ಬಡತನದಲ್ಲಿ ಅರಳಿದ ಹೂ

ಎಲೆಕ್ಟ್ರಿಷಿಯನ್​ ತಂದೆ ಪುತ್ರನ ಕ್ರಿಕೆಟ್​ ಭವಿಷ್ಯದ ಕನಸಿಗೆ ಸೂಕ್ತ ಮಾರ್ಗದರ್ಶನ ನೀಡಲು ಬೇಕಾಗಿದ್ದ ಖರ್ಚನ್ನು ಭರಿಸಲು ವಿಫಲನಾಗಿದ್ದರೂ ಸಹ ಈಗ ಅದೇ ಪುತ್ರ ಕ್ರಿಕೆಟ್​ ಜೀವನದಲ್ಲಿ ತನ್ನ ಅಂಬೆಗಾಲಿಡಲು ಸಜ್ಜಾಗುತ್ತಿದ್ದಾರೆ.

ಹೈದರಾಬಾದ್​ನ ಚಂದ್ರಾಯನಗುಟ್ಟಾ ಪ್ರದೇಶದಲ್ಲಿ ಅತ್ಯದ್ಭುತವಾಗಿ ಕ್ರಿಕೆಟ್​ ಆಡುತ್ತಿದ್ದ 9 ವರ್ಷದ ಪುಟ್ಟ ಪೋರ ಇದೀಗ ತನ್ನ 19ನೇ ವರ್ಷ ವಯಸ್ಸಿನಲ್ಲಿ ಇಂಡಿಯನ್​ ಪ್ರೀಮಿಯರ್​ ಲೀಗ್​ನಲ್ಲಿ 1.7 ಕೋಟಿ ರೂಪಾಯಿಗಳಿಗೆ ಹರಾಜಾಗಿದ್ದಾರೆ.

2022ನೇ ಸಾಲಿನ ಐಪಿಎಲ್​​ ಹರಾಜು ಪ್ರಕ್ರಿಯೆಯಲ್ಲಿ ಮುಂಬೈ ಇಂಡಿಯನ್ಸ್​ ತಂಡವು ಎನ್​ ತಿಲಕ್​ ವರ್ಮಾರನ್ನು 1.7 ಕೋಟಿ ರೂಪಾಯಿಗಳಿಗೆ ಖರೀದಿ ಮಾಡಿದೆ. ಕ್ರಿಕೆಟಿಗನಾಗಿ ತಿಲಕ್​ ರೂಪುಗೊಳ್ಳುವದರ ಹಿಂದೆ ಕೋಚ್​ ಸಲಾಮ್ ಬಯಾಶ್​​ರ ಶ್ರಮ ಬಹಳಷ್ಟಿದೆ.

ತಿಲಕ್​ಗೆ ಅಗತ್ಯವಿದ್ದ ಮಾರ್ಗದರ್ಶನ, ಆಹಾರ ಹಾಗೂ ಎಷ್ಟೋ ಸಂದರ್ಭಗಳಲ್ಲಿ ತನ್ನ ಐದು ಮಂದಿ ಕುಟುಂಬಸ್ಥರು ವಾಸಿಸುತ್ತಿದ್ದ ಸ್ವಂತ ಮನೆಯಲ್ಲಿ ತಿಲಕ್​​ಗೆ ಆಶ್ರಯ ನೀಡಿದ್ದರಂತೆ.

ತಿಲಕ್​ ತಂದೆ ನಂಬೂರಿ ನಾಗರಾಜರಿಗೆ ಅವರನ್ನು ಕ್ರಿಕೆಟ್​ ಅಕಾಡೆಮಿಗೆ ಸೇರಿಸುವಷ್ಟು ಹಣ ಇರಲಿಲ್ಲ. ಈ ಸಂದರ್ಭದಲ್ಲಿ ಸಲಾಮ್,​​ ತಿಲಕ್​ಗೆ ಆರ್ಥಿಕ ಸಹಾಯವನ್ನೂ ಮಾಡಿದ್ದಾರೆ. ಈ ವಿಚಾರವಾಗಿ ಮಾತನಾಡಿದ ತಿಲಕ್​ ವರ್ಮಾ, ನನ್ನ ಬಗ್ಗೆ ನೀವು ಏನನ್ನೇ ಬರೆಯದಿದ್ದರೂ ಅಡ್ಡಿಲ್ಲ, ಆದರೆ ನನ್ನ ಕೋಚ್​ ಸರ್​ ಬಗ್ಗೆ ನೀವು ಅವಶ್ಯವಾಗಿ ಬರಯಲೇಬೇಕು ಎಂದು ಮಾಧ್ಯಮಗಳ ಎದುರು ಹೇಳಿದ್ದರಂತೆ.

ಕ್ರಿಕೆಟ್​ಗೆ ಬೇಕಾದ ಎಲ್ಲಾ ವೆಚ್ಚಗಳನ್ನು ಸಲಾಮ್​ ಭಾಯಿ ನೋಡಿಕೊಂಡಿದ್ದಾರೆ. ನಾನು ಇಂದು ಈ ಹಂತಕ್ಕೆ ಬಂದಿದ್ದೇನೆ ಅಂದರೆ ಅದಕ್ಕೆ ಸಲಾಮ್​ ಹಾಗೂ ಅವರ ಕುಟುಂಬಸ್ಥರ ಬೆಂಬಲವೇ ಕಾರಣ ಎಂದು ತಿಲಕ್​ ಹೇಳಿದ್ದಾರೆ.