಿ ಫ್ಲಶ್ ಮಾಡಿದರು: ಶಾಕಿಂಗ್ ಘಟನೆಯ ವಿವರ ಇಲ್ಲಿದೆ

ರಾಮನಗರ: ಆಗ ತಾನೇ ಜನಿಸಿದ ಮಗುವನ್ನು ಟಾಯ್ಲೆಟ್ ಗೆ ಹಾಕಿ ಫ್ಲಶ್ ಮಾಡಿದ ಶಾಕಿಂಗ್ ಘಟನೆ ರಾಮನಗರದ ಹಾರೋಹಳ್ಳಿಯ ಆಸ್ಪತ್ರೆಯೊಂದರಲ್ಲಿ ನಡೆದಿದೆ. ಈ ಶಾಕಿಂಗ್ ಘಟನೆಯ ವಿವರ ಇಲ್ಲಿದೆ.

ಈ ಅಮಾನವೀಯ ಕೃತ್ಯ ಬಯಲಾಗುತ್ತಿದ್ದಂತೇ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ. ಈ ಕೃತ್ಯವೆಸಗಿರುವುದು ಯಾರು ಎಂಬುದು ಇನ್ನೂ ಬಯಲಾಗಿಲ್ಲ. ಆದರೆ ತಾಯಿಯೇ ಕೃತ್ಯವೆಸಗಿರಬಹುದು ಎಂದು ಸಂಶಯಿಸಲಾಗಿದ್ದು ಆ ನಿಟ್ಟಿನಲ್ಲಿ ತನಿಖೆ ನಡೆಯುತ್ತಿದೆ.

ಆಸ್ಪತ್ರೆಯ ನೆಲಮಹಡಿಯ ಶೌಚಾಲಯದಲ್ಲಿ ನೀರು ನಿಂತಿರುವುದನ್ನು ಆಸ್ಪತ್ರೆ ಸಿಬ್ಬಂದಿಗಳು ಗಮನಿಸಿದ್ದಾರೆ. ಏನೋ ಬ್ಲಾಕ್ ಆಗಿರಬಹುದು ಎಂದು ವೈದ್ಯ ಸಿಬ್ಬಂದಿಗಳು ಕ್ಲೀನಿಂಗ್ ಮಾಡುವ ಸಿಬ್ಬಂದಿಗಳಿಗೆ ಶುಚಿಗೊಳಿಸಲು ಸೂಚನೆ ನೀಡಿದ್ದರು. ಈ ವೇಳೆ ಸಿಬ್ಬಂದಿ ವ್ಯಾಕ್ಯೂಮ್ ಕ್ಲೀನರ್ ಬಳಸಿ ಬ್ಲಾಕ್ ಸರಿಪಡಿಸಲು ನೋಡಿದ್ದಾರೆ.

ಆಗ ಏನೋ ವಸ್ತು ತಡೆಯಾಗಿರುವುದು ತಿಳಿದುಬಂದಿದೆ. ಏನೋ ವಸ್ತು ಇರಬಹುದು ಎಂದು ತೆಗೆದು ನೋಡಿದರೆ ಶಿಶುವಿನ ಶವ ನೋಡಿ ಸಿಬ್ಬಂದಿಗಳಿಗೆ ಶಾಕ್ ಆಗಿದೆ. ಮಗು ಜನಿಸಿ ಕೇವಲ ಒಂದು ಅಥವಾ ಎರಡು ದಿನಗಳಾಗಿರಬಹುದಷ್ಟೇ ಎನಿಸುವಂತಿತ್ತು. ತಕ್ಷಣವೇ ವೈದ್ಯ ಸಿಬ್ಬಂದಿಗಳಿಗೆ ಮಾಹಿತಿ ನೀಡಲಾಗಿದೆ. ಆಸ್ಪತ್ರೆಯವರು ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಬಳಿಕ ಮಗುವಿನ ಶವವನ್ನು ಅದೇ ಆಸ್ಪತ್ರೆಯಲ್ಲಿ ಮರಣೋತ್ತರ ಪರೀಕ್ಷೆ ನಡೆಸಲಾಗಿದೆ. ಈ ಮಗು ಯಾರದ್ದು, ಇದನ್ನು ಇಲ್ಲಿ ಹಾಕಿದವರು ಯಾರು ಎಂಬುದು ತನಿಖೆಯಿಂದ ತಿಳಿದುಬರಬೇಕಿದೆ.